EN 
قال الشيخ خالد الجندي، عضو المجلس الأعلى للشئون الإسلامية، إن شابا من أبو حماد في محافظة الشرقية من أولادنا هاجم لاعبا عالميا في مانشستر يونايتد، موضحا: “بيلعب أو بيتكلم على النت أو بيراسل على النت زي ما ولاد كتير بيعلموا، وهبت في دماغه يشتم لاعب مشهور عالمي اسمه راشفورد لاعب فريق مانشستر يونايتد الإنجليزي”.
واقعة التطاول على لاعب مانشستر
وتابع: “الشاب مش عاجبه لعب راشفورد تقريبا فتلفظ بألفاظ عنصرية تتعلق بلونه أو عائلته أو أي شيء من هذا الكلام وشتيمة شتيمة شتيمة، على اعتبار إنه قاعد في أبو حماد شرقية وهو فين، يعني أنا فين وراشفورد فين، وبيني وبينه مسافات، متابعا: لكن راشفورد لقطه ومعجبوش الكلام وبعت 10 محامين دوليين لملاحقة الشاب في مصر”.
وأضاف الجندي خلال برنامجه “لعلهم يفقهون” على " دي ام سي : راشفورد اللاعب الإنجليزي، صرف وكلف علشان يعلم الغلطان الأدب، وعلشان يقولك لست وحدك، وعلشان تبقى عارف إنك مش قاعد في الفسحة ولا على المصطبة، وعلشان يخليك تنتبه لألفاظك اللي بتقولها.
وأكمل: إنَّ العَبْدَ لَيَتَكَلَّمُ بالكَلِمَةِ مِن رِضْوانِ اللَّهِ، لا يُلْقِي لها بالًا، يَرْفَعُهُ اللَّهُ بها دَرَجاتٍ، وإنَّ العَبْدَ لَيَتَكَلَّمُ بالكَلِمَةِ مِن سَخَطِ اللَّهِ، لا يُلْقِي لها بالًا، يَهْوِي بها في جَهَنَّمَ.
وتابع خالد الجندي، عضو المجلس الأعلى للشؤون الإسلامية: “حادثة راشفورد والشاب المصري معرفش وصلت لفين وهتنتهي على ايه، ابقوا تابعوها على السوشيال علشان تعرفوا اللي بيقول الكلمة وهو مش واخد باله منها بيحصله ايه”.
وكان طالب مصري يدعى محمد عصام محمود، قام بالاعتداء بالسب والقذف على ماركوس راشفورد لاعب فريق مانشستر يونايتد الإنجليزي ووجه عبارات تحمل في طياتها العنصرية تجاه الأخير، ما دفع راشفورد إلى رفع قضية على الطالب.
