سارة مجدي تكتب: لغات الحب الخمسة.. ويسرية لسه عايزة ورد !

المشاكل الزوجية أو العاطفية بيكون أغلبها:

" أنت مبقتش بتحبني / إنتي مش فهماني / أنت مش مهتم بيا / إنتي خنقتيني و مش مقدرة “و طبعا يا يسرية " أنا عايزة ورد يا إبراهيم “.

بيتكلم الكاتب في البداية عن الفرق بين الحب الرومانسي اللي بـيكون في بداية الجواز ، والحب اللي بـيعيشه الأزواج بعد مرور سنين كتير من المشاكل والتحديات والعشرة ، وهو بـيقول إن الحب الرومانسي مؤقت .. وعشان يكون في حب دائم ومستمر فلازم نتعلم لغات الحب الخمسة ..

قبل ما أبدأ بالخمس لغات .. كلنا عارفين ده .. أنت عارف إنها بتحب تسمع كلام حلو و تقولها إنك بتفكر فيها أو هي علي بالك .. وانتي عارفة إن لما بتنسي تكلميه الصبح و تصبحي عليه بيزعل .. الكتاب ده كل اللي عمله إن بيشرحلك بالتفصيل تأثير كل كلمة مهما كانت بسيطة و إزاي ممكن تكون حاجة بسيطة جدا حل لمشاكل كتيرة جدا كنت بتختصرها في الإنفصال كحل متاح و للأسف سهل من بذل أي مجهود …

1- كلمات التشجيع

مش بس كلمة (بحبك )

بس كلام اقرب إنك بتميزه ..

سألت مجموعة من كل الأعمار و طلبت منهم يكتبوا ايه أكتر كلمة بيحتاجوا يسمعوها لما بيكونوا محبطين و محتاجين تشجيع ..ده أكتر كلام اتكرر من الطرفين :

أنت أحسن واحد - واحدة
لولاك مكنتش وصلت للي أنا فيه
من غير وقفتك جنبي أنا مكنتش هعرف أكمل
وجودك في حياتي مهم
انتي مهمة و غالية عندي
انت مهم
مفيش أهم من راحتك عندي

هنا بـيحتاج الطرف الآخر إلى الكلمات اللي بـتعبر له فيها عن مكانته الكبيرة و غلاوته عندك وجواك ..
"كلما سمع منك كلمات مشجعة وكلمات حلوة كلما امتلأ قلبه بالحب أكثر.”

يعني بالبلدي : الكلمة الحلوة بتفرق .. الكلمة ليها قوة يا تجيبك سابع سما ..يا ترزعك سابع أرض و خصوصا لو من حد بتحبه .. لو مشجعتوش بعض بكلام حلو علي أساس إن كل واحد عارف أو "دي بديهيات ! أو بلاش تلزيق وكلام فارغ".

البطارية بتخلص. الحق اشحنها بشوية كلام حلو وده هيشجع الطرف التاني انه يعمل أكتر ونفسه تتفتح على وجودك في حياته .. ايوة مهم اوي تحس إنك بجد متقدر.

متبخلوش بالكلام ما انتوا لكلوك لكلوك في التفاهات والخناقات
..الكلمة الحلوة حلوة !

2- تكريس الوقت

الطرف الاخر ده عايزك تكون "صاحبه" اللي بـيتكلم معاه و يخرج معاه و تقضي وقت معاه، تروحوا النادي ، تروحوا الجيم ، تعملوا shopping ، تاكلوا مع بعض في أحد المطاعم لوحدكم بس ، و يكون بينكم كلام كتير وحوار عنكم بس ، أن يكونوا في جدولكم اليومي وقت مخصص ليكم ..وهو ده اللي هيسعد الشخص ده .

يعني بالبلدي : خليكوا صحاب . (نقطة ) مش حتلاقي أحسن من شريك حياتك أو حبيبك إن يقوم بدور الـ Best Friend ..مينفعش طرف يحس بوحدة و التاني موجود.

الشخص ده محتاج وجودك بشكل يومي و مش معني كده بقول انه يخنقك أو تحس إنك محتاج مساحة بس ببساطة الطرف الاخر ده عايز يكون له مكان في جدولك اليومي مع الحاجات التانية المهمة اللي بتعملها .. الشخص ده بيحب يخلق معاك ذكريات في كل يوم و محتاج يحس إنه مهم في يومك .

3- تبادل الهدايا
هذا الشخص سوف تجد على مكتبه مجموعة التذكارات والهدايا التي تجعله يستشعر بالحب عندما يحتاجه، المناسبات الجميلة تكون فرصة للتعبير عن الحب من خلال هدية، والهدية تعني وجود مناسبة جميلة، وإنها جميلة لوجود هذا الشخص في حياتك المال ليس عائقاً هنا ..
المهم أن يكون هناك ما يناله منك بعنوان المحبة والتقدير والفرح لوجوده معك في حياتك.

يعني بالبلدي: "تهادوا تحابوا" الهدية دايما معناها إنك بتفكر في الشخص التاني و عايز تفرحه ..مش شرط تكون غالية في قيمتها .. هي غالية في معناها

طبعا المناسبات كتيييييير عندك ..
عيد ميلاد / عيد جواز / Anniversary / شغل جديد / عيد الفلانتين / ترقية / عيد شرطة / طهور / سبوع

أو حتي من غير مناسبة مش لازم تدفع دم قلبك كفاية!

مجرد تفكيرك و قرارك في أنك تفرح شريكك و تعبر عن حبك عشان الشخص ده لغته في التعبير مختلفة وبيحس بالحب لما تفتكره في مناسباته الخاصة بهدية و يا سلام لو من غير مناسبة دبل كيك و انت الكسبان أنك حسسته بالحب و فرحته .

4- أعمال خدمية
هذا الشخص يرى الحب بالأفعال لا بالأقوال، إنه ينظر لقيامك بالأعمال المنزلية على إنه شيءٌ في غاية التعبير عن الحب، كلما ساعدته في إنجاز بعض المهام وتعاونت معه في تحقيق بعض الإنجازات، فذلك تعبير كبير عن الحب، تختلف طبيعة هذه الأعمال من شخص لشخص .. ولكن الأهم أن يراك تضع يدك في يده أو تسعى لأن تنجزها بالنيابة ده بيخليه يدرك قيمته في حياتك.

يعني بالبلدي: متبقاش بروطة و لازقة في الكنبة!
(للطرفين)
يعني كل واحد يساعد في البيت .

هي تغسل الاطباق هو يرصها.
هي تطبخ هو يغرف أي حاجة تحسس الطرف التاني انه مقدر المجهود اللي بيتعمل في البيت حتي لو الحاجه دي في منتهي التفاهة زي إنك ترص شوية اطباق علي السفرة.

الفكرة في مساعدة مشتركة من أي نوع في البيت - ده "للمتجوزين “.

5- الاتصال الجسدي
هذا الشخص وبكل عفوية يريد أن تكون يدك في يده، ان يلمس شعرك، أن تحتضنه أو تقبله، العلاقة الحميمية تعني له الكثير، جلوسك بقربه وأن يلامس جسمك جسمه بطريقة ما هو ما يجعل ذرات الحب تنتقل منك إليه، أن تدرك أن هذا الأمر هو غاية التقدير والأهمية بالنسبة لهذا الشخص.

يعني بالبلدي: عبر عن حبك.. متتكسفش تمسك ايديها بحب مش حتتكهرب والله. 

 
لما ترجع من شغل احضنها.. اديها بوسة ! مش معني إنها عايشة معاك كل يوم انه" إزيك “كفاية ! جرب تغير طريقتك ..حتلاقيها هي حتستقبلك بحضن وحب وهي مستنية ده.. و ممكن يبقي العكس ممكن يكون الراجل يبقي عايز أول حاجة يشوفك وياخدك في حضنه متبقيش انتي بقي لابسه جلابية ريحتها طبيخ وبتقوليله أنت شرفت؟

 شايف الساعة كام؟

لبعض الأشخاص “لغة الحضن و اللمس" بتعبر عن كل كلام الحب اللي جواهم و دي لغتهم اللي بيعبروا بيها عن حبهم.

كل اللغات هي لغات حب، ولكننا كبشر نميل إلى إحداها دون الأخرى وهي التي يرى فيها شريك حياتنا قيمة أكبر من غيرها.

"اذا بلغت غاية مايجب أن تعرفه, فأنت على عتبة ما يجب أن تشعر به.”
جبران خليل جبران