النص الكامل لـ تحقيقات اسجد للكلب.. النيابة: تنمر وإحداث تمييز بسبب الدين والعقيدة.. الطبيب: أنا بهزر والممرض يفجر مفاجأة

صدى البلد ينشر نص تحقيقات واقعة اسجد للكلب
النيابة العامة: خيري متهم بإحداث تمييز بسبب الدين والعقيدة
عمرو خيري أمام النيابة: بشتغل من سنة 1985 في الطب
الطبيب المتهم يسرد تفاصيل فيديو السجود في عيادة العظام
الممرض المجني عليه: مكنتش أعرف إنهم واقفين يصوروني
الممرض عادل سالم: أنا خفت على أكل عيشي وسمعت كلامهم

جدل واسع أثارته واقعة اسجد للكلب.. وتضمن نص تحقيقات القضية رقم 13401 لسنة 2021 جنح النزهة، والمتهم فيها عمرو خيري "طبيب بشري" والمعروفة إعلاميا بـ واقعة طبيب اسجد للكلب، تفاصيل مثيرة جاءت على لسان المتهم عمرو خيري والمجني عليه الممرض عادل سالم.

- نص اتهامات.. إحداث تمييز بسبب الدين والعقيدة

وخلال التحقيقات، وجهت النيابة العامة للمتهم عمرو خيري في وجود المحامي الخاص به، اتهامات قيامه بالتنمر وآخرين على المجنى عليه عادل سالم بأن استغل سلطته عليه كونه مساعدا له بالقسم الطبي محل عمله، بأن وجهوا إليه عدة عبارات من شأنها وضعه موضع السخرية وطلبوا منه تأدية حركات من شأنها وضعه في موضع سخرية، وقاموا بتصوير الواقعة باستخدام هاتف نقال وكذا استعراض القوة والتلويح بالعنف والتهديد ضد المجني عليه عادل سالم وتخويفه وإلحاق أذى مادي ومعنوي به وكان من شأن ذلك الفعل إلقاء الرعب في نفس المجني عليه وتكدير أمنه وسكينته.

كما وجهت النيابة للمتهم عمرو خيري وآخرين احتجاز المجني عليه عادل سليم دون أمر أحد الحكام المتخصصين بذلك وفي غير الأحوال التي تصرح فيها القوانين واللوائح بالاحتجاز وكذا سبه بأن وجه المتهم عمرو خيري اليه عدة عبارات من شأنها خدش شرفه واعتباره، وكذا الاعتداء على المبادئ والقيم الأسرية في المجتمع المصري وانتهاك حرمة الحياة الخاصة بان نشر المقطع التصويري الخاص بالواقعة على مواقع التواصل الاجتماعي وكان ذلك بغير رضاء المجني عليه عادل سالم، وانشاء حساب خاص على شبكة المعلومات الدولية بهدق ارتكاب جريمة وكذا القيام بعمل كان من شأنه إحداث التميز بين طائفة من طوائف الناس بسبب الدين والعقيدة وترتب على هذا تكدير السلم العام وكذا حيازة سلاح أبيض عصا خشبية في أماكن التجمعات.

- اعترافات عمرو خيري.. بشتغل من سنة 1985 في الطب

واستمعت النيابة خلال التحقيقات لاعترافات المتهم عمرو خيري محمود عبدالعزيز، 59 عاما أستاذ جراحة عظام بكلية الطب جامعة عين شمس، والذي نفى الاتهامات الموجهة إليه، وقال المتهم عمرو خيري، خلال التحقيقات، أنا متزوج منذ عام 1991 ولدي ابنتين الأولى اسمها يارا عندها 27 سنة والثانية اسمها شهد عمرها 25 سنة، وحصلت على بكالوريوس طب وجراحة من جامعة عين شمس عام 1985، ماجستير في جراحة العظام من جامعة عين شمس عام 1988، و دكتوراه جراحة العظام من جامعة عين شمس عام 1991، وبشتغل استشاري جراحة العظام بمستشفى النزهة الدولي منذ عام 1989 وأستاذ جراحة عظام بجامعة عين شمس منذ عام 1985 ومستشفياتها «الدمرداش، عين شمس التخصصي، الطلبة، الميداني العزل بالعبور»، وأشغل حاليا رئيس قسم جراحة العظام بكلية الطب جامعة عين شمس.

واستطرد المتهم في التحقيقات، تدرجه الوظيفي قائلا: من سنة 1985 لسنة 1988 نائب قسم العظام بجامعة عين شمس ومن سنة 1988 مدرس مساعد حتى عام 1991 و من عام 1991 حتى عام 1996 مدرس بجامعة عين شمس ومنذ عام 1996 حتى عام 2001 أستاذ مساعد بجامعة عين شمس ومنذ عام 2001 وحتى الآن أستاذ بجامعة عين شمس، واختصاصي الوظيفي في جامعة عين شمس هي التدريس النظري والتدريب العملي للأطباء بالعمليات و مناظرة الحالات وإجراء التدخلات الجراحية المعقدة والإشراف ومناقشة رسائل الماجستير والدكتوره، وعن مستشفى النزهة اختصاصي الوظيفية هي مناظرة الحالات وإجراء التدخلات الجراحية والتعامل مع حالات الحوادث من الكسور والشرخ.

واستكمل المتهم أنا بروح جامعة عين شمس يوميا ماعدا الجمعة من الساعة 9 صباحا حتى الساعة 12 أو 1 ظهرا، وبروح مستشفى النزهة الدولي يوميا ماعدا الجمعة من الساعة 2 مساءا وحتى الساعة 4 مساءا ودي المواعيد الرسمية بخلاف مواعيد العمليات، مضيفا "اللى حصل ان أنا شغال طبيب في مستشفى النزهة الدولي، وعندي ممرض أسمه عادل بيشتغل معايا بقالة أكثر من 23 عاما وبحكم العشرة اللي ما بينا أخذنا على بعض، وبقيت بعامله زي صديق، وتعودنا أن بعد يوم العمل الشاق نهزر ونمزح مع بعض وناكل مع بعض ونصلي مع بعض، هو كان بيجي ليا البيت احيانا".

وتابع المتهم عمرو خيري، في مرة شايف الكلب بتاعي وقعد يلعب معاه ولما الكلب بتاعي مات أنا حزنت عليه جدا ولما عادل شافني حزين قالي أنت حزين ليه قلت له عشان الكلب مات وابتدى يهزر معايا ويمزح على حزني على الكلب، وفي مرة كان هو عندي في المكتب وعادل قعد يهزر معايا ويقولي أنت لسه حزين على الكلب وكان موجود في العيادة ساعتها السكرتير اسمه عمرو محمد رفعت والدكتور معتز مسعد جمال الدين وقعدنا نهزر مع عادل وخليناه يلعب رياضة ودي مش أول مرة وأنا كنت بصوره فيديو وهو بيلعب رياضة وبعد كده فوجئت أن الفيديو ده انتشر على مواقع التواصل الاجتماعي والناس قعدت تهاجمني بعد انتشار الفيديو ده واتقبض عليا النهاردة الفجر وجيت على النيابة النهاردة وهو ده كل اللي حصل.

تحقيقات واقعة اسجد للكلب .. الممرض: الدكتور اقترح يكهربوني

تحقيقات اسجد للكلب|الممرض: الدكتور طلب مني السجود.. وخفت على أكل عيشي

وقال المتهم عمرو خيري خلال تحقيقات قضية اسجد للكلب، موضوع الكلب بدأ بهزار عادل معايا قبل يوم الفيديو بحوالي أسبوع، وكان تقريبا الهزار يوميا لحد اليوم اللي صورت فيه الفيديو، وهو قبل ما أصور الفيديو كان بيفضل يقولي بهزار أنت زعلان عليه ليه هو أبنك، أنا ممكن اجيب لك 15 زيه من القلج وبعد ما الكلب توفي، جبت كلب ثاني وقعد يقول على الكلب الثاني أن هو هرب مني من الساحل، وأنا كنت بضحك وأستقبل الهزار بصدر رحب وساعات كنت بقولة بكرة يموت لك عزيز.

وسرد المتهم عمرو خيري تفاصيل يوم الواقعة، قائلا: "أنا كنت قاعد في المكتب في عيادة العظام في الدور الأرضي في المستشفى، وكان معايا الدكتور معتز مسعد جمال الدين والسكرتير عمرو محمد رفعت، وعادل دخل عليا مش فاكر أنا اللي بعت له ولا هو جه من نفسه، ومكنش في أي إتفاق بيني وبينهم كل اللي حصل أننا ابتدينا نهزر مع عادل".

- الطبيب يروى تفاصيل فيديو 10 دقائق بعيادة العظام

وأستكمل طبيب أسجد للكلب، قائلا: "أول ما عادل دخل العيادة كان بيهزر قالي أنا شوفت الكلب بتاعك في الجراج في العربية بتاعتك وشفته بيهرب من العربية، وأنا قعدت أقوله بهزار متتريقش على الكلب بتاعي كفاية أنك موت الأولاني وبعد كده ابتدينا نهزر معاه بأنه يعمل رياضة".

وتابع المتهم عمرو خيري في التحقيقات، أنا والدكتور معتز مسعد والسكرتير عمرو رفعت قعدنا نهزر معاه تقريبا أقل من 10 دقائق، بدأ الهزار بالكلام وبعدين طلبنا منه ينط 20 نطة بالحبل من غير ما يقف وأننا هنديله 50 جنيه، وجبنا سلك كهرباء، وعمرو السكرتير مسك طرف ومعتز مسك الطرف الآخر وبدأ عادل ينط الحبل وبعد كده خليته يحي الكلب وأنا كمان أديت التحية للكلب بس الكلب مكنش موجود كان هزار، وبعدين قولتله اعتذر للكلب ولو ما أعتذرتلوش هخليك تسجد له قالي لا مش هينفع أسجد له قولت له خلاص أديله التحية.

وأنا مكنتش أقصد أي حاجة، أنا بهزر بس وده تجاوز لفظي غير مقصود، أنا مسلم وحجيت بيت الله واعتمرت وقبل الواقعة كنت لسه مصلي جماعة، وعن أوصاف الأدوات المستخدمة قال خيري "سلك كهربائي لونه أبيض وكان حوالي 2 متر أو أكثر والعصايا الخشب كان لونها بني فاتح مسطرة خشب وطولها حوالي نصف متر تقريبا"، وعادل استجاب لينا عشان كنا بنهزر معاه، فأنا قولت أصور عادي عشان الهزار.

- الممرض استجاب خوفا على عمله

أجاب المتهم عمرو خيري على إقرار الممرض عادل سالم بأنه استجاب للطلبات والتصوير خوفا على عمله ولأنهم رؤساء بالعمل، قائلا: "الكلام ده مش مظبوط وهو كان يستطيع طلب نقله لأي عيادة أخرى مجاورة ومطلبش كده وساعات لما كان بيغلط وكنت بقوله هنقلك من العيادة كان بيسوق عليا كل اللي في المستشفى عشان منقولش ومرة اتنقل قبل كده وكان بيتحايل على الجميع عشان يرجع يشتغل معايا وفعلا رجع اشتغل معايا وأنا كنت محتضنة نفسيا وماديا وأسرية".

وأقر الطبيب عمرو خيري بقيامه بسب عادل سالم قائلا له بـ "ابن ..." وأيضا سب بلدته قائلا له "الأوساخ"، واعترف: "أيوه أنا قلت له كده بس أنا مقصدتش أني اسبه أنا كنت بهزر معاه وهو كمان كان بيقولي أن بتوع مصر الجديدة فرافير"، من حق المجنى عليه عادل أن يتضرر من مقطع الفيديو وأنا أيضا تضررت من نشره ومش أنا أصلا اللي نشرته، وكان باين جدا في الفيديو وهو بيضحك وبيهزر، وهو اللي دائما بيبدأ بالهزار وأسألوا كل الأطباء بالمستشفى، وأنا بيتهيألي أن عادل عمل كده من كتر الضغط عليه من المحيطين سواء من أهله أو من جيرانه".

وقال الطبيب عمرو خيري خلال التحقيقات: "أنا مبعتش الفيديو ده لأي حد نهائيا بأي صورة من الصور"، ومحدش شاف الفيديو ده غير اللي كانوا موجودين معايا في الاوضة واحنا بنهزر اللي هم عادل وعمرو ومعتز، لكني فوجئت بواحد اسمه أحمد يحيى شريف وشهرته أبو لؤي من الإسكندرية وواحد تاني اسمه محمد حسان من مرسى مطروح أنا معرفهمش نشروا الفيديو.

- طبيب اسجد للكلب يكشف عن محاولة ابتزاز من أجنبي بسبب مايوه

وتابع طبيب اسجد للكلب: "في شهر 7 الماضي حصل قرصنة على تطبيق الواتس اب بتاعي واكتشفت كده لما دخلت على الواتساب ولقيت كل الحاجات اللي عليه ممسوحة، تواصلت مع شركة واتساب عبر الإيميل وقولتلهم أن حصل قرصنة على الحساب بتاعي وقالولي هنرجعهولك بس الإجراء ده بياخذ أسبوع وبعد أسبوع فعلا رجعولي الحساب بتاعي وبعد ما الحساب بتاعي رجع بحوالي شهر تقريبا جالي مكالمة من دولة أذريبجان وحاولوا يبتزوني بصورة لبنت عمتي بالمايوه جابوها من على الواتساب وقالوا لي هنبعت الصوره دي لمراتك ومديتهمش فرصة يطلبوا منى طلبات وعملتلهم بلوك".

وأضاف الطبيب خيري خلال التحقيقات، لم أقم بتحرير أي محضر بشأن واقعة قرصنة تطبيق الواتساب، وده لأني تعرضت لواقعة سب وتشهير من أحد المرضى قبل كده عبر موقع الفيسبوك وروحت مباحث الإنترنت بالعباسية وعملت محضر لم يصل لنتيجة وبالتالي مروحتلهمش تاني لما تعرضت لواقعة القرصنة ولم استشعر بوجود ضرر قادم.

وأختتم طبيب اسجد للكلب قائلا: "أنا معرفش الشريف وأبو لؤي اللي قولت عليهم، إذا كان هما ليهم علاقة بواقعة قرصنة الهاتف ولا لا بس الناس دي أول ناس نشرت الفيديو على الفيسبوك"، ويمكن أكون صورت الفيديو ده بالكاميرا عبر تطبيق الواتساب بس أنا مش متذكر إذا كنت صورت بكاميرا الموبايل ولا بكاميرا الواتساب.

- الممرض المجنى عليه: مكنتش أعرف أن الدكتور عمرو بيصور

وقال الممرض المجنى عليه خلال التحقيقات: أنا بشتغل ممرض طوارئ وممرض عيادات العظام في مستشفى النزهة الدولي من حوالي 20 سنة، وبكون مساعد للطبيب اللي موجود في العيادة في حالة تغيير جبس أو تركيبه أو أي حاجة بيطلبها الدكتور، وده في الغرفة المخصصة للعيادة أو غرفة التركيبات.

وأستكمل الممرض المجنى عليه عادل سالم خلال التحقيقات: الفيديو اللي أتنشر ثابت فيه أنا وكنت لابس بدلة تمريض زرقاء وظاهر فيه المدعو عمرو رفعت وكان لابس أزرق وكمان سكرتير العيادة وظاهر في آخر المقطع دكتور معتز مسعد وهو كان لابس بالطو أبيض ودكتور عمرو هو اللي كان بيوجهلي الكلام والإساءات اللي في الفيديو ومش ظاهر في الفيديو خالص.

وتابع ممرض واقعة اسجد للكلب خلال التحقيقات، أن ما تم عرضه في الفيديو هو ما حدث بالفعل دون تحريف أو تعديل على محتواه، مشيرا إلي أنه تم التقاط الفيديو داخل مستشفى النزهة الدولي في عيادة العظام بالطابق الأرضي، منذ 6 شهور أو أكثر وأنه غير متذكر الفترة.

- المجني عليه يسرد تفاصيل الواقعة داخل عيادة العظام

وسرد الممرض المجني عليه ، في واقعة اسجد للكلب تفاصيل يوم الواقعة وتصوير المقطع الشهير، قائلا: "أولا كنت في الفترة دي شغال في عيادة العظام ، والشفت اللي اتصور فيها الفيديو ده كان الشيفت بتاع الدكتور عمرو خيري ، وهو إستشاري عظام، وكان قبلها كنت لقيت الدكتور عمرو حزين بصورة مبالغ فيها ، فسألته وعرفت منه أنه كان بيربي كلب والكلب ده توفي، وأنه اشتري واحد جديد بحوالي عشرين ألف جنيه ، فأنا أخذت منه الكلام وكنت بدردش مع دكتور معايا في المستشفى اسمه معتز على قبيل الدعابة، وقلت إن المبلغ ده كبير على كلب ميستاهلش وأن الإنسان أولى بالفلوس دي.

وأنا لو اخدته البلد عندي القلج وديته القرية اللي أنا منها ، الكلاب اللي بتقف على الترعة هتقطعه ومكنتش اعرف أن الكلام ده هيوصل للدكتور عمرو وهيزعله، وفي اليوم اللي اتصور فيه الفيديو بعد ما الحالات خلصت ، دخلت  الدكتور معتز للدكتور عمرو وقفلوا عليهم وكان معاهم السكرتير عمرو رفعت ، وبعدها لقيت الدكتور معتز بينده عليا وبيقولى كلم الدكتور عمرو فدخلت أشوف في ايه لقيت الدكتور معتز ، قفل الباب عليه من جوه وفضل واقف على الباب وابتدي الدكتور عمرو يعاتبني على الكلام اللي وصله وطلب مني الأفعال اللي ظهرت في الفيديو".

وتابع المجنى عليه في واقعة اسجد للكلب، الدكتور معتز مسعد ده مدير الطوارئ في مستشفى النزهة الدولي، وأنا كنت ملاحظ أن دكتور عمرو دايما زعلان وحزين وأنه اشترى كلب جديد بدل اللي مات بعشرين ألف جنيه فكنت بتكلم مع الدكتور معتز بحسن نية أن أنا مستغرب أن فيه كلي بالمبلغ ده وأنه زيه زي كلاب الشارع اللي بنربيها عندنا في البلد.

وأضاف الممرض عادل: " الدكتور معتز كان بيجاريني في الكلام اتاريه هيبلغ دكتور عمرو اللي أنا قولته، واللي أنا عملته ميستحقش العقاب اللي شوفته، وكان كلام عادي خالص ومكنتش اعرف أنه هينقله للدكتور عمرو ولا أعرف أنه ممكن يوصل لرد الفعل ده.

واستطرد: اللي حصل أن الدكتور معتز في اليوم اللي اتصور فيه الفيديو وبعد ما الدكتور عمرو خلص حالاته لقيت الدكتور معتز جاي من شغله وساب عيادة الطوارئ ودخل قعد مع الدكتور عمرو والسكرتير بتاعه وقفل عليه الباب، وأنا ساعتها كنت في الطوارئ بشوف شغلي.

وأضاف ممرض واقعة اسجد للكلب، خلال التحقيقات، استجب لما طلبه مني الدكتور عمرو خيري، والدكتور معتز مدير الطوارئ، لأني كنت خايف على أكل عيشي قلت مفيهاش حاجة لو نفذت الحاجات اللي بيطلبوها مني خاصة اني مكنتش اعرف أنهم بيصوروا، ومعرفش هما كانوا يمكن بيعملوا أيه لو أنا رفضت وأنا كنت خايف على أكل عيشي خصوصا أن الدكتور عمرو كان ماسك في ايده عصاية ويهددني بيها ولما مكنتش بكمل كان بيضربني، والفيديو أتصور من خلال تليفون الدكتور عمرو خيري، وأنا عرفت خلال الواقعة لكن لحظة دخولي الغرفة مكنتش أعرف أنه بيصور، لأنه كان ماسك التليفون في أيده لكن مش ظاهر هو بيستخدمه ولا بيصور.