الطفلة "دانية" ضحية الطريق الدائرى وأمها المكلومة تشعلان ثورة بالتواصل الاجتماعي.. صور

"ايوة انا الأم المكلومة.... انا الأم المقهورة بس انا برضه الأم الصابرة والمحتسبة"، كلمات أم تحمل معانى الحب واللوعة لفقد الإبنة الصغيرة "دانية" ذات السبع سنوات، الإبنة التى لقيت مصرعها فى حادث مروع على الطريق الدائرى حينما كانت بصحبة والدتها فى سيارتها الملاكى وتفاجأت الأم بسيارة نقل كان يقودها شاب عمره 22 عاما، كانت قادمة بسرعة 120 كيلو من الخلف، لسائق أهوج لم يحمل رخصة قيادة لإنتهاء رخصته.

استغاثات على موقعى التواصل الإجتماعى "فيسبوك" و "تويتر" وهاشتاجات حملت عنوان "#منع_سير_النقل_فى_اوقات_الذروة"، "سير_النقل_فى_اوقات_معينة"، "الكشف_الطبى_على_سواقين_النقل"، للثأر لحق الطفلة الملاك والروح البريئة التى ليس لها أى ذنب بقوانين البشر وافعالهم المشينة غير المسئولة.

والغريب فى الأمر وما اثار استياء الرواد هو انه بتحليل دم السائق تبين وجود أربعه أنواع من المخدرات فى جسمه وكأن الأمر تحول إلى غابة نسير فيها ليس لها أى قواعد وقوانين.

وتساءل الرواد حول امكانية قيادة هذا السائق الأهوج فى ظل تواجد عشرات النقاط بدون تفتيش، مرددين هتافات عبر مواقع التواصل لتحويل الأمر إلى قضية رأى عام لتقليل نزيف الدم للكبار والبراعم الصغار.

وكتبت السيدة رباب المليجى عبر حسابها الشخصى بموقع التواصل الإجتماعى "فيسبوك" : "بنتي راحت بسبب سواق نقل فرمني ع الدائري وسواق تريلا راكن بعرض الطريق ولولا ستر ربنا كان يبقى فية ١٠ عربيات وارواح كتير في نفس الحادثة...انا صابرة ومحتسبة بنتي ولا ازكيها على الله...بس لو بتحبوني لازم نعمل وقفة...لازم قانون المرور يتغير ودة مش حيتغير الا بمساعدتكوا....احكوا الحكاية وشيروا الصور...خلوا الموضوع يكبر ويكبر... عشان محدش يحس بالوجع اللي انا حساة ...ومفيش عيلة تانية تفقد اي فرد فيها...ربنا ما يوري حد اللي انا شفتة في الكام دقيقة بتوع الحادثة ولا الرعب اللي شفتة في عين بنتي وهي محشورة في الكنبة.. اللهم اجرني في مصيبتي واخلف لي خير منها".

واضافت : "انهاردة بدأت اول خطوة من مشواري عشان ارجع حق بنتي...ربنا عالم اني مش عايزة اي حاجة من البلد ولا عايزة اي تعويض مادي او معنوي....اللي راح راح ومش راجع...انا مش عايزة حد يتوجع تاني على ولادة...مش عايزة عيال تتيتم....عايزة اعمل حاجة ايجابية عشان يوم ما اطلع لبنتي اقولها مسبتش حقك يا حبيبتي....حاولت بكل قوتي امنع اذى الناس...من فضلكوا اتفرجوا على الحلقة يوم الاتنين اللي جاي...برنامج صبايا الخير مع ريهام سعيد....اي حد عنده اي طريقة اوصل بيها للي انا عايزاة يا ريت يقولي...متكسلوش....و الله ولا في أحلامي كنت اتخيل اني حبقى ضحية حادثة زي دي ولا اني افقد بنتي بالطريقة دي...الموضوع قريب اوي اوي والخطر حوالينا... ساعدوني اغير حاجة....ساعدوني اعمل حاجة امنع بيها الاذى عن الطريق....الله يرحمك يا دانية و الله بكل لحظة وجع بتعدي عليا مش هزهق ومش حبطل....بس ساعدوني لوحدي مش حقدر".

وتابعت الأم المكلومة : "ايوة انا الأم المكلومة.... انا الأم المقهورة بس انا برضه الأم الصابرة والمحتسبة....انا الأم اللي مش حتضيع حق بنتها....لن يضيع حق وراءه مطالب....وغلاوتك عندي يا حتة من قلبي مش هزهق...مش حكل....يمكن دلوقتي مش قادرة أمشي على رجلي بس وحياتك عندي مش ساكتة... بحاول في كل الطرق وبفتح كل الأبواب ومش حيأس يا دانية ابدا يا عمري....انا عارفة انك سامعاني وعارفة انه مش حيرجعك لحضني تاني بس والله على قد ما ربنا حيقدرني مش حخلي اي حد يتأذي...انا بس بدعي ربنا امشي عاى رجلي عشان اعرف اعمل اكتر من كدة....يا رب يا رب يا رب استجب....حبشركوا قريب بأخبار سواق النقل الحيوان ولسة ولسة....طول ما فيا نفس مش حسيب حق عيالنا.....لو قعدت عمري كله اقولك وحشتيني مش حيكفي....بس كدة عارفة انك شايفاني ومتأكدة اني مش حنساكي".

واستطردت الأم قائله : "أول مرة في حياتي اعرف يعني ايه انا مش لوحدي...دي عينة من أوجاع الناس ، عينة من الناس اللي قلوبها اتحرقت...السؤال لإمتى لإمتى حنفضل ساكتين لإمتى حنتنازل عن حق السير في أمان....والله العظيم الخطر حوالينا وممكن يمس اي حد مننا....يا رب لا املك الا الدعاء والمحاولة المستميتة لرد الأذى عن الطريق زي ما النبي عليه الصلاة والسلام وصانا....الناس دي نفسها حد يجيب حق ولادها ومش لاقيين وسيله... هل من مساعد هل من منادٍ".

وتابعت الأم حديثها قائله : "النطق بالحكم على السواق يوم ٩/٤ .... ورحمة الملاك دة كله يكثف الدعاء بإنه ياخد اقصى عقوبة وربنا يزلزل الأرض من تحت رجله....بكل لحظة الم يا دانية بعيشها بدعي من قلبي...ربنا يمنع الأذى عن الملايكة اللي زيك.... انا عارفة انك معايا وفخورة بأمك...وانا مش حخذلك يا عمري انا ....وحشتيني".

واختتمت الأم المعذبة حديثها لرواد التواصل الإجتماعى بتلك الكلمات : "ممكن بعد اذنكوا حد يجمعلي كل بوستات الحوادث دي ويعملهالي في ملف عشان اكيد ححتاجه ادعم بيه القضية....انا للأسف قدراتي محدودة دلوقتي".