محمد حمدي يكتب : املا مكانك

املا مكانك علي الصوت
مش هاتعيش لو خوفت الموت
عاند احزانك اتحداها
لو سابتك ضحكه اجري وراها
ليه ترضى تموت مكبوت
شايل في قلبك اوجاع
و الهموم ماليه الاكتاف
لا عمر شجاعة قتلت شجاع
و لا طال عمر اللي خاف
جيب كل الاحلام المركونة
اقلعها م الارض البور
افرج عن ضحكتك المسجونة
خليها تشوف النور
اوعى تكتف يوم خطاويك
مش محتاجة الخطوة لإذن
سيبك بقى من التلاكيك
ليه متبت قوي في الحزن
احلامك محبوسة في ادراج
و ترابيسك مقفوله عليها
اكتبلها امر الافراج
عيش احلامك .... آمن بيها
افتح ابوابك للشمس
قطع كل خيوط الضلمة
اتخيل ... اعشق ... حس
عيش المعنى ... حب الكلمة
اتمرد ثور على يأسك
اهزم خوفك من فشلك
ارمي بذورك و ارويها
تطرح شجرة تحقق املك
كل يوم فجرك مولود
و الامل جواك موجود
و طول ما انت فيك الروح
هاتفضل تقول و تبوح
و تصرخ بصوت مفتوح
ملعون ابوك يا سكوت
ملعون ابوك يا سكوت