سمر حمزة تعلن اعتزالها المصارعة بعد وداع أولمبياد طوكيو

أعلنت سمر حمزة لاعبة المنتخب الوطني للمصارعة، في بيان رسمي، إعتزالها اللعبة، بعد الخروج المبكر من أولمبياد طوكيو 2020.

وكانت شهدت منافسات اليوم الأول لمنافسات المصارعة توديع الثلاثي المصري عبد اللطيف منيع وسمر حمزة وهيثم فهمي المنافسات من دور الـ16، بدورة الألعاب الأولمبية الصيفية رقم 32 "طوكيو 2020".

وفشل الثلاثي في بلوغ منافسات ربع النهائي، كما خسروا فرصة اللعب على الترضية والميدالية البرونزية بعد خسارة منافسيهم في الأدوار المتقدمة.

ونشرت سمر حمزة بيان رسمي تعلن من خلاله اعتزالها عبر صفحتها الشخصية على “فيسبوك” جاء كالتالي:

تعالوا نحكي حدوته صغننه كده هتعجبكم 
سمر حمزه 
بدأت مصارعه اخر ٢٠١٣ 
كان عندها 18 سنة 
لعبت اول بطوله دوليه ليها 2014 كانت بطوله افريقيا اخدت فيها اول ومن بعدها لحد دلوقت اول افريقيا ال عمرها ما حصلت اصلا في المصارعه النسائيه ان بنت تاخد اول باستمرار وبالذات في الميزان 76kg 
شاركت في بطولات دوليه وحققت نتايج مستمره 
اول بحر متوسط 2015
تالت جائزه كبري 2016
خامس بطوله بولندا المفتوحة
رابع دورت التضامن الإسلامي 2017
تم اختيارها من قارة افريقيا وشاركت في دوري محترفين في الهند 
اول بحر متوسط 2018
تالت دورت بحر متوسط 2018
لحد ما وصلت ل قبل نهائي ف بطولة عالم كبار واول بنت مصريه توصل وتحقق خامس عالم كبار 
المركز التامن في بطولة العالم تحت 23 سنه 
لحد هنا كان مجهود شخصي مع المدرب 
نخش علي الجزء ال فاضل 
تم عقد راعايه من شركة روابط من 2019
شاركت ف بطوله الجايزه وحصلت ع برونز 
تالت دورت الالعاب الأفريقية 
2020 بح فاضيه مفيهاش غير افريقيا 
2021 تاني بطولة التصنيف العالمي 
المركز الأول في البطوله المؤهله واتأهلت للالمبياد 
المداليه البرونز في بطوله دانكلوف 
المداليه الدهب ف بطوله الجايزه الكبري 
المداليه الدهب في بطوله سارساري ايطاليا 
كام معسكر سمر طلعته في عمرها ال من 2013 لحد دلوقت 4معسكرات مديت المعسكر قد ايه عشر ايام 
نشوف بقي ال بيلعبوا معانا!!!!!!!!
وعمرهم ف اللعبه والفكر والروح بتاعت المنظومه ؟؟؟ 

وتابعت قائلة : انا كسمر حمزة فخورة جدا بالمصارعة النسائية في مصر. سعيدة ان المصارعة النسائية اصبحت علي الخريطة العالمية  انا ابتديت العب مصارعة من 8 سنين شوفت انجازات كابتن كرم جابر وكابتن بوجي و من وقتها قررت اكون لاعبة مصارعة زيه لما العب من 8 سنين و في امكانات محدودة  و متربتش علي فكر صناعة بطل اولمبي  و اقدر اوصل لتصدر افريقية و خامس عالم كبار و بطولات دولية و مصنفة   يبقا ده انجاز  لكل بنت بتفكر تلعب مصارعة في مصر   انا لعبت مصارعة بالصدفة  وحلمت اكون بطلة اولمبية  و اشتغلت علي نفسي كتير  و استحملت تدريبات شاقة و نقد و تكسير  عزيمة عشان اوصل لما وصلت عليه   يمكن اكون متربتش علي ثقافة الفوز  بس انا مقصرتش و استغليت كل فرصة اتيحت ليا   
شجعوا المصارعة النسائية عشان نربي جيل من البنات الصغيرين بفكر جديد و امكانات افضل و ثقافة مختلفة  الرياضة مش بس ميدالية   دي سنين طويلة من الكفاح و الشقا و التعب 
مفيش شعور ولا وصف اوصف بي التعب غير الكام كلمه دول
 

واختتمت سمر حمزة قائلة : "اللاعب وظيفته في الحياة التدريب فقط ليس القيام بدور الأشخاص المسؤولين عن مسيرتة الرياضية شكرا لكل حد وقف جمبي شكرا مدربي العظيم شكرا زميلي ال اتمرنوا معايا ومن هنا بعلن اني بكتفي شكرا للتجربة علمتني كتير".

<iframe src="https://www.facebook.com/plugins/post.php?href=https%3A%2F%2Fwww.facebook.com%2Fsamar.amer.7965%2Fposts%2F980165669384030&show_text=true&width=500" width="500" height="702" style="border:none;overflow:hidden" scrolling="no" frameborder="0" allowfullscreen="true" allow="autoplay; clipboard-write; encrypted-media; picture-in-picture; web-share"></iframe>