بالنص.. تفاصيل حوار مرتضى منصور ومسئولى اتحاد الكرة ليلة 31 يناير

نشر  مرتضى منصور رئيس نادى الزمالك فيديو ما حدث فى اتحاد كرة القدم  فى الساعات الأخيرة قبل إغلاق باب القيد لفترة الانتقالات الشتوية 31 يناير الماضى ورفض مجلس الإتحاد قيد صفقات الزمالك الجديدة الثلاثى ناصر منسي القادم من البنك الأهلى والمغربي أحمد بلحاج القادم من أسوان ومحمود شبانة العائد من إعارة لنادى سموحة السكندرى .

وكشف الفيديو الذي نشره مرتضى منصور رئيس نادى الزمالك تفاصيل الحوار الذى دار بينه وبين محمد أبوالوفا عضو مجلس إدارة اتحاد الكرة ووليد العطار المدير التنفيذى للجبلاية والمستشار محمد الماشطة المستشار القانوني للإتحاد  فى حضور اللواء علاء مقلد  عضو مجلس الزمالك ومحمود خالد و محمود العسال المستشارين القانونيين لنادى الزمالك وأحمد إبراهيم مدير شئون اللاعبين بالفريق الأول لكرة القدم بنادى الزمالك فى محاولة لحل أزمة القيد وتقديم ضمانات سواء بشيكات بنكية أو استقطاع 10 ملايين جنيه من مستحقات الزمالك لدى شركة برزنتيشن الراعية للزمالك لصالح إتحاد الكرة وكذلك التنازل عن 300 ألف دولار المقرر حصول الزمالك عليها  نظير مشاركة نجمه سيف الدين الجزيرى رفقة منتخب بلاده تونس فى مونديال قطر 2022 إلا أن مجلس الإتحاد رفض كل هذه المقترحات .

وجاء نص الحوار بين مرتضى منصور رئيس الزمالك ومحمد أبو الوفا عضو مجلس إدارة اتحاد الكرة ووليد العطار المدير التنفيذى  ومحمد الماشطة المستشار القانونى لاتحاد الكرة بالنص على النحو التالى : 

مرتضى منصور : 

محمد بيه دلوقتي في وقت للهزار وفي وقت لغير الهزار عايز تتخانق معايا اتخانق معايا أنا متتخانقوش مع النادي عدم قيد الولاد النهارده هيعمل كارثة.

محمد ابو الوفا: 

يا فندم احنا من أول الشهر بنقول ان في قرار مجلس ادارة بأن الاتحاد مفهوش فلوس وكل الأندية امتثلت وكل الاندية دفعت اللي دفع 25%.

مرتضى منصور:

 يا باشا ما أنت عارف إن النادي محجوز عليه أنا محجوز علي 70 مليون، هل تتصور يا محمد بيه إن أنا هتأخر؟ ، محجوز علي 70 مليون ويقولي هات كاش أنت عارف إن المخالفة اللي جاتلنا احنا كنا بنحط الفلوس في الخزنة والوزير قلنا مينعش ودى مخالفة ولما حطناها فى البنك ممدوح عباس حجز عليها .

محمد أبو الوفا:

 طب ما إنت لسه مدى أسوان 5 مليون جنيه من نص ساعة الراجل واقف تحت وهو قريبي أساسا وقالي والله.

مرتضي منصور: 

محصلش يا محمد بيه مانا عارف إنه قريبك محصلش يا بيه واخد شيك .

محمد ابو الوفا: 

انت جايلي دلوقت الساعة 11 دا أنا جاي بالصدفة.

مرتضى منصور: 

عشان نخلص من الموضوع دا هعملك حل جميل أصل لازم العيال هتتقيد يعني هتتقيد أنا حكتبلك جواب دلوقت أنا ليا عند الشركة الراعية 60 مليون هعملك دلوقتى حوالة حق 10 مليون تصرفهم يوم الأحد واطلبلك بتوع الشركة دلوقتي اي رأيك؟.

وليد العطار: 

والله دا رأي المجلس انا عندي قرار مجلس وانا بنفذه.

مرتضى منصور: 

أصل القرار اللي بتنفذه دا هيولع الدنيا صدقني انا بقترح أهو 5 مليون شيك واعمله حوالة حق 10 مليون جنيه يخدهم من الشركة الراعية يوم الأحد ..  الموضوع مفيهوش هزار.

مرتضى منصور:

 متقعدوش تباصولي لبعض والكلام دا مش همشيه هيتقيدوا .. يعني هيتقيدوا واتحملوا المسئولية قدام الناس هو انتوا عشان اتحاد كورة هتذلونا هي دي تصفية حسابات بيني وبينكم.

محمد أبو الوفا: 

أنا مقولتش دي تصفية حسابات احنا معاك ومع نادي الزمالك ومع النادي الأهلي وكل الأندية احنا من اول الشهر واحنا بنقول.

محمد الماشطة:

 دا قرار مجلس والمفروض يتعرض الكلام دا على المجلس ومفيش مانع طالما الفلوس هيتحولوا.

مرتضى منصور: 

وأنا اجيب اعضاء المجلس دلوقتي منين؟.

محمد الماشطة: 

التليفون موجود.

مرتضى منصور:

 أنا بقول هتحصل مشكلة كبيرة أكبر من جمال علام 100 مرة دي جماهير بالملايين انا بقول اهو العيال دي لو متقيدتش هو انتوا بتذلونا.

محمد الماشطة :

 لا يا سيادة المستشار مفيش ذل ولا حاجة.

مرتضى منصور: 

انتوا اتحاد الكرة لخدمة الكرة والأندية ولا عشان نصفى حسابات .. مش وقت تصفية حسابات يا بيه انا محجوز عليا.

محمد الماشطة :

لا هي مش تصفية حسابات محجوز واحنا قولنا كذا مرة على الفلوس دي يتم تسويتها.

مرتضى منصور: 

يوم الأحد حضرتك تبعتلي حد من الادارة المالية وحضرتك مستشار قانوني ونقعد ونشوف ليك كام ونجدولهم.

محمد الماشطة :

 بص يا مرتضي بيه ، بعيد عن العصبية وبعيد عن أي حاجة الموضوع يتحل الاستاذ وليد بيتكلم مع مجلس الادارة عشان القرار الموجود لو الفلوس هتتحول يوم الأحد من الشركة الراعية ماشي بس مجلس الإداره يقول.

وعقب فشل وليد العطار المدير التنفيذى فى الحصول على قرار مجلس إدارة الزمالك خرج المستشار مرتضى منصور رئيس نادى الزمالك من إتحاد الكرة محملا  مجلس جمال علام مسئولية عدم قيد صفقات الزمالك الجديدة .