سوق المستعمل.. كيف يدبر أصحاب الحضانات الشعبية المستلزمات بأرخص الأسعار؟

عايزة تفتحى حضانة ومش عارفة تبدئي مشروعك.. نفسك تجهزيها بأحدث أثاث بس متدفعيش كتير في نفس الوقت.. نوفر لكم مستلزمات الحضانة مستعملة وذات جودة عالية وبأقل التكاليف وافضل خامة، مستعمل درجة أولي وتانية".. حسب ما ورد بإعلان لأحد مكاتب تجهيز الحضانات بالاثاث المستعمل.


تجهيز حضانات
وتابع مسئول المكتب عند التواصل معه بحجة الرغبة في توفير مستلزمات مستعملة لمشروع حضانة بأحد الاحياء الشعبية " إحنا جهزنا آلاف الحضانات بحي شبرا والمطرية وعين شمس والمرج، وبمحافظة القليوبية، دلوقتي أغلب الحضانات بتحب تجذب الاطفال والاهالي بالكراسي والترابيزات الملونة والالعاب اللي بيحبوها، ولكن سعرها مرتفع، ولهذا فكرنا نشتري المستلزمات المستعملة من الحضانات والمدارس الراقية، ونبيعها للحضانات الشعبية".



عروض المستعمل 
"عندنا أعداد كبيرة من الفوم، والترابيزات والكراسي والالعاب والمراجيح، والترومبيلين، وعلي سبيل المثال التروبيلين المستعمل بحوالي ألفي جنيه والمرجيحة بألف جنيه، وطاولات مستعملة بحالات جيدة وممتازة وكثافات مختلفة أغلبها18ملي و22ملي وبأسعار ممتازة، وايضا ديسكات زان ومعدن، بأسعار تبدأ من 60 جنيه للكرسي".



أسعار المستعمل 
وتابع "بيت الكور بحالة ممتازة سعره جديد 1195، والدودة تركي 3مرحلة بـ1295ج بحالة جيدة صيانة بسيطة سعرها جديد، وبيت الدراما المعروف ببيت كنزي الاوروبي بحالة ممتازة بـ2175 وسعره الحالي بالاسواق4350، وترومبلين نطاط 1.40مستورد بحالة جيدة صيانة بسيطة بالشبكة وكل مشتملاته بـ625 وسعره الحالي بالاسواق1800، وساقية لعبة حركية اربعة سلالم اذا تم فكها مستوردة بـ1225سعرها جديد 2300".



بأقل التكاليف
وتحكي رشا السيد، صاحبة مشروع حضانة، "فكرت أعمل مشروع حضانة وأجرت شقة بحوالي 600 جنيه بعزبة بلال، بالدور الارضي، وطبعا عشان اجهزها محتاجة آلاف ولكن وجدت الحل في المستلزمات المستعملة، بيتاع في أسواق زي الجمعة، السوق يوفر ميزة لمن لا يستطيع شراء تجهيزات حضانة جديدة، والمستعمل به نفس مميزات الجديد، ولكن يختلف فى السعر".



فرق الأسعار 
"مفيش مقارنة فى الأسعار بسوق الجمعة لأن الفرق كبير جدًا يعنى اللعبة اللى بـ100 هاتبقى بـ20 جنيه وأغلى لعبة بـ500 جنيه بره وكانت بتتباع ب2500 جنيه، وفيه شركات بتبيع أون لاين، بيكون وكلاء لبيع المستلزمات القديمة للحضانات، واشتريت الكرسى بـ75 جنيه بعدد 20 كرسى، وعدد 2ترابيزة والواحدة بـ200جنيه، وترابيزة وردة بـ320 جنيه، وبيت عرايس بـ220 جنيه بحالة ممتازة، ولعب كبيرة بحالة ممتازة زحليقة 2متر ونصف فايبر جلاس بـ850جنيه، وزحليقة بلاستيك بـ60جنيه، وترمبلوين 2متر حالته ممتازة وسعره 1900 جنيه، وحالته ممتازة وبيت كور مبطن كله آمن جدا بحالة ممتازة عرض 2متر والسعر 1900جنيه أيضا".


زيادة الإقبال
"الحاجات دى كلها بترفع قيمة الاشتراك والعدد فى الحضانة، والمكاتب دي متخصصة في تأثيث وتجهيز وفرش كافة الحضانات ورياض الاطفال بالمستعمل من الكراسي الخشبية والترابيزات الخشبية بأرخص الاسعارو فوم الارضيات المضاد للصدمات".. تقول صاحبة الحضانة . 



الأرباح مجزية 
وتابعت "الحضانة عندي مش محتاجة ترخيص، دي حضانة جوة شقة شعبية، وكل اللي بيجيبوا ولادهم جيران، وكأن الولاد في بيتهم، والحضانة من سن 3 اعوام لحد 6 اعوام، والولاد بييجبوا، وبدرس لهم عربي ودين وماث، وبلعب معاهم، وفيه بيرك للي معاه اكل ياكل والمواعيد من 8 صباحا وحتي 3 عصرا، ودي مواعيد مناسبة لكل ست بتشتغل، والاشتراك بسيط حوالي 150 جنيه في الشهر، وأرباح المشروع معقولة لان الاشتراكات حوالي80 طفل ".



مخالفة للقانون 
الحضانات المرخصة لابد وأن تحصل علي ترخيص من الحي، التابعة له ويتقدم صاحب الحضانة، بطلب لمديرية الشئون الاجتماعية للبت فى الطلب حسب حاجة المنطقة لدار جديدة لرياض الأطفال، وفى حالة الموافقة على طلبه، يتم إعداد جميع مستلزمات تشغيل الحضانة وإخطار مديرية الشئون الاجتماعية بمجرد انتهائه من ذلك،طبقًا لأحكام قانون الطفل رقم 12 لسنة 1996 والمعدل بالقانون رقم 126 لسنة 2008، ومن اشتراطات الحضانة سلامة وأمان تجهيزات الحضانة وتوافر الشروط الصحية، وما تتجاوزه تلك الحضانات، من استخدام مقاعد ومناضد والعاب مستعملة، دون مراقبة من قبل الجهات المختصة بالحي ومسئولي التضامن.



أعداد المرخصة 
فيما صرحت سحر مشهور، مستشار وزير التضامن لقطاع الرعاية الاجتماعية، بأن هناك أكثر من 5 آلاف حضانة في مصر غير مرخصة، "بنسميهم حضانات بير السلم وعدد الحضانات الرسمية المرخصة في مصر تصل إلى 14 ألفًا و500 حضانة".