EN 
تحدثت نهى أبو ستة خبيرة الإرشاد الأسري و التربوي عن كيفية إجراء حوار مع الأطفال، قائلة:" الحوار في سن المراهقة صعب جداً، خاصة لو مبنناش الحوار من السن الصغير،لأن الطفل في السن ده بيحس أنك تستجوبه، وأن أنت نفسك حاسس بعدم الأمان، وأنك مبقتش قادر تسيطر على حياته زي قبل كده، لأن بقى عنده أصدقاء، وأسرار، وبقى عنده خروجات لوحده"
وأضافت نهى أبو ستة أثناء استضافتها مع برنامج "صباحك مصري" المذاع على قناة " ام بي سي مصر 2"، قائلة:" هدفنا الأول من الحوار مش الاستجواب، مش أني أعرف عنه، وعن حياته، الهدف أني أفهم شخصيته، ايه الحاجات اللي بيحبها، و إيه اللي بيكرهها، وايه مواصفات الصديق بالنسبة له".
وتابعت:" هنبتدي معاهم الحوار بأن احنا نبدأ نتكلم في المواضيع الخاصة بينا ، يعني مثلاً ممكن، أقوله أنت عارف أني مكنتش واخد بالي، أن الحاجة الفلانية كانت بتضايقني وأنا صغير، فلما أتكلم عن نفسي، هحاول أجيب من الطفل المعلومات عن نفسه".
وأكملت: " المشكلة أن في المرحلة العمرية دي، الطفل بيحس انه عارف كل حاجه، ومحدش يقدر يعمله حاجه، ولا حد يقدر يضحك عليه، ولو أنت اتكلمت معاه، أنك أعلم منه، وأنه عيل صغير مش فاهم حاجه ، هتخسره".
