منى هلا قبل إتمام عامها الـ36: مش هنفخ و لا أشفط أي جزء في جسمي

نشرت الفنانة منى هلا  عبر حسابها على " إنستجرام" صورة لها أثناء تصوير مسلسل ليالى الشمال فى مدينة هالمستاد بالسويد، وظهرت من خلالها بشعر قصير، واختارتها للإحتفال بعيد ميلادها الـ36.

وعلقت:"فى أكتوبر السنة دى هكمل ستة و ثلاثين سنة، شعرى قصير و مش هصبغه لو بقى أبيض كله ، مبحبش البس ماركات و مش فارق لى، عندى تجاعيد فى قورتى و حوالين عنيا و عاجبنى.

وتابعت:" مش هنفخ و لا اشفط أى جزء فى جسمى ، مش مهتمة أبقى راكبة عربية و لا عندى رصيد كام فى البنك و لا ساكنة فى بيت شكله عامل ازاى و لا ماسكة تليفون شكله حلو ، مش راضية بالتقسيمات الجندرية و لا بتصنيف البشر وفقا للعرق أو الجنس أو الدين أو لون البشرة ، مش موافقة على الرأسمالية و اللى بيحصل للبشر و للعالم من وراها، مش فارق معايا مين بيقول عليا ايه و مين شايفنى ازاى .

وأضافت:" و مش راضية عن المقاييس العالمية التافهه اللى بقت تتحط للجمال و ربطه بالمكياج الصارخ و عمليات التجميل و الماركات الغالية... رأى أى حد فيا أو الناس شايفنى إزاى ميهمنيش أهم حاجة إنى شخص بيحترم و بيحب نفسه زى ما أنا، القواعد الزائفة اللى بتحرك الناس دلوقتي لا تعنى لى فى شئ و كل ما بكبر فى السن كل ما أرفض استغلال الطبيعة و كل المخلوقات الأضعف منى لذلك بحاول على قد ما أقدر أحافظ على البيئة و مأذييش الأضعف لانها دايرة و هتيجى ضدى اكيد و لان هو ده الأبقى مش أى حاجة تانية، اللى صورنى الصورة دى سليمان سيف أثناء تصوير مسلسل ليالى الشمال فى مدينة هالمستاد بالسويد.