EN 
طبيبة شابة في مقتبل عمرها.. مرحة تملأ الدنيا ضحكا ومرحا مع أصدقائها .. كانت تخشي الموت غرقا وماتت غرقا داخل مياه نويبع وسط حالة من الدهشة.
هبة البحيرى ابنة مركز الشهداء في المنوفية والتي نعتها نقابة الأطباء عقب وفاتها غرقا في مياه سيناء وسط حالة من الحزن.
خبر نزل كالصاعقة علي اصدقائها وأهلها حيث سادت حالة من الحزن بين الجميع عقب الإعلان عن وفاة طبيبة المنوفية.
"عندى فوبيا من الغرق".. هكذا كتبت الطبيبة هبة البحيرى منشورا عبر صفحتها علي موقع التواصل الاجتماعي فيس بوك قائلة فيه: " انا ما قلتش لحد ابدا اني عندى فوبيا من حاجتين وفعلا الحاجتين دول بيسببولي رعب رهيب بمجرد التفكير فيهم أولهم وأقساهم علي قلبي هو الغرق.. البحر من جوه مش من بره بخاف منه اوي اوي اوي مع اني ساعات بقول لنفسي كتير لازم ادخل وما اخافش علشان اتغلب علي الفوبيا دى وانا كل سنة لازم اعيش الموقف ده.. أما البحر يقرر ياخد حد من الشباب عندنا بدخل في مشكلة نفسية مش سهلة ومش بتأثر بأي نوع من الحوادث الا الغرق".
ماتت هبة في مياه البحر غرقا حيث لم يتمكن اصدقاؤها من إعادة قلبها للحياة حيث قالت إحدى صديقاتها والتي كانت شاهدة علي الواقعة: "هبة حبيبتي لو قعدت أحكي فيكي سنين مش هكفيكي ربع حقك، أنا مش عارفة أقول حاجة غير إني أصلا جيت سينا عشانك وبعد 3 سنين سبتيني هناك ومشيتي، مكنتش عمري أتخيل إني أول مرة في حياتي اشتغل CPR هيبقى عليكي، احنا كنا في مية سطحية جدا عالشط ومعانا 3 free divers، وهبة مقعدتش تحت الميه دقيقة على بعضها مش نص ساعة زي ما الأخبار كاتبة، وحد من اللي طلعها بدأ CPR من الميه قبل ما تطلع الشط لأنه محترف، أنا بكتب دا عشان دي الحقيقة اللي لازم الناس تعرفها لأني كنت شاهدة عالموقف لحظة بلحظة ولسه في صدمة ومش حاسة بحاجة ومش عارفة لما أبدأ أدرك هيحصل ايه، ولا نقول إلا ما يرضي الله إنا لله و إنا إليه راجعون ربنا يتقبلك من الشهداء يا هبة يا حبيبتي ويلحقنا بيكي بخير ويصبر مامتك وأخواتك وباباكي ".
هبة أقنعت الجميع وكان حسابها علي موقع للتواصل الاجتماعي فيس بوك خير دليل للأطباء الجدد للالتحاق في التكليف في سيناء حيث قالت: "الناس اللي سألتنى على سينا يا جماعه اولا المميزات هاتى ورقة واكتبى ورايا ياست الكل :كل حاجه حلوه ممكن تتقال انا هقولها طبعا انا بس عاوزه اقول حاجه ف الاول اخرجو م المنوفيه ياجماعه اخرجوا من الصومعه دى بقى والتفكير العقيم واستنفاذ الطاقات ع الفاضى اخرجو هتتعلموا حاجات كتيره هتبقوا اقويا اما تشوفوا كل الثقافات هتتعلم ودماغك هتكبر وانت رايح معاك تربيتك ومبادئك لو اتغيرت يبقى مكنش اساسها سليم.. الحياه بسيطه وانا بعشق الحياه البسيطه بصراحه عشان كده روحى ارتبطت بالمكان محدش يقولى بعيد واللي هيقولى بابا مش موافق هقولك زى ما قلت لمنار ابقى خلينى اكلمه متقلقوش ياجماعه التجربه فعلا ممتعة جدا جدا دى واحده م القراراااات اللي خالفت الناس وبحمد ربنا انى خالفت انا فاكره يوم نتيجة التنسيق قعدوا يقولوا عليا مجنونة.. الشغل كويس والريت معقول هتكلم ع الطور لانها العاصمه فيها اربع اماكن توشكى والرعايه والجبيل والوادى البنات بتروح توشكى او الرعايه السكن كويس جدا والوجبات برده الى حد ما واحنا كنا بنطبخ عادى الطور مدينة حية فيها كل حاجة والمشى فيها سهل وامان جدا جدا بس احنا غالبا بنخرج ف جروب وكل الناس كانت عارفانا .. الشغل بيتقسم بين اللي موجودين وبنبقى ف المكان شفتين ناس اول 15 يوم ف الشهر وناس النص التانى عشان تاخدوا اجازتكو اللي هى بدل الراحات 15 يوم".
وأضافت: الإدارة عاديه يعنى موظفين المديريه كويسين جدا جدا هو اللي ممكن يكونوا رخما او بيعملوا مشاكل الكتبة البنات افضلها الطور وراس سدر ناس بتروحها عشان اقرب مدينة للنفق اربع ساعات وبتبقوا فيها وهى كويسه بس انا بحب الطور اكتبوا كل الادارات بالترتيب ومجموعكو لو مجبش الطور ف المديريه بيسلموكى الطور عادى الولاد بيحبوا يبعدوا عن الطور عشان يقسموا ويروحوا اسبوع واحد اكتبوا بالترتيب نويبع -ابوزنيمه-ابورديس-دهب-شرم (مبحبهاااااااااااااش)-الطور- راس سدر -طابا-كاترين وان شاء الله لو احتجتو تيجوا الطور مدير الرعايه يوافق بس روحوا استلموا بعد ما ناس ف الاداره اللي جايلكو تستلم فيها عشان متروحش الاول يقولك الاداره مفهاش حد ويوديك.. ثانيا العيوب : مفيش عيوب من وجهه نظرى .. المواصلات فيه شرق الدلتا م شبين يوميا بيطلع 11 بالليل والحجز يومها فيه شركة اسمها الندى بتطلع من الشهدا وبتعدى ع شبين تاخد منها رقمهم معايا اللي عاوز يسأل اى حاجه انا تحت امركم بس انا عاوزه سينا تتملى منايفة).
