EN 
«المسيح الدجال تحت هنزل اقتله» بتلك الكلمات بدأ طارق سيد حسن والد الشاب سيد الذي قتل على يد نجل عمه بمنطقة منشية الصدر في حدائق القبة، حديثه ليروي لنا تفاصيل الواقعة والحكم على المتهم من قبل محكمة جنايات القاهرة.
فقال والد المجني عليه: "المتهم محمد عنده 27 سنة عامل فيها مجنون ويتعاطى كل حاجة وحشة، ومعرفش ليه هو قتل ابني والاتنين ملهمش علاقة ببعض خالص، واللى حصل إنه حدثت مشادة بين مراتي وزوجة أخي بسبب مطالبة محصل المياه بدفع قيمة الايصال الشهرى ولكن تعاملت زوجة أخى بطريقة سيئة معها وقفل الباب في وجه مراتي بشكل لا يليق وعند معاتبتها على ذلك حدثت بينهما المشادة وانتهى الموضوع لحد كده".
وتابع والد المجني عليه: "بعد اللى حصل ده بيومين، ابني كان نازل البنك وهو راجع شاف ابن عمه المتهم نازل على السلم بيقول هنزل تحت أموت المسيح الدجال ومعاه سكينة، وفضل يلف ويدور حولين ابني لحد ما مسكه من هدومه ومعاه السلاح وراح مغفلة وطعنه بالسكينة وغرق في دمه وسقط بعدها علطول".
واستكمل: "اللى حصل بعد كده المتهم اتقبض عليه وتم التحقيق معاه واعترف بالجريمة ومثلها 4 مرات دون خطأ منه، واتحال للمحاكمة النائية وقضت المحكمة بعد مرور 9 شهور بالسجن المؤبد في حقه".
وأكد والد المجني عليه: "إحنا فضلنا ناخد سكة القانون منذ البداية، ومستنين صدور أسباب الحكم الرسمية، لاتخاذ إجراءات أخرى بالطعن على الحكم ده وفقا للقانون".
واختتم والد المجني عليه بمناشدة النائب العام بالتدخل والطعن على الحكم لكي يعود الحق لأصحابه وفقا لصحيح القانون، وان ما فعله المتهم بنجله يستحق الإعدام ولا غير ذلك.
