«نوجا أحلى نوجا».. أغنية أطفال تشعل مواقع التواصل .. فيديو

أشعل مجموعة من الأطفال المتحمسين مواقع التواصل الاجتماعي بأغنية اتسمت في أدائها بعفوية الأطفال ونقاء أدائهم، وتداولت تلك الأغنية تحت عنوان «نوجا نوجا أحلى نوجا» وجاءت كلماتها كالاتي:-

نوجا نوجا أحلى نوجا
خُد يا عمو منِّي نوجا

نوجا سال الشهد فوقها
زوَّقوها بفول سوداني
راح تزقطط لو تدوقها
لو تدوق هـ تقوللي تاني

نوجا نوجا أحلى نوجا
خُد يا عمو منِّي نوجا

دا الحكيم يكتب روشتَّة
والعليل يفضل يعاني
واللي ياخد منها حتَّة
م الفرح يكتب أغاني
غنوة للكفّ اللي شالها
غنوة للحِسّ اللي نادى
مش هـ تشبع مِن جمالها
حد يشبع م السعادة

نوجا نوجا أحلى نوجا
خد يا عمو منِّي نوجا

ليه يا عمو تكون مِكشَّر
والفرح موجود معايا
إنتا بس يا عمو أشَّر
قول لحزنَك لأ كفاية
قوللي نوجا هاتلي نوجا
تلقى للأحزان نهاية

نوجا نوجا أحلى نوجا
خُد يا عمو منِّي نوجا

أتبيعُ الحلوى يا ولدي
مَن غيرُكَ كانَ ليأكلَها
مَن غيرُكَ كانَ ليأكلَها
لولا مهزلةٌ في بلدي

يا مثلَ الوردِ البريّ
كُلْها أنتْ
يا أطهرَ مِن أيِّ نبيّ
كُلْها أنتْ
يا أحلى مِن أحلى نوجا
كُلْها أنتْ
ملعونٌ مَن يأكلُها
غيرُكَ أنتْ

.........................
كلمات وألحان: أنطونيوس نبيل
(الفصحى للعظيم الراحل: نجيب سرور)

توزيع: وليد ميمني

اشترك في الغناء:
يوسف عمرو سعد
ريم نسيم

جيتار: مصطفى أصلان
أكورديون: وائل النجار
كولا: محمد عاطف
قانون: وليد حسن
هندسة صوت وماستر:
ميشيل عبد الملك
مونتاج وجرافيك:
هيثم عزت