EN 
«أنا والد الشهيد انا والد عمر.. ابني مات ساعة صلاة الجمعة طلع الصبح على باب الله وهو سواق ميكروباص في حاله».. بتلك الكلمات بدأ والد المجني عليه عمر شهيد الشهامة الذي قتل على يد مسجل دفاعا عن أحد الأشخاص بمنطقة المقطم ليروي تفاصيل مقتل نجله لـ صدى البلد.
وقال والد عمر المجني عليه:" ابني سواق ميكروباص وعربيته كانت ناقصة نفرين وراح يحمل عند منطقة اسمها الخزان تعتبر موقف كده وفيه اتنين ركبوا قدام على الكرسي جنبه وبينادي علشان يكمل العربية، وفاجأة لقى واحد جاى بينزل الراجل جنبه وراح ضربه بالمطواة قطعله صباعه، ولما ابني تدخل علشان يحجز بينهم المتهم قاله ازاى تحوش بينا وقاله أنا محمد قنص أنا محمد قنص، وده واحد مشهور بالبلطجة وعمرنا ما نعرفه وكان ضارب واحد وخارج من السجن من 20 يوم بس، طب ابني عملك ايه هو أكل ميراث أبوك ولا اتهجم على شرفك علشان تعمل ده فيه".
وأضاف والد شهيد الشهامة:" لما ابني تدخل علشان يحجز بينهم المتهم طعنه بالمطواة ووقع على الأرض وفضل يغز فيه بالسكين طعنات كتير، لحد ما سابه غرقان في دمه وسط الشارع، وهرب، والمتهم بعد كده راح قسم السيدة زينب علشان يعمل محضر انه حد عوره علشان يخلي الواقعة مشاجرة وهو ميعرفش انه قتله وخلص على ابني".
وتابع والد الضحية:" لاقيت وقت الصلاة ابني الكبير بيقولي ابنك اتغز وبعدها بخمس دقايق وانا رايح في الطريق لاقيت اتصال تانى بيقولي ابنك مات طب مات ازاى وليه أنا مكنتش اعرف، وروحت اشوفه في التلاجة لاقيت طعنات كتير في جسمه، وانا مؤمن بالله وقضاء بلدنا وأنا متأكد إني هشوفه متعلق في حبل المشنقة قدام عيني، وده قضاء الله وعدل الله".
وأضاف والد الضحية:" المتهم عيل عنده 20 سنة وابني عمر طول بعرض بس المتهم ده حريف في استخدام المطواه ونفسي اعرف ايه السلبية بتاعت الناس دي اللى مدافعتش عنه، وفينكم يا مصريين فين الرجولية، والمنطقة كلها هناك عارفين اهله وعارفين طبعهم والناس خايفه منهم ، وعمر ابني طول عمره شهم ويشوف ست كبيرة يساعدها تركب ويدفعلها الأجرة ويشيل عنها شيلتها ومكنش يستحق ده".
اقرأ ايضا.. فيديو 13 ثانية.. مفاجأة| شاب يرتكب فعلا فاضحا مع فتاة فوق كوبري
اقرأ ايضا.. كررها وأنا معرفش حاجة.. نص شهادة ابنة موظف الصحة بعد اعتدائه عليها
وطالب والد الضحية:" طلباتي من القضاء المصري إني نفسي اشوفه متعلق على حبل المشنقة ولا عايز ألف ولا ملايين الدنيا كلها قصاد القصاص ودم ابني، ووكيل النيابة سمع كل كلام الناس والجيران وكل كاميرات المراقبة في المنطقة تحفظ عليها علشان يوصل للحقيقة".
وقالت شقيقة شهيد الشهامة:"مرات اخويا اتصلت بيا وقالتلي فيه واحد اتصل على ياسر جوزها وبيقوله الحق اخوك مغزوز عند الخزان، والمتهم قطع صباع الواد اللى جنبه وطعن أخويا 3 طعنات في جنبه، وطعنه في رجله ووقعه في الارض وغزه في القلب والرئة وقطع في ودانه وضربه بالرجول وهو بيموت وهو بيقوله انا محمد قنص يلا انا محمد قنص يلا، واحنا عيلة محترمة في المكان ومعانا ربنا في الواقعة دي وست كبيرة حاولت تشيله عنه جري وراها بالمطواه واحنا عايزين القصاص علشان قلبنا يبرد ويرجع حقه".
وقالت زوجة شقيق المجني عليه:" جوزي نزل يصلي وجاله تليفون بعد الصلاة انه اخوه اتقطع في الشارع وعمر دافع عن حد ومحدش دافع عنه وعمر اثبت انه راجل بس اتغدر بيه والمتهم قاصد يقتله وكل الطعنات اللى فيه 9 طعنات وجرح في دماغه وذبح قطعي في الرقبة من الخلف، واطعن طعنات موت، وسألنا انهم ناس مفترية ومجرمين وعندهم شقة مليانة كلاب علشان يهددوا الناس ومشوفناش صورته غير من الفيس بوك، واحنا عايزين حق عمر اللى راح غدر على يد واحد ميسواش حاجة".
وكانت قد شهدت منطقة المقطم جريمة قتل بشعة عندما تدخل سائق لفض مشاجرة بين شخصين ليسدد له احدهما عده طعنات بمطواة " كانت بحوزته ليلقي مصرعه ويصيب الاخر بنفس السلاح ويفر هارباً وذلك لاعتقاده بالتشهير به عبر تعليقات عبر ال "فيس بوك" ، الا ان رجال المباحث كانوا له بالمرصاد حيث قاموا بتحديده وضبطه وأداة الجريمة وتولت النيابة التحقيق .
بداية اكتشاف الجريمة عندما تبلغ لقسم شرطة المقطم من إحدى المستشفيات بإستقبال سائق مصاب بطعنات نافذة وجروح متفرقة بالجســـم توفى أثناء إسعافه ، وعامل مـصاب بجرح قطعى باليد مقيمان بدائرة القسم.
وفور اخطار اللواء محمد عبد الله مدير الإدارة العامة لمباحث القاهرة وجه بسرعة الانتقال والفحص وبسؤال المصاب قرر بحدوث مشادة كلامية بينه وبين عاطل مقيم بدائرة القسم بسبب خلافات سابقة بينهما لاعتقاد الأخير بقيامه بالتشهير به عبر تعليقات على موقع التواصل الإجتماعى "فيس بوك" تطورت إلى مشاجرة تدخل على إثرها الأول لإنهاء الخلاف فقام المتهم بالتعدى عليهما بإستخدام سلاح أبيض "مطواة" مُحدثاً إصابتهما التى أودت بحياة الأول، ولاذ بالفرار أمكن ضبطه.
بمواجهته اعترف بارتكاب الواقعة ، كما تم بإرشاده ضبط السلاح الأبيض المُستخدم فى إرتكاب الواقعة بمسكنه فتم إتخاذ الإجراءات القانونية.
