زوجة "شهيد سيناء" تكشف عن اللحظات الأخيرة قبل استشهاده

قالت المهندسة مروة محمود قنصوة، زوجة الشهيد البطل أحمد عبد النبى – أحد شهداء قوات حرس الحدود فى سيناء – إن زوجها كان يتعامل بود وحب مع الصغير والكبير.
وأضافت زوجة الشهيد، على هامش اطلاق اسمه على مدرسة الخانكة الثانوية بنات: "أفتكر لأحمد كل يوم فى عمرنا، وهو كان كل حاجة حلوة فى حياتنا وحياة بناته، وكان الضحكة اللى بيضحكوها والفرحة اللى بيفرحوها".
واستطردت الزوجة باكية: "آخر أجازة حضرها الشهيد، كانت نتيجة البنات ظهرت، وقالهم هنخرج كلنا عشان إنتوا جايبين درجات نهائية، وكان ماشى يلعب معاهم زى الأطفال الصغيرة، وقال لهم: الخروجة دى عشان النتيجة، ولكن أنا كمان كنت عاوز أخرج ماما معاكم، وكان بشوش مش بيعرف يزعل أو يكره حد، الحمد لله على كل شىء".
وتابعت: "كان دايما يقول لى أنا باتنفس تراب سيناء، كان بيحب شغله أوى، وبيقول على العساكر إنهم ولاده، كنت أقوله خليك معانا، كان يقولى إنتوا هنا دفيانين ومتأمنين، إنما اللى هناك أنا مؤتمن عليهم من ربنا، وفعلا هو راح لهم عشان الأمانة وكان قدها وقابل ربه".