اقرأ قصيدة" ابن الإله " للشاعر"عبد الرحمن الخطيب

قلت السلام ف الأرض حق
والحب حق
والقوت قَسَم
والحكمه مش طول الأمد
الحكمه تحقيق الغرض
أيوه الأمانه متعبه
بس الدموع الطيبه
سكّة نجاه
لو تسرحوا.....
أجيال على شر البلى
راح تتولد
كان الجزا إني اتصلب
أنا مش رسول ....
علشان اعيش التجربه
أو إني أمنحكم خلاص
يا موهومين بالقول هبه
لجل الخطايا تتمحي
أنا زيكم
كان نفسي اعيش
بس الحياه
رافضه نكون زي الخيال
والحلم تاه
بين القدر والاحتمال
يا مخدوعين
إبن الإله
عمره ما يمنح حياه
مقدرش يضمنها لجسد
منحول علي سفح الوجع
فوق الصليب
نادى علي رب الخلايق كلها
إوعاك تسيبني للألم
مين يدّعى؟!!!
أنه عشانكم إتصلب
أنا مش رسول
أنا حلم لساه ما اكتمل
حتي النهايه مبهمه
بس الأمال متعلقه
فوق الصليب