نجلاء عياد تكتب : المحب على من يحب صبور

اللي هي مفيش طرف قابل للتاني كلمة حتي لو بسيطة هتقلب بحرب وثورة بين الطرفين ، علشان كده لازم طرف يغمض عينه ، يعمل نفسه مش واخد باله ، يعمل زي ما بنقول من بنها ، يعمل برأي الشاعر اللى بيقول " ليس الغبي بسيد فى قومه ولكن سيد قومه المتغابي " يكون عاقل بالشكل الكافي اللي يسمحله انه يتجاوز عن الكلام القاسي ويغمض عينه عن المواقف اللي ممكن حرفيا تنهي العلاقة ، مينفعش الكبرياء او الغباء يسيطر علي الطرفين مهما كان والا هتبقي علاقة مرهقة ومش هتكمل ، وطبعا مش معني إن في طرف ذكي وعرف يحتوي الامر انه مبيحسش او حجر وهيتحمل ، كل إنسان له طاقة وقوة تحمل ولازم تبقي العملية مشتركة والا الطرف اللي بيتحمل دا هيقع مرة واحدة وهيفقد طاقته وذكائه فالتعامل مع الامر ، كمان لازم تتعاتبوا ولازم تفهموا إن العتاب دا معناه إن الشخص اللي بيعاتبك باقي عليك ومتمسك بيك وبيحبك ، لأن اللي بيكرهك عمره ما هيعاتبك ومش هيهتم لامرك نهائي ، لأنك مش فارق معاه أصلا ، العتاب حب ومودة بس كمان كتر العتاب واللوم بيولد القسوة وفقدان الثقة في العلاقة ، ببساطة شديدة جدا العتاب سلاح ذو حدين .. قلة العتاب ممكن تخلق حالة كراهية ولا مبالاة ، والعتاب الكتير ممكن يخلق حالة من القسوة واللا مبالاة برده ! فخدوا بالكوا وخليكوا فالوسط خير الامور .
ممكن نقول برده إن أصعب نهايات العتاب اختصرته الست ام كلثوم في مقطعين من اغنيتين من اعظم اغانيها..

الاولي وهي بتقول لحبيبها في اغنية فات المعاد :
"ياما كنت أتمني اقابلك بابتسامة او بنظرة حب او كلمة ملامة"

والتانية لما قالتله في اغنية ظلمنا الحب :
" ﺍﻧﺎ ﻭﺍﻧﺖ .. ﻧﺴﻴﻨﺎ ﺣﺘﻰ ﻧﺘﻌﺎﺗﺐ ﻭﻧﺘﺼﺎﺭﺡ ﻭﻋﺰ ﻋﻠﻴﻚ ﺗﺴﻴﺐ ﺍﻟﻌﻨﺪ ﻭﺗﺴﺎﻣﺢ ﻭﻋﺰ ﻋﻠيا ﺍﻛﻮﻥ ﺍﻟﺒﺎﺩﻱ ﻭﺍﺗﺼﺎﻟﺢ ، ﻭﺍﺻﺒﺢ ﻛﻞ ﻳﻮﻡ ﺑﻴﻨﺎ ﻳﻔﻮﺕ ﺍﺻﻌﺐ ﻣﻦ ﺍﻣﺒﺎﺭﺡ ، ﻧﺴﻴﻨﺎ ﺍﻧﻨﺎ ﺍﻟﻌﺎﺷﻘﻴﻦ ، ﻗﺴﻴﻨﺎ ﻭﺍﺣﻨﺎ ﻣﺶ ﺩﺍﺭﻳﻴﻦ ، ﻧﺴﻴﻨﺎ ﺍﺯﺍﻱ ﻛﺪﻩ ﻧﺴﻴﻨﺎ ، ﻭﺍﻳﻪ ﺩﻩ ﺍﻟﻠﻰ ﺟﺮﻯ ﻟﻴﻨﺎ .. ﻭﺿﺎﻉ ﺍﻟﺤﺐ ﺿﺎﻉ ..ما بين قلب وقلب ضاع"
نجلاء عياد