ملاهي الغلابة على قد الإيد.. كيف يفرح الأطفال بـ 5 جنيهات فقط؟

علي مساحة لا تتعدي 200 متر لقطعة أرض فضاء، قام الحاج علي محمد، بإنشاء ملاهي لألعاب الأطفال، مقابل 2 جنيه لـ اللعبة الواحدة، بأحد شوارع شبرا، بعض تلك الألعاب مستعملة وتبدو "قديمة"، وبعضها حديث الاستعمال، ويتراص قرابة 3 ألعاب داخل تلك القطعة.

أرض مستأجرة
يقول الحاج علي، إنه قام بتأجير قطعة الأرض من صاحبها، وكانت في البداية تستخدم مقلبا للقمامة، ثم تواصل مع أحد أصحاب ورش الألعاب الترفيهية "صنايعي حداد في المرج الجديدة، معروف عنه أنه شغال على صناعة ألعاب الملاهي، منها لعبة العجلة اللي اشتريتها منه ولعبة الأطباق، وكلها ألعاب مصنوعة من الحديد وبقوالب من الفيبر جلاس.
يقول "خليته يعمل لي لعبة على شكل حصان ولعبة على شكل فنجان ولعب بأشكال كارتونية، وكلها بألوان زاهية وجديدة ورسوم الأطفال بيحبوها، وكلها ألعاب شغالة بالكهرباء".

بخمس جنيهات
"دي ملاهي الغلابة، الأب بيكون عاوز يفرح ويفسح ابنه، ولو بخمسة جنيه يلعب الثلاثة ألعاب، وفي لعبة بجنيه ولعبة بجنيهين وفي لعبة بثلاث جنيهات، ودي مش ملاهي مول ولا حدائق، دي ملاهي شعبية، المكان يادوب فيه لعبة الحصان والفنجان وكراسي السلاسل".

أسعار الألعاب
وحول تكلفة تلك الملاهي يقول "كراسى السلاسل سعرها حديثة حوالي 50 ألف جنيه، أما لعبة الفنجان اتكلفت حوالي 25 ألف جنيه، ومثلها لعبة الحصان، والصنايعي اللي عملهم، بيجي كل فترة يتأكد من الوصلات والأمان للألعاب، ويتم دهان الألعاب اللي محتاجة دهان وتركيب دوائر كهربائية جديدة".

ويتحدث صاحب الملاهي "نفسي أجيب كام عربية صغيرة للأطفال، ولكن سعر العربية بالكهرباء غالي، والأرضية بتاعتها مكلفة بتعدي 100 ألف مقابل 3 عربات والأرضية والدوائر بتاعتها".

تجديد وصيانة
"دى بيتعاد دهانها وصيانتها وتركيب دوائر كهربائية جديدة، وبيعها لأصحاب الألعاب السريحة بالقرى والنجوع".


يضيف: "وبعمل ألعاب غير كهربائية زي ألعاب الفنجان والقطار والزحليقة والمراجيح والمرجيحة السلسلة، وأسعارها تبدأ من 10 آلاف، ولا تتعدى 20 ألف جنيه".

سر المهنة
وتابع "صناعة الألعاب تعتمد على تصميم اللعبة وهو دورى، والعمالة نادرة، لأن الشغل يدوي وأغلب العمالة بقوا يسوقوا توكتوك بدل الشغل الشاق، من فورمات وصب وحدادة"

سبل الأمان
وحول سلامة الألعاب "اللعبة عمرها ممكن يكون أكثر من 20 عاما، والأهم الصيانة كل 3 شهور، وأنا بمر على كل اللعب وبتأكد من سلامتها وقطع غيارها ووصلاتها، وأوقات بشتري لعب ملاهي قديمة خردة وأقوم بتجديدها من الحواف والحبال والكابلات والروابط بشكل آمن، وبيعها لأصحاب الملاهي الشعبية".

إقبال الأهالي

حالة الألعاب داخل الملاهي، تبدو متهالكة، ورغم ذلك لا يمنع هذا الأهالي من اصطحاب أطفالهم داخلها "العيال نفسهم يفرحوا، والملاهي قدامنا، وسعرها على قد الإيد، لأن مش معانا فلوس للملاهي الأخرى اللي في الحدائق أو المولات".. يقول أحد الآباء وهو برفقة طفليه للعب داخل الملاهي الشعبية.

وتابع "عشرة جنيهات للطفلين عشان يلعبوا والملاهي جنب البيت، وكل أسبوع بجيبهم يفرحوا ويلعبوا لعبتين، بتفرق معاهم".