EN 
شهدت مدينة السنبلاوين بمحافظة الدقهلية واقعة مؤسفة إثر قيام سائق جرار زراعى بدهس سيدة أثناء سيرها بالقرب من كويرى السنبلاوين مما أدى لوفاتها.
"صدى البلد" التقت فى بث مباشر بأسرة المجنى عليها أمل بكر ٥٣ عاما، حيث قالت ابنتها: أنا عاوزة حق أمى من سواق الجرار اللي حرمنا منها، إحنا بنانشد النائب العام إنه يتدخل في القضية، واحد قتل أمنا دهسها ست مرات، الناس فضلت تصرخ وتقول له وقف وهو مستمر في الدهس.
وتابعت أمل: مش ممكن يكون إنسان، أمى كانت طيبة وكان نفسها تفرح بباقى إخواتي، إحنا أربعة اثنين اتجوزوا اثنين لسه ، وأبويا راجل مريض هي اللي كانت بتخدمه وبتعمل له كل حاجة.
وقالت شقيقة المجني عليها: أختي أمل كانت حنينة وطيبة، راحت مننا وحقها مجاش إحنا عايزين حقها، إحنا بناشد النائب العام إنه يفتح القضية ويجيب لأختي حقها من اللي قتلها، ده كان بيدهس فيها كأنها فرخة مش بني آدم، حسبي الله ونعم الوكيل هاتوا لنا حق أختنا وحق جوزها الغلبان المريض اللي هي كانت بتروح معه للدكتور لأنه بيغسل كلى وكانت بتربي أولاد ابنها اللي توفى من حوالي شهرين، أقول المسؤولين حق أختي أمانه في رقبتكم.
وقال نجلها الصغير: أمي طيبة وكانت بتحبني وأنا أصغر إخواتي أنا عايز حق أمي من سواق الجرار اللي حرمنا منها أمي كانت لسه معي عماله تطبطب عليا وتقول ليا هفسحك وأعمل ليك كل حاجة حلوة يا حبيبي ؛ ليه يحرمني من أمي ويحرم أبويا وغخواتي منها وأبويا راجل مريض بيغسل كلى وهي اللي كانت بتروح وتيجي معه أنا عايز حقها من سواق الجرار.
وكانت مديرية أمن الدقهلية كانت قد تلقت إخطارا من مركز السنبلاوين بوصول أمل بكر 53 عاما إلى مستشفى السنبلاوين جثة هامدة وذلك لقيام سواق جرار زراعى بدهسها أكثرمن مرة ؛ وكشفت كاميرا المراقبة قيام السائق بدهسها أكثر من مرة دون أن يستمع لصراخات ونداءات الحاضرين وحرر محضرا بالواقعة.
