نهى أباظه تكتب: قول كلمتك .. حتى لو خالع جزمتك

قول كلمتك واستخبي او حتي اختفي...ولع النور ..يمكن يبطل ينطفي.. ولو حتي انطفي ..قول كلمتك بالريموت او بالحجاره ...يمكن التلج يدوب ..وتزيد الحراره .قول كلمتك 

قولها بصوت جامد او صوت منبوح..قولها معدوول او ملووح .. ..قولها كحه او صفرها صفاره ...قولها بصريح العباره .. والعباره مش في الشيكاره....العباره في ذمتك.. قول كلمتك..

قولها في سرك او قولها للناس ...حتي لو راكب اتوبيس .قولها وافتح الازاز ..قول كلمتك ...

قولها وانت قاعد او وانت ماشي ..قولها لو حتي عل الماشي ...لأ او ماشي ..حتقولها يعني حتقولها...

قولها بالرضا احسن ماتقولها بالغصب ...قولها بالكسر احسن من النصب ...ايوه النصب اللي ماكنش بالساهل ...ودلوقتي بقي مستاهل ..

النصب في الاسم وفي الضمير وفي الكلام ...النصب في الحقيقه وفي الخيال...والخيال في كلام الكبار ..مش في لعب العيال ..قول كلمتك

قول كلمتك في مستطيل او دايره ...قولها يمكن تعدل المايله ...وحتي لوفضلت مايله زقها .متعقده ..حلها...مربوطه ..فكها... وماتقولش وانا مالي .وعشان الدنيا مش عجباني.. لو اتكلم يتقطع لساني
قول كلمتك... ماهو عجبك او مش عجبك الكلام ...حتقولها والسلام  حتقولها راجل او جبان....حتقولها وانت مستريح او وانت تعبان ...حتقولها في الحلم ..وانت في احلاها منام  ..وعشان مايبقاش خطر عل صحتك ..
حتي لو خالع جزمتك ...قول كلمتك