مشاكل وصعوبات مادية.. السبب الحقيقي وراء اعتزال شريف إدريس الفن نهائيا

تصدر الفنان الشاب شريف إدريس، محركات البحث على جوجل، والتريند عبر مواقع التواصل الاجتماعي، بعد إعلانه اعتزال الفن نهائيًا، من خلال منشور على صفحته الشخصية على موقع السوشيال ميديا «فيسبوك»، لمواجهته مشاكل وصعوبات مادية، عارضًا جانبًا من المشاكل التي تواجه في حياته الشخصية.

رغبة في الابتعاد عن الفن، والاتجاه إلى السفر خارج البلاد، لتأمين حياة مستقرة وآمنة لأولاده وأسرته، بعد معاناته الطويلة التي مر بها وسط العديد من الظروف، ماذا حدث للفنان الشاب شريف إدريس ليتخذ قرارا حاسمًا مثل هذا؟، وما هي الظروف القاسية التي مر بها؟.

لو اتعرض عليا بطولات هرفضها.. شريف إدريس يعلن اعتزاله الفن

أخبار الفن|شريف إدريس: لو اتعرض عليا بطولة هرفضها واعتزلت الفن ..طرح برومو مسلسل "فاتن أمل حربي".. فيديو

قصة اعتزال شريف إدريس

منشور طويل عبر موقع التواصل الاجتماعي «فيسبوك»، فاجأ فيه الفنان الشاب المعتزل، شريف إدريس، متابعيه والجمهور، بقرار اعتزاله الفن نهائيًا، موضحًا العديد من المشكلات، وبعض التفاصيل الخاصة بحياته الشخصية التي تأثرت بالأوضاع التي مر بها.

منشور شريف إدريس: 

«بسم الله الرحمن الرحيم

بعد ٣٥ سنه سعي وتعب وشقي في الوسط الفني قررت الاعتزال والابتعاد تماما وتغيير مسار حياتي وأي حد عنده فرصة سفر ليا هاكون شاكر ليه وده طلبي الوحيد..وده قرار أخدته بعد ما الأمور وصلت في الوسط الفني لمرحله عبثيه وصلت اني بقيت بشوف بعض الزملاء بيشحتو الشغل علني علشان يشتغلو لان الشغل بقي متقسم علي ناس معينه..فلو الامور وصلت لكده ابعد احسن..وحتي لما بيجي شغل بيتفرض عليك توافق باقل الفلوس وتخرج من الشغل مديون..ومواقف مهينه زي ان شركة انتاج تعرض عليك اجر هو قيمة ربع اجرك والسبب انهم الميزانية مصروفه عالديكور..طب خلو الديكور يمثل

هحكيلكم موقف حصل معايا من أسبوع..اتصل بيا حد قالي عايزين حضرتك بكره عندك تصوير في مسلسل كذا بس هتدفع عشره في الميه للكاستينج دايريكتور..كان هيجيلي جلطه بعد ماقفلت المكالمه ووافقت علشان انا محتاج اشتغل ومحتاج فلوس..وماقدرتش استوعب الفكره بصراحه اني بعد العمر ده مضطر ادفع علشان اشتغل فاتصلت واعتذرت…وده الحال حاليا ان الامور بقت في ايد كاستينج دايريكتور..وده موقف من مواقف كتير مريت بيها لو حكيتها محتاجه كتاب مش بوست عالفيس

فطالما الشغل بقي لازم يتدفعله..وطالما الشغل بقي بالشحاته..يبقي بلاش احسن

انا طول عمري راضي الحمد لله..بس حقيقي انا وصلت لمرحلة اكتئاب وصلتني اني بقيت بنام احلم بكابوس اني بقتل عيالي وبقتل نفسي لأني وصلت لمرحله نفسيه وماديه اني بقيت مش قادر اربيهم ولا اصرف عليهم وانا عندي تلات أطفال بعبدهم عباده متخيلين حجم المسؤولية..وبقيت مديون لطوب الأرض

حقيقي لو حد عنده فرصة سفر ليا هاكون شاكر ليه جداً وهيكون جميل في رقبتي لحد ما اموت لأن حقيقي انا مش قادر اعيش في البلد دي تاني انا حاولت اسعي في اي مجال تاني بس ماقدرتش

وحقيقي لو اتعرض عليا بطولات بعد البوست ده هرفضها لان البوست ده هو نهاية علاقتي بالمجال اللي اتربيت فيه ودرسته وعشت فيه كل تفاصيل حياتي والحمد لله علي كل شئ.

همسح ابلكيشن فيسبوك من تليفوني لأني هنزل ابيع تليفوني أصلا..فانا هكون متاح اونلاين لحد بالليل..لو حد عنده فرصة شغل وسفر ليا ومش معاه رقمي ياريت يجيبه من أي حد

ملحوظه: انا مش محتاج طبطبه من حد انا محتاج فرصة سفر وشغل تخليني أعيش ولادي حياه كريمة وبس

شكرا ليكم محبتي للجميع

هاين عليا اقوم ارمي نفسي من البلكونة بعد ماوصلت اني اكتب البوست ده».

تفاعل المتابعين مع شريف إدريس

بعد أن نشر الفنان المعتزل شريف إدريس منشوره على موقع التواصل الاجتماعي فيسبوك، انهالت عليه التعليقات، ما بين مؤدين قراره بالاعتزال، ومن يدعون له بالتوفيق في حياته الجديدة، وتضامن من عدد من زملائه من الفنانين، فكانت التعليقات: 

-  أرمي حمولك على الله قادر ربنا يرزقك ويفرجها عليك من غير حول ولا قوة كلنا مترجيين كرمه ورحمته

- ياصديقي الطيب أنسى الدنيا وريح بالك اوعى تفكر فالي جرالك أجرك على الله 

- أنت نجم وكبير قوي.. ودي مش طبطبة ده حقك.. الصبر علشان ربك كريم قوي

- هتفرج قول يارب

- هتتعدل ياحبيبي بإذن الله 

- على قد ما انا حاسس بيك وعارف اللي انت فيه على قد ما انا زعلان على المرحلة اللي وصلها ناس كتير للاسف بسبب كلامك ده»

من هو شريف إدريس

ولد الفنان الشاب المعتزل شريف إدريس، في محافظة الأقصر، وبدأ العمل في الفن والتمثيل وهو طفل صغير، بالصدفة، حيث اصطحبه والده إلى بلاتوه تصوير مسلسل « النهر لا يحترق»، لتكون بداية ظهوره في منتصف الثمانينيات.

التحق شريف إدريس بالمعهد العالي للفنون المسرحية، قسم التمثيل والإخراج، وحصل على شهادته عام 2009، وشارك في 71 عملًا فنيًا، تنوعت ما بين السينما والدراما.

يعد فيلم النهادرة يوم جميل آخر أعماله السينمائية، وشارك في المارثون الرمضاني الماضي 2021 بمسلسل قصر النيل، والذي جمعه بعدد من النجوم أبرزهم: دينا الشربيني، محمد حاتم، أحمد خالد صالح، ريهام عبد الغفور، ونبيل عيسى، وعمر السعيد، وناردين فرج، ومريم الخشت، ومحمود البزاوي، وإخراج خالد مرعي.