EN 
روت أميرة ابنة سيد مكاوي أن والدها الراحل كان مختلفاً نظرًا لظروف فقدان بصره.. قائلة: "عشت فترة متخيلة إني كنت بساعده واكتشفت إن هو اللي بيساعدنا طول الوقت وكان "جلابية حنان متعلقين بيها طول الوقت".
وتابعت في لقاء خلال برنامج "كلمة أخيرة" الذي تقدمه الإعلامية لميس الحديدي على شاشة ON قائلة: غميت عيني لبعض الوقت عشان أحس أبويا كان بيحس إيه، وأبي وصفنا في أحد الحوارات التلفزيونية بشكل دقيق جدا.. من غير ما توصفنا أمي له.. وكنت بأخذ رأيه في لبسي رغم إنه مش شايفه".
واستكملت أميرة: "عمري ما شوفت والدي بيزعق والخصام كان هو العقاب الأشد لينا وكنت فاكرة إنه بيشوف لغاية ما عمري وصل 6 سنين.. ومكانش يخليني أشوفه من غير النضارة.. وهو عفريت جدًا بيعمل حاجات كتير مرعبة تحسسك إنه بيشوف زي إنه بيعمل شاي وبيلبس لوحده".
أتمت أميرة سيد مكاوي قائلة: "رغم مرور سنين على وفاته مش بقدر أشوفه على الشاشة لأني مش عارفه أحضنه وأطبطب عليه".
