فتاة تطلب من "حماقى" حضور عقد قرانها عبر "فيس بوك"

نشرت فتاة عبر حسابها علي موقع التواصل الاجتماعي "فيس بوك" رسالة وجهتها الي المطرب محمد حماقي تعرب من خلالها عن أمنية حياتها بحضور حماقي عقد قرانها .
وكتبت " كهرمانة " في رسالتها: "بصوا أنا مش عارفة أقولهالكوا إزاي..ولو ده جنان ف أنا هتجنن ولو لمرة واحدة ف عمري.. ومفيش حاجة مستحيلة...أنا أمنية جوايا من 11 سنة، وجه وقت محاولة تحقيقها ..حماقي‬ يحضر فرحي وبما إني مش هعمل فرح فأنا عاوزاه بس يحضر ويشهد ع عقد جوازي مش عاوزاه يغني بس يحضر.. اللي فيكوا عارفني من زمان هيبقي عارف كويس أوي الأمنية دي بالنسبالي إيه".
وتابعت " شبيه أحمد حلمي اتمني عمره كله إن أحمد حلمي يحضر فرحه ووجه دعوة رسمية لحلمي وحلمي فاجئه وجاله فرحه!!!
مفيش مستحيل.. بس اللي فيكوا يعرف أوجه دعوة رسمية لحماقي إزاي يقولي وانتوا اللي طالباه منكوا البوست ده يلف الفيس بوك لحد ما يوصل لحماقي نفسه أو ع الأقل حد يوصله لحماقي".
الرسالة لاقت ترحيبا كبيرا بين الفتيات عبر مواقع التواصل الاجتماعي ، وطالب عدد كبير من متابعي حماقي عبر "فيس بوك" الفنان بتحقيق أمنية العروس وحضور عقد القران .