EN 
قال الإعلامي محمد الباز، ان الدكتور محمد عثمان الخشت واحد من اساتذة الفلسفة المهمين في مصر وصاحب -إذا جاز التعبير- مذهب في الفلسفة، وصاحب جهود في تجديد الخطاب الديني.
وتابع "الباز"، في برنامجه المذاع علي قناة المحور: في ناس كتيرة زعلوا من المشهد اللي انتم شفتوه، وحاولوا يربطوا ما بينه وبين التعديلات الدستورية، وكأن الدكتور عثمان الخشت بيرشي الطلبة بـ 3 حاجات؛ اللي هي: 5% درجات الرأفة، واعفاؤهم من المصاريف في شهر رمضان في المدينة الجامعية، واللي مدفعش المصاريف هندفعهاله.
واضاف : أولًا لا علاقة لما فعله الدكتور عثمان الخشت بالتعديلات الدستورية، هو كان بيتكلم مع طلبة جامعة القاهرة وكان بيبلغهم بقرارات مجلس الجامعة، يعني اللي قاله الدكتور عثمان مش قراراه المنفرد ولكن هو قرار مجلس جامعة القاهرة، اللي النهاردة أصدر بإجماع أعضاؤه انهم بيدعموا الدكتور الخشت لأن الرجل لاقى هجوم، من المنصات المعادية، فظيع جدا، واستغلوا الحالة اللي اتكلم بيها في الإساءة لشخصه، فأول حاجة إن اللي قاله مش قراره وليس عطية من عنده للطلبة، ده قرار مجلس جامعة القاهرة.
وقال: إعفاء طلاب المدن الجامعية من مصاريف شهر رمضان، عاوز أقول لحضراتكم إن الطلبة يعرفوا قيمة ده كويس، واللي مدفعش المصاريف لحد دلوقتي الجامعة بتدفعهاله أو بتعفيه من المصاريف وال ٥% بتوع درجات الرأفة.
واضاف: شهر رمضان والإعفاء من مصاريف الدراسة ده بيكون من صناديق الجامعة، والدكتور عثمان لا هيديهم من جيبه ولا هياخد من الدولة فلوس يديهالهم ولكن من صناديق الجامعة والتبرعات، فالرجل على مستوى عمله كرئيس جامعة لم يخل بشيء ولم يخالف شيء ده رقم واحد.
وتابع: الحالة التي ظهر بها الدكتور محمد عثمان الخشت، ناس اعترضت إن ده رئيس جامعة القاهرة وإزاي يتكلم مع الطلبة كده ويقف على مسرح، لكن احنا مش عاوزين نعترف إن الدنيا اختلفت، يعني أنا في الجامعة وعارف، هل الطلبة اللي كانوا عندي وأنا معيد سنة 98 مش هما الطلبة اللي أنا ممكن ألتقي بيهم النهاردة في عاداتهم وتقاليدهم وفي أخلاقهم وفي طريقة تعاملهم، الناس مش عاوزه تدرك إن ده عصر الشعبوية .. القائد الشعبوي .. اللي الناس بتاخد وتدي معاه وتتكلم معاه .. ده قدر الناس اللي بيقودوا في هذا الوقت .. وبعدين هذه الطريقة المثلى اللي ارتآها الدكتور الخشت في التواصل مع الطلبة، بيقنعهم كده .. بيزف لهم القرار بهذا الشكل.
وقال: أنا أشهد الله بأن هذا الرجل يعمل لجامعة القاهرة مش هقول أكتر من رؤسائها السابقين ولكن بنفس قدر رؤسائها السابقين. وهقول لحضراتكم على حاجة، القرار بتاع إعفاء طلبة المدن الجامعية من شهر رمضان، الدكتور جابر نصار أخذه قبل كده، وإن الجامعة تعفي الطلبة من مصاريف الدراسة الدكتور جابر نصار أخذه قبل كده برضو.
وأوضح: ان مسألة درجات الرأفة اللغز فيها إن كان في كليات بتطبقها وكليات مبتطبقهاش. ولكن بقرار سنوي، والسنة دي صدر القرار بتعميم درجات الرأفة على كل كليات الجامعة.. رئيس الجامعة شايف إن في طالب ممكن يشيل السنة على درجة واحدة فياخد الدرجة ويتخرج، إذًا هذه القرارات هي قرارات جامعية اتخذت قبل ذلك واتخذت هذا العام، ومكنش في تعديلات السنة اللي فاتت علشان تتعمل القرارات دي .. ومكنش الدكتور جابر نصار بيوجه الطلبة اتجاه سياسي معين أو بيرشيهم بهذه القرارات، هذه القرارات في جامعة القاهرة الجامعة العريقة.
واضاف : أنا الحقيقة أجدد ثقتي في هذا الرجل الدكتور محمد عثمان الخشت لأنه يجيد التعامل مع الطلبة ولو شوفتوا صفحته على الفيس بوك وإزاي بيتعامل مع الطلبة، في ناس ممكن تكش من الطريقة لأنه بيتبسط جدًا، وتبسط الدكتور محمد الخشت له قيمة لأنه ليس رئيس جامعة تقليدي، هذا أستاذ فلسفة وأستاذ فكر وله مذهبه ومنهجه ومنطقه لكن هو ارتأى إنه يتعامل مع الطلبة بهذا الشكل علشان يوصل ليهم .. واعتقد إنه على الأرض ناجح جدًا.
