عمرو أبو بكر الصديق يكتب: كيف تصبح غنيا

كيف تصبح غنيا في سبع خطوات..
عشان تبني نفسك بنفسك في مصر وعشان نثبت للعالم أننا مختلفين وقادرين على النمو والرقي ...انت تقدر تكون غني بإيدك وبمجهودك الشخصي ومش محتاج لواسطة ولا لـ "زقة" ولا لأي حاجة من اللي بتحصل وبيتكلموا عنها انها قال ايه بتحصل عندنا في البلد , خلي شعارك انت تقدر تكون نفسك .
عشان تكون غني محتاج لخطوات بسيطة تمشي عليها بس الإتقان والتفاني في العمل فوق كل شئ..
-اولا: تدور على فكرة تقنع بيها اللي قدامك انك محتاااااااج ....
انا كونت مجموعة أفكار عشان اللي مش عايز يفكر، الناس اللي عايزين يكونو أغنياء على طول، أظن مفيش حاجة أسهل من كدة ... بس طبعا مش هقولها لكم عشان اللي بيتعب بيلاقي وكدة أنا اكون بدعوكم للفشل ودة ميصحش...
-ثانيا: تختار المكان الصح !
ودة ممكن اشرح لك تختاره إزاي بما إني عارف كل حاجة عن أنك "كيف تكون غني ؟ " لأني أنا اللي بكتب أصلا...
هتختار المكان ازاي ؟؟ المكان مش لازم يكون له مواصفات محددة اهم حاجة انه يكون فية ناس واظن ان مفيش في مصر اكثر من الاماكن اللي فيها ناس وكدة انت اخترت المكان وبكل سهولة.
-ثالثا: اللباقة في الكلام ..
ولباقتك في الكلام دية مش محتاج انك تروح لدكتور نفسي قوي ولا لخبير تنمية بشرية ممتاز ولا لأي حاجة من الحاجات اللي بنسمع عنها دية.. انت محتاج انك تتفرج علي افلام عربي من بتوع اليومين دول.
محتاج تتابع المواقف اللي بتحصل حواليك وانت في المواصلات وانت في الشغل مع "المديرين" ها "المديرين" اظن فهمتوني يعني وبكدة هيكون عندك اللباقة الكاملة باذن الله.
-رابعا: تبدأتختار الناس اللي هتقنعهم انك محتااااج ..
وطبعا انا قولت "هتقنعهم" مش "هتحاول" تقنعهم ليه؟؟
لأنك اكيد مش بعد ما جبت الفكرة اللي تقنع بيها الناس, واخترت المكان, وبقيت لبق طبعا زي ما قلنا هتفشل !!
دة أنا شخصيا ممكن ادخل في حالة اكتئاب لو عملت الخطوات الثلاثة اللي قلناهم دول أكيد ربنا مش هيخزلك للي قدامك وهينولك اللي في بالك وهنيالك يا فاعل الخير والثواب...
-خامسا: انك تكون مبتكر.. think out the box
يعني لو انت في رمسيس مثلا هتبدأ تقول انك رايح مدينة السلام والفلوس وقعت منك ومحتاج خمسة جنية؟؟؟
عملت كدة ولقيت الموضوع ماشي اوعى تثبت على مدينة السلام ابعد المسافة وزود الفلوس ..
قول انا من اسكندرية وعايز اسافر والفلوس وقعت مني وعايز ثلاثين جنية , اعمل فلاح, اعمل ابن ناس , اعمل غلبان, ابتكر, اشتغل على نفسك وزي ما قلنا شعارك انت تقدر.
-سادسا: اوعى تحسس اللي قدامك انك شحات...
يعني لو ما اخدتش اللي انت عايزه منه , بص له بقرف , كلمه بتناكة انت مش محتاج انسانية ولا محتاج شفقة , انت محتاج لإنك تكون غني انت عندك هدف ولازم تحققة!!
-سابعا: واخيرا وليس اخرا اوعي تندم لما يتقال عليك شحات..
انت مبدع مبتكر، في مدة مش هتزيد عن سنة هتكون غني هتكون من الناس اللي بتدي للشحاتين..
هتكون شحات في نظر المجتمع بس معاك فلوس اللي هي كل المجتمع بيدور عليها , اللي بيسرق , واللي بينصب , واللي بيجتهد.. واللي واللي واللي وكل على شاكلتة الموضوع.
بإختصار عمل زي اللي مش لاقي شغلة وقرر يشغل نفسه ويختار لنفسه شغلانة , زي الناس اللي وانت بتركن تقول لك عجلة يمين يا باشا , وانت اصلا عربيتك بالقسط ويا دفعت يا مدفعتش , وهو يكون في جيبة مش اقل من 200 جنية فضة ولازم تقدر تعبه بردة وتديله خمسة جنية عشان اقل من كدة متبقاش تركن هنا ثاني !!
واللي جاي من طنطا وعايز يسافر والفلوس وقعت , واللي ممكن يسيب لك موبايل رهن وانت تحرج فتديله وتقول له "اوصل بلدك بس" واللي في المترو ومعاه إشاعاته , واللي في الشارع ومعاة اولاده , واللي مقعد بنته / ابنه وقدامه كتاب بيذاكر فيه في عز الثلج عشان بردة يجيب رزقه, منهج غلط اتجاهات غلط ..
الناس دية بتعمل كام في اليوم , الناس دية بتودي الفلوس فين , اكيد اللي بيجي سهل بيروح سهل..
بس لما "تصعر خدك للناس" يعني تشحت بأي شكل من الأشكال مسكنة , شياكة , نصب , أدب أشكال كتير أوي في الآخر اسمك شحات.. -عذرا لقد انهمكت مع الكثير من الحالات، ومن النادر أن اؤمن بأحدهم وشاهدت الكثيرين منهم وهم يجنون الكثير من المال أريد إجابة, من المسؤول عن هؤلاء ؟؟
هل هم مسؤولون عن أنفسهم ؟؟
البلد ؟؟
البيئة المحيطة ؟؟