نيفين القباج: نبذل قصارى جهدنا لتحقيق أحلام أصحاب الهمم

حيت نيفين القباج، وزيرة التضامن الاجتماعي، ذوي الهمم قائلة: "أنا بحيي ولادي وولاد مصر وحبايبي .. وحبايب الرئيس السيسي اللي احنا لينا فيه قدوة .. وبحيي أمهاتهم، وقلبي معاهم، وسندي ودعمي ليهم بالكامل".

وأضافت نيفين القباج في مداخلة هاتفية مع برنامج "من مصر" المُذاع على فضائية" سي بي سي"، قائلة: " وبحييهم لقدرتهم على الصمود، وانهم بيحبوا جداً ومساندين لبعض .. والقليل يرضيهم، وعندهم استعداد للشغل والعمل، وعندهم طاقات كبيرة محتاجين نفتح لها الأبواب عشان نقدر نستفيد منها".

وأردفت وزيرة التضامن الاجتماعي: "احنا اللي بنتشرف بيهم، وخدمتهم في حد ذاتها شرف .. وحتى لو بيقولوا احنا مش عندنا صعوبات، احنا لسة مش راضيين عن نفسنا ومحتاجين نبذل جهد أكتر لأننا بنحلم بيهم بحاجات أحلى وأحلى".

وتابعت نيفين القباج: "نفسنا تبقى الدنيا سهلة ليهم، وكل اللي بيحلوما بيه يتحقق لهم كمواطنين .. واحنا مش هنسيبهم .. ده مش ذوقيات مننا لاء .. ده واجب وطني ومسئولية علينا .. ولو بنحب مصر بجد وبنحبهم هنقدر نبذل قصارى جهدنا عشان نقدملهم كل اللي بيحلموا بيه .. نفسنا نخلي كل حاجة جميلة، واحنا بنتعهد على ذلك".

وواصلت وزيرة التضامن الاجتماعي حديثها عن أصحاب الهمم قائلة: "أتمنى بس اننا في يوم نرضي عن أنفسنا ونقول احنا وفناهم".