قال ايه "اتجوز"

مش عارف اتجوز وده حال معظم الشباب واللى يفكر فى الجواز يبقى مجنون لإن ببساطة كدة علشان تتجوز يابرنس لازمك مش اقل من "نص مليون جنية "، وأكيد مبلغ زى ده الواحد بيسمع عنه فى الأفلام والمسلسلات بس لإنه بالعقل كده شاب لسه متخرج وفى بداية حياته هيجمع مبلغ زى ده ازاى إما "يشتغل حرامى مثلا " أو يشتغل ليل ونهار وفى الحالة دى ممكن الواحد يتجوز وهو فى " عز شبابه فى سن الــ60".
وكمان متطلبات الحياة كلها بقت اساسيات يعنى العربية والشقة التمليك والفرش من ارقى اماكن فى مصر والخطوبة والفرح طبعا فى فندق 5 نجوم نسيت خطوبة أمها" فوق السطوح" وطبعا العربية لإن المدام مش هتخرج بدون عربية " الله يرحم حمارة جدو"
استنى ده لسه فى مصاريف شهر العسل ومصاريف الولاده ولازم قبل الجواز نأمن مستقبل ولادنا "ده على أساس إنه يبقى فى أولاد فى الضغط النفسى ده قوينا يارب ".
انت مستعجل ليه لسه القايمة والمؤخر هما اه بيشتروا راجل اه بس " الراجل من غير قرش ميتناسبش ".
يلا همضى القايمة خلاص هتجوز بقى لاء لسه المؤخر لان ده طبعا اللى هيخلى حضرتك تحترم المدام ومتفكرش تطلقها ده طبعا " لان الفلوس تهدى النفوس " ده مؤخر صداق " طلاق ".
وفى النهاية رسالة لكل أب وأم فكروا بالعقل اللى عايز يمرمط بنتك مش هتمنعه الفلوس وممكن يكرهها فى عيشتها ويخليها تتنازل عن كل شىء لمجرد انها تخلص من الهم ده.
رسالة لكل أب وأم افتكروا نفسكوا زمان وانتم بتحاولوا تبنوا بيتكم كان نفسكم أد ايه الناس تساعدكم وتقف جنبكم او تسيبكم فى حالكم و تساعدكم بكلمة طيبة تحمسكم اكتر علشان تحققوا حلمكم وسهلوها شوية على الشباب يسهلها عليكم ربنا وفى النهاية لازم تفتكروا "خذوهم فقراء يغنيهم الله من فضله ".