EN 
لو بيديك فرصتك تزعل وتاخد على خاطرك منه بس بيخليك مطمن إنه مش هيوجعك أكتر ، مش هيقلب الترابيزه عليك ، مش هيدمر الأساسيات و الوعود اللي بينكم ، مش كل همُه يرد عليك بإيه علشان ميطلّعش نفسه غلطان..مش هيسيبك كده .. مش فاهم سواء في الخناقة نفسها أو مكانتك عنده.
مش بيندّمك إنك عاتبت ، بتقول إللي جواك براحتك ، مش بيجبرك تتضغط وتكتم جواك وتعيش معاه مكبوت لأن حييجي يوم وتنفجر.. و ساعتها اكيد حتخسروا بعض.
إنك تزعل وتعاتب و تنفعل وتغضب وتعيط .. بمنطق بعشم بحُريه .. ده معناه إنه غالي عندك ..
ولو هو مستوعب ومحتويك وبيطمنك .. فده معناه إنك غالي عنده أوي ..
رصيدك كبير .. عارف قيمتك عنده .. عارف يعني إيه يتعامل برحمة وبحب .. عارف يعني إيه إن الأمان والحرية هما أساس أي علاقة ومشاعر سوية..
مبيعرفش يعمل الدور ده غير إنسان واثق من نفسه أوي
..عاقل .. سلِس .. ذكي .. بيعرف يستشعر النعمة ويصونها.. إتعلم يعني إيه يقدّر ، يعني إيه إن في كلمه بتحيي وكلمه بتموِّت ، إنسان بيعرف يحب..
الحب والعلاقات الإنسانية وكل المشاعر محتاجة مجهود بحب...الوقت اللي حتلاقي نفسك بتدي و مش بتاخد الطاقة اللي جواك حتفضي..مش حيبقى حاجة جواك تديها...و ساعتها كل مرة كبت إحساسك حينفجر مرة واحدة..
فكر هتخسر إيه وهتكسب إيه قبل ما تقول أي كلمة وقبل الفعل ما يتعمل .. قبل ما تدوس وتطنش وتستهون وتقرر تبقى جاحد .. أو تشتري وتطيب خاطر إللي قدامك ..
وكلها قراراتك وكلها تراكمات وإنت إللي بتحدد وتختار ..
بعد أي خناقة سواء مع صديق أو حبيب بتحصل حاجة من الاتنين يا بتلاقي نفسك في وضع مبهم مش مفهوم وده لان الطرف التاني معبرش لا عن غضبه تجاه الموقف ولا عن حبه ف بيبقي الوضع كما هو عليه لا قربتوا ولا اتصافيتوا بجد و بتكون خسارة مؤجلة.
يا كل واحد بيتكلم وبيتسمع وكل ما سبق فوق و علاقتكم بتكون اقوي لأن كل واحد حُر بيقول اللي حاسه و لما تتناقشوا في سبب المشكلة بتتجنبوا تحصل تاني والود بيزيد لأنكم بتعبروا عن اللي جواكم لبعض..
اتكلموا و عبروا عن اللي جواكم حب / زعل قبل ما الرصيد اللي بينكم يخلص و مفيش كلام وقتها حيشفع ولا يتسمع.
