EN
أكد جمال حمزة نجم الزمالك السابق أنه كان طفلا شقيا لكن في نفس الوقت غير مؤذي، كنت عاوز أسيب كل حاجة عشان ألعب كورة، ولم أكن ملتزما في المدرسة ولكن غير مشاغب.
أما عن المواقف التي لا ينساها قال حمزة: كنا دايما نعمل مقالب في بعض خصوصا لما كنا في قطاع الناشئين في الزمالك وأنا وميدو تحديدا كنا أكتر المشاغبين في الفريق وفاكر مقلب عملناه في محمود محمود وكان وقتها قادم للقاهرة ولا يعرف شيئا وأخدناه ورحنا ملاهي السندباد، وتوهناه وقعد يلف علينا ساعتين واحنا ماشيين وراه عمالين نضحك لحد ما فقد أعصابه وانهار، فحياتنا كلها كانت مواقف ومقالب في بعض لدرجة إني كنت دائما أركب معاهم مواصلات رغم إن بيتي جنب النادي عشان المقالب اللي بنعملها طول الطريق، متعة رهيبة.
وبعيدا عن الملعب قال جمال حمزة: التلفزيون متعتي الأكبر، بقعد قدامه ومتحركش بحب كل أفلام عادل إمام وإسماعيل يس والمسرحيات الكوميدية، باختصار أنا كائن بيتوتي جدا وبحب القعدة في البيت قدام التلفزيون.
وعن تجربته في التمثيل قال في تصريحات خاصة لبرنامج "بره الملعب " على أون سبورت إف: كانت في فيلم "الزمهلاوية " ومسلسل "ريح المدام "، مش بعتبرها تجربة في التمثيل لأني كنت طالع باسم وصفة جمال حمزة، وكل التعليقات كانت بتقول إني كويس مكنتش خايف من الكاميرا ومكانش فيه اعادات كتير، ومن المواقف التي لا انساها في "ريح المدام " إني دخلت في خلاف مع أكرم حسني حول شخصية أبو حفيظة اللي يظهر بها في برنامجه، مكنتش حابب الشخصية وشايف إن أكرم عنده كوميدي أفضل من كده كتير وهو زعل لما قلت له كده وفهمي تدخل وولع الدنيا بيننا بس أنا كنت مصر إن أكرم كوميديان جامد بعيدا عن شخصية أبو حفيظة.
أما عن المواقف المحرجة التي يتذكرها " بره الملعب " قال حمزة: كنت قاعد مع أصدقائي في كافية وفوجئت ببنت تريد التصوير معي وبعد ما اتصورت ومشيت قالولي إن دي عروسة وتركت حفل الخطوبة اللي كان في نفس المكان عشان تتصور معي وطبعا سألت على خطيبها عشان مكنش ينفع تسيبه وتروح تتصور مهما كانت معجبة بالنجم اللي موجود فدي كانت أغرب حاجة حصلت معايا.
