يوم الكساء.. دكاكين الفرحة لتوفير ملابس العيد لغير القادرين .. صور

"يحط الهدوم علي السرير و ينام عالارض .. فرحة الطفل بلبس العيد ما تتوصفش.. فرحة الطفل بأي حاجة جديدة متتوصفش ..طب اللي مش قادر يجيب لبس العيد.. طب اللي عمره ما جاب حاجة جديدة .. اليوم اللي بنستناه عشان نشوف فيه حصيلة تعبنا طول شهر رمضان في فرز ونقل واتصالات و مكوى ونكون جزء من فرحتهم عشان فرحتهم فرحتنا".. حسبما أعلن مسؤلي مبادرة الكساء عن سعيهم لتوفير ملابس العيد للأطفال غير القادرين علي شراء ملابس جديدة، ومساعدة 600 طفل لتوفير ملابس العيد

كساء فيصل

فيما أعلنت مجموعة يوم الكساء بمنطقة فيصل عن سعيها لتوفير ملابس العيد لقرابة 1000 طفل "لن تنالوا البر حتى تنفقوا مما تحبون.. فى شهر رمضان الأعمال الصالحة فيه بتكون أجرها عظيم و من أجمل الأعمال دى هى مساعدة محتاج أو فك كربة عن مكروب أو حتى إدخال السرور على قلب مسلم..لو كنت فى إمتحانات أو مش فاضى طول رمضان أو حتى طول رمضان بتعمل خير و عايز تزوده يبقى مهم جدا تبقى جزء من أبطال يوم الكساء الذين يرسمون الفرحة على وشوش الناس قبل العيد.

كساء مدينة نصر

أما حركة كساء مدينة نصر، فهي من أكبر الأحداث التطوعية و اللى بيقوم على إيصال الملابس لحوالي 2500 أسرة فقيرة مجانًا بمناسبة العيد، بالاضافة لحفلات الأطفال يتم تنظيمها يوم الكساء "متفوتش يوم زى ده و خليك جزء من حكاية أبطال يوم الكساء ..تابعونا عشان تعرفوا أكتر عن تفاصيل اليوم و مكان الكساء..حجز الأن تكت يوم الكساء من نشاط معارض ملابس دخلى.. كل كساء يشهد علينا وري المحتاج ساعينا وعشانه كتير شقينا..ساعد فتسعد".

2500 أسرة

وتابع مسؤولي الحملة"عندك فرصه تقدر تفرح الناس دي بكسوه العيد يوم الكساء، لناس كتير جدا مش قدرتها تجيب لبس عيد او لبس جديد، وعن أبي هريرة رضي الله عنه أن النبي صلى الله عليه وسلم قال:" من فرج عن أخيه المؤمن كربة من كرب الدنيا فرج الله عنه كربة من كرب يوم القيامة، ومن ستر على مسلم ستر الله عليه في الدنيا والآخرة، والله تعالى في عون العبد ما كان العبد في عون أخيه.. مستنينكم تشاركونا في اكبر ايفنت لتوزيع ملابس جديدة لحوالي 2500 أسرة".


جمع التبرعات

وتابعت نجلاء محمد، أحد المشاركين، في حملات يوم الكساء أن "من سنتين قررنا يكون لينا بصمة ثانية غير الملابس ، جربنا في فكرة لم التبرعات و في رمضان السنة قبل اللي فاتت بفضل الله وزعنا 500 شنطة غذائية والسنة اللي فاتت وزعنا أكثر من 800 شنطة وشوفنا فرحة الناس بيهم كانت كبيرة اوي وهما مروحين بشنطة الاكل والملابس مع بعض..السنة دي هدفنا بقي أكبر و حبينا نزود التجارة مع ربنا ونزود عدد ملابس للاطفال وقررنا نعمل اكتر من 2500 طقم عيد للاطفال.

"طبعا عدد زي ده محتاج تكاليف واحنا عارفين ومتأكدين ان زي ما عملناه السنة اللي فاتت واللي قبلها هنعمله السنة دي أن شاء الله، واثقين ان كل حد فينا هيقدر يعمل اللي يقدر عليه عشان يجمع اكبر كم من التبرعات عشان الناس اللي محتاجها، وبدأ عدد كبير من الشباب في التفاعل ،وبدأنا في تجميع الملابس المستعملة، وفي مصانع ملابس تعطينا لتوزيعها مجانًا، حتى وصلنا الآن إلى 3000 قطعة"...تقول نجلاء.

مهمة عظيمة

فيما كشف محمد مصطفى، أحد المتطوعين "حرفيا دا احلي كساء بنظمه وعدد المشاركين والمتبرعين كثير للغاية، ومتعة تنظيف وكي الملابس وتنظيمها وعرضها مهمة عظيمة وتدخل الفرحة لقلوب الاسر والاطفال المحتاجة..شكرا لكل حد تعب عشان اليوم يطلع.. وسبب في فرحة اكتر من 2500 فرد"

فرحة الأسر
وتايع "ادخال السرور هدفنا، و فرحة الأسر بالهدوم، فرحه لينا قبل متكون فرحه ليهم احنا نازلين نفرحهم و نفرح معاهم ..احنا نازلين عشان احنا الي محتاجين الثواب.. و متقللش من دورك في اليوم مهما كان كلنا هنشارك في الأجر والثواب بإذن الله".

صندوق تحيا مصر

كما وزع صندوق "تحيا مصر" 20 ألف قطعة ملابس جديدة على الأسر الأكثر احتياجا في 7 محافظات، من خلال بنك الكساء المصري و 11 جمعية أهلية، بمناسبة قرب حلول عيد الفطر المبارك.

دكان الفرحة

جاء ذلك في إطار تنفيذ مبادرة (دكان الفرحة) والتي وفّر من خلالها الصندوق 250 ألف قطعة ملابس جديدة من مساهمات عدد من مستوردي ومصنعي الملابس الجاهزة، لتوزيعها على الطلاب الأولى بالرعاية بمختلف الجامعات والأسر الأكثر احتياجا مجانا.
وقال المدير المالي والإداري للصندوق تامر عبدالفتاح "نسعى لإدخال روح البهجة على أكبر عدد من الأيتام وأسر السجينات وغيرهم من الفئات الأكثر احتياجا خلال عيد الفطر المبارك"، لافتا إلى أن مبادرة (دكان الفرحة) نجحت في توفير 52 ألف قطعة ملابس لنحو 22 ألف مستفيد منذ إطلاقها.