الناظر يصف علاج فعال للقضاء على "حشرات الرأس"

حذر الدكتور "هاني الناظر" أستاذ أمراض الجلدية ورئيس المركز القومي للبحوث السابق، من تفاقم مشكلة حشرات الشعر "القمل" فى شعر الأطفال بدخول المدارس، والتى لاترتبط بمستوى اجتماعى معين، ناصحا الأمهات بتدليك فروة رأسابناءهم بزيت الخروع نظرا لما يحدثه من اختناق وموت لتلك الحشرات.
وكتب "الناظر" فى تدوينة له عبر صفحته الشخصية بموقع التواصل الاجتماعى "فيس بوك" : "واحدة من المشاكل اللي بيتعرض لها الاطفال احيانا ومع بداية دخول المدارس ظهور حشرة الشعر (القمل)، ودي مشكلة بتسبب ارق شديد للأمهات وعلى فكرة دي مالهاش دعوة بالمستوي الاجتماعي مبتفرقش بين فقير وغني ولا مستوى المدرسة زي ما بلاحظ في العيادة".
وتابع : "والنهاردة عاوز اقولكم على حل المشكلة وعلاجها بعيدا عن المركبات الدوائية الكيميائية لأن في أطفال بيجيلهم حساسية منها .. والعلاج هو : اول يوم الام بتجيب اي زيت نباتي وليكن مثلا زيت الخروع ( لانه موش غالي ) ويتم تدليك فروة الرأس والشعر بالكامل ويترك يوم كامل وده الهدف منه ان طبقه الزيت دي بتعزل الحشرة عن الهواء وبالتالي بتمنع وصول الأكسجين لها وده بيؤدي لاختناق وموت جميع الحشرات وفي نهاية اليوم يتم غسل الشعر جيدا باي شامبو وبعدين يتم تسريحه بمشط بسنون ضيقة (فلاية ) وبكدة نكون اتخلصنا من الحشرات نفسها".
وأضاف: "وبعد كده نحضر طبق ماء دافئ ويخلط به معلقة خل كبيرة، ويتم تدليك الشعر بالمحلول، ويترك حوالي ساعتين تقريبات على الأقل وده علشان محلول الخل الحامضي بيفصل ويدوب بيض الحشرات اللي بيكون لازق في الشعر وبعد كده نغسل الشعر ونسرحه مرة تانية بنفس المشط علشان نشيل البيض".
واختتم "الناظر" تدوينته قائلا: "وبكده نكون اتخلصنا نهائيا اول يوم من الحشرات وتاني يوم من البيض .. راقبوا فروة راس وشعر اطفالكم دايما من حين لآخر خاصة اثناء العام الدراسي".