قهوة من غير سكر

قهوة من غير سكر
الصوان منصوب
والقهوة السادة
بتدور ع الناس
وبتفرد وشها
الحزايني
على وشوش
كل القاعدين
عنيك بتدمع
ع الميت
اللي عمرك ماشفته
ولامرة شربت
معاه الشاي
الليلة جاي بتشرب
قهوة على روحه
وبتاخد عزاه
الشيخ بيجود
"كل نفس ذائقة الموت"
تقرا ف عيون الناس
الرهبة............
يرتجف قلبك
م الخوف
وتقرر إنك
مش هتفوت فرض
وهتصلي
الفجر جماعة
تخرج للشارع
وتروح ع القهوة
تطلب شاي
لجل ينسيك
طعم القهوة السادة
تضحك
على نكتة بايخة
فيدوب وش القهوة
المرسوم على وشك
أخر الليل
تنام على روحك
تصحى من النوم العصر
.. وتنسى
خوفك وقرارك
وتجرك الدنيا
لدوامة
وتعيش على أمل
إنك تشرب
القهوة السادة
على روحك
ودي هتكون
أول مرة تشربها
.. من غير
خوف ولارهبة