كواعب البراهمي تكتب: على ضوء القمر

مين ده اللي يقدر
يملكني أنا
اوعى تفتكر إني
زي أي حد
ولا عمري أبيع ود
لكني في عز السكينة
بقدر أطير
وابعد كمان
أبعد كتير
أكتر مما تتخيل عينيك
وأبعد ما يحس قلبك
وأكتر من الكون ده كله
أوعي تتخيل
إن قلبي هو ملكك
أوعي تفتكر عشان بحبك
يبقي خلاص ملكني قلبك
صحيح أنا جوه مني
طفلة هادية وحلوة وطيبة
لكن مع أي جرح
أي كدب
أي تهبيل في الكلام
تصحي مارد عمره ما رضخ
ولا عرف الاستسلام
يرفض يكون خاضع ذليل
يرفض حتى السلام
اوعى تفتكر علشان بحبك
ولا علشان أنت كل
حاجه في الحياة
تقدر تغير تمردي
ولا تحولني لأي اتجاه
إنت عارف
أنا زي الريح اللي ساير
وبنفس قوته
مهما قابل من الصعاب
أنا زي الطير اللي هاجر
ورافض رغم شوقه الرجوع
لأنه ما يحب العذاب
إنت عارف
يمكن إنت مش زي أي حد
إنت عارف
يمكن من غيرك أتوه وأضيع
وأسأل وما ألاقي رد
يمكن أكون محتاجة لك
يمكن أكون رغم بعدك
أنا برضه في بالك
لكن عمري ما أنحني
ولا أنادي قلب باعني
ولا قفل في وشي باب
أنا كده
أتولدت متمردة
أهوى الصعاب
إنت عارف إنت
بالنسبة لي إيه
يمكن في يوم تجيلي
وهتلاقيني
لكن مش هكون أنا
مش أنا اللي كانت
راسمة على ضي القمر
لهفة وشوق وهنا
هتلاقيني واحدة تانية متغيرة
باقي فيها من بقايا الحب شيء
باقي فيها دمعة
في عيون متحيرة