سارة مجدي تكتب: 30 سؤال لازم تعرف إجابتهم قبل ما تفكر تتجوز!

لما بتقع في حب حد بتبتدي تسأله كل الأسئلة الشخصية و الوجودية الممكنة عشان بتبقي عايز تعرفه أكتر و حابب تعرف عنه كل حاجة ..معروفة !
بعد فقرة الأسئلة دي بتفتكروا إنكوا عرفتوا كل حاجة محتاجين تعرفوها عن بعض..
أسمحولي أصدمكم ..سواء بتعرفوا بعض من أسابيع ..شهور .. أو حتي سنين .. أول ما بتيجي لحظة
""تتجوزيني ؟"
الراجل و الست بيفكروا و بيسألوا نفسهم :
هو ده الشخص المناسب اللي حكمل معاه بقية عمري؟

"الوقوع في الحب سهل جِدًّا، و لكن البقاء في الحب صعب .. "
ليه؟
ببساطة، عشان ده بيحتاج قرار، التزام و اختيار منك ل نفس الشخص عشان تقع في حبه كل يوم!
عشان متروحش في يوم محكمة الأسرة و بلاش برضه تبقي عايش مع مراتك/جوزك اخوات (مش بعد الصبر ده تعيشوا اخوات ..ميصحش والله ( من الاخر عشان تبقوا في علاقة صحية .. هتحتاجوا كام حاجة بديهية حقولهم احتياطي ..
حب
مجهود مع الحب ده
كلام رومانسي (يا إما عيشوا اخوات )
تفاهم (لازم تعرفوا اختلافات بعض و تقبلوها )



الجواز هو أكبر قرار حتاخده في حياتك. (متتخضوش دلوقتي ! )
ممكن تكونوا مع بعض بقالكم فترة معقولة تخليكوا تفكروا في الخطوة الكبيرة دي ... وبالأخص الراجل لأنه هو اللي بينطق بالقرار ده من أول ما بيقول “تتجوزيني “!
و ممكن تكونوا عرفتوا بعض فترة و اتخطبتوا علطول و لسه بتستعدوا لخطوة الجواز..
أيا كان وضعك هنا ، في 30 سؤال تم تحديدهم علي مستوي العالم من خبراء و علماء نفس و Couple Therapist لازم تسألهم لنفسك و لشريك حياتك اللي أخترته قبل خطوة الجواز …
جاهز يابني ؟
جاهزة يا حاجة ؟
جهزوا كده كبايتين شاي و لب و تسالي و العبوا و اسألوا الأسئلة دي لبعض ..

ملحوظة مهمة قبل ما تبدأوا: ممكن متتفقوش مع بعض ..متتخانقوش..الاسئلة اللي جاية دي اتعملت عشان تخلق ما بينكم "شرارة “ من الصراحة و دي حتخليكم تفهموا بعض أكتر !
ملحوظة تانية :(اكيد اكيد تمت الترجمة مع وضع التتش المصري في ترجمة بس والله (

امتى أدركت/اتأكدت أنك بـتحبني؟
بتحب فيَّا ايه ؟
ايه الحاجات اللي بعملها بتحبها ؟
أنت حاسس إن احنا بنتخانق كتير ؟
لما أي حد فينا حيقفش علي تاني .. حيكون عندك الإستعداد تعتذر الأول؟
عمرك نمت/ي و انت زعلان مني ؟
شايفنا فين مع بعض ..كمان 10 20 سنة من دلوقتي؟
لو لقتني هادية و مش بتكلم وواضح إني زعلانة ..هتحاول تتكلم معايا ولا حتسيبني لوحدي ؟
لما تكون زعلان .. ممكن أعمل ايه عشان اسعدك و اخليك مبسوط ؟
ايه المشاعر اللي ممكن توصف احساسك بإنك حتتجوز/ي ؟
ايه الموقف اللي تتخيله ممكن يوصلنا ناخد قرار الطلاق ؟
في رأيك ... ايه اللي يخلي الجواز ناجح ؟
أنت عايز أطفال؟
نفسك يبقي عندك كام طفل ؟
عايز/ه بنات ولا ولاد ؟
ايه الحاجات اللي نفسك تعلمها لولادك ؟
ايه إحساسك تجاه التبني ؟
بتوفر/ي فلوس كل شهر ؟
قولي أكتر 3 حاجات بتصرف/ي عليها فلوسك ؟
في رأيك دخلنا حيبقي إنجليزي و كل واحد يصرف علي نفسه ولا مشترك ؟
هو أنا البيست فريند ؟ (حذرتكم من ترجمتي (
تفتكر لما نتجوز حنفضل أنا و أنت/ي "بيست فريندز “؟
هو أنت بتقضي وقت أكبر مع صحابك أكتر ما بتقضي وقت معايا ؟
هما صحابك شايفني إزاي / بيقولوا عليَّا ايه؟
أنت شايف إن "اتس أوكيه “ إن يبقي لينا صحاب من "الجنس الاخر “؟
حيكون رد فعلك ايه لو أنا و الإكس لسه صحاب؟
ايه الحاجة اللي بتعملها مع صحابك .. بس مش بتعملها معايا ؟
بتحب تعمل ايه لما يكون عندك وقت فاضي ؟
ايه الحاجه "الاكتفيتي “ ممكن نعمله مع بعض و نبقي مبسوطين و بنقضي وقت حلو ؟
انت بتشوف نفسك متدين ؟