البشارة... شعر : سعيد شحاتة

مش معاكي
بس مش
رافضين ملامح ضحكتك
ولا طول خطاكى
ما انت ماشيه
وكلّنا ماشيين بنتعكّز وراكى
لا انت شايفانا...
ولا احنا ف حلمنا شايفين سواكى
يا ابتسامه الأرض..
يا اللى النيل رواكى بتمرحنّه
القلوب الطيّبه..
مش لاقيه جنه ف ضفّتينك
القلوب الطيّبه
مش عارفه تستر نفسها بتوتك وتينك
القلوب الطيّبه بتحلف بدينك
إنك انتِ هتفضلى دايمًا يمينّا
حتى لو قلتِ إننا ماحناش يمينك
يا ابتسامة الأرض
يا بنت البنات الحور
يا أحلامنا القتيله
كلنا ماشيين بنتعكز...
على السكك الطويله
تضحكى نضحك بشدّه
وإن بكيتى
بنبكى من غير أى حيله
ما احنا أولاد السبايا السود
وأولاد المناهده
واحنا عشاق الحاجات المستحيله
واحنا حيط الصد فى وشوش الأعادى
واحنا سيف الرد والموته النبيله
واحنا ريحة الطمى ونصوص المعاهده
واحنا خُدّامك وخدام القبيله
يا ابتسامة الأرض يا بنت الخميله
القلوب عماله بتدبدب برجليها التقيله
القلوب عماله بتدبدب على البدن المسالم
القلوب عماله بتدبدب على الجتت النحيله
يا ابتسامة الأرض...
يا بنت الخميله المستحيّه
كلنا أحلام عفيّه
كلنا راسمين ملامحك
ع السما وع المشربيه
تؤمرينا الدنيا تضحك
تؤمرينا...
قلوبنا تتحول رصاص للبندقيه
تؤمرينا...
نبدّل الأحلام بدانه ومدفعيه
تؤمرينا بضحكتك...
نصبح وطن ونصير قضيه
يا ابتسامة الأرض
.يا بنت الخميله...
الغايبه عن عين الغلابه
فرحانين بدموع عنيكى
وانتِ شايلانا على كفوفك ولايم للديابه
وانتِ بتغنى لنا...
أوجاع الهلالى بدون ربابه
فرحانين بدموع عنيكِ...
وكلنا دايبين صبابه
فرحانين وأكيد هنفرح
لو دياب لم الزغابه
يا ابتسامة الأرض
يا بنت البلاد أم الضفاير
القلوب الصافيه...
مش جايبه البشاير
القلوب الصافيه...
مش جامعه العشاير للمصالحه
الشجر عطشان ووش الرمل كالح
الشجر عطشان وريحة الميه مالحه
والوشوش الفالحه بتضيع فى الزوايا
اللى بيدوس ع السكك.
بيدوس على جتت الضحايا
واللى واقف يروى سيرة الخضرا.
بيتوه فى الروايه
وانتِ بتعدى الحصا.
ف قلب الرحايا.
الدايره من غير أى لازمه
الكلام محتاج مَلازم
وانتِ عايزه قيراط بلازما
يا ابتسامة الأرض
يا أيتها أزمه ف أى حاره
كلنا ماشيين بنهتف...
خلف تجار الحضاره
كلنا شايلين على اكتافنا المحاجر
كلهم رابطين على قلوبنا الحجاره
كلنا واقفين بنستنظر ملامحك
زى ما واقفين بنستنى البشاره
يا ابتسامة الأرض...
يا بنت الملايه اللف...
يا ام العود زناتى
السما عصافير بتعزف
والقمر ضحكة ناياتى
السما أهازيج ملايكه
وضحكتك عود مزيكاتى
يا ابتسامة الأرض...
يا بنت الغيطان...
والغلّه والعنب البناتى
يا اللى ساحبانا على غمانا
لايد نخّاس فلاتى
القلوب
شبعت من الضرب اللى يوجع
زى ما شبعت من الفول الحراتى