خالد الجندي: الشيطان بيرش سكر وعسل على العلاقات الحرام

قال الشيخ خالد الجندي، عضو المجلس الأعلى للشئون الإسلامية، إن إبليس أكبر عدو للإنسان، لذلك يعمل على تزيين المعاصى له، حتى يستمر فيها، موضحا: "تلاقى واحد وواحدة عاملين علاقة فى الحرام تلاقيهم حاجة فى منتهى السعادة، ليه عشان الشيطان بيحلى لهم المعاصى بيرش لهم عليها سكر وعسل، أول لما يتزوجوا فى الحلال تلاقى المعارك اشتغلت بينهم ليه عشان هنا فى حلال هى تشوفه قرد وهو يشوفها حاجة وحشة".

وتابع خالد الجندي، خلال حلقة برنامج "لعلهم يفقهون"، المذاع على فضائية "dmc"، اليوم الثلاثاء: "الشيطان شغله انه يخليك عاصى، ولو المعصية موجودة فى جوفك يبقى انت عندك مشكلة فى مقومات القرآن، لو لقيت المعصية مرة زى العلقم يبقى انت كده فى الإيمان، لما تشعر بمرار المعصية ربنا هيزين قلبك ولسانك لا يطاوعك للمعصية عشان ليك خاطر عند ربنا، وتلاقي العاصى عنده المعصية تقيلة على قلبه جدا".

واستكمل الجندى: "تلاقى الولد يقعد يتفرج على الماتش بالساعات وصلاة العصر عنده أثقل من جبل أحد، وهذا أمر خطير، الشيطان معاه علبة سكر شيطانية يرش لك سكر على ترك الصلاة على الزنا على القمار، على خدش الحياة والاعراض، وبالتالي تشوف الذنب، وهذه علامة عدم إيمان".