خلص على أبويا قدام عينيا.. تفاصيل مثيرة في مقتل حداد المرج.. شاهد

"ضرب ابويا قدام عينيا في قلبه وخلص عليه وكان كمان هيقتلنى انا  بعده بس في المستشفى لحقوني وكان دمي هيتصفى".. بتلك الكلمات بدأ مؤمن نجل الحداد ضحية مسجل خطر بمنطقة المرج حديثه لصدى البلد ليكشف لنا تفاصيل مقتل والده في نهار رمضان.

تفاصيل الواقعة

فيقول مؤمن:"اللى حصل انه في أواخر شهر رمضان كنت سايق التوك توك بتاعي وركنته على جنب ، وحد قالي ان المتهم اخد اللعبة المحطوطة عليه، ولما خرجت بعد كده وشوفته قولتله انت أخدت اللعبة من على التوك توك، فقعد يشتم فيا وعاوز يضربني فسيبته ومشيت".

خلص على ابويا قدام عيني

وأضاف نجل الضحية:" بعد كده بشوية وقت لاقيته وصل عند البيت وابويا نزل له وهو كان بيشتم وبيقوله نزلى مؤمن هضربه، وابويا فضل يهدى في الموضوع ويقوله حقك عليا علشان الموضوع ميطورش أكتر من كده، ولكن هو فجأة طلع أداة حادة من جيبه وطعن ابويا في قلبه ووقع فى الحال على الأرض".

وتابع:" بعد ما شوفت أبويا سايح في دمه نزلت أجري عليه وأحاول إنقاذه لاقيت المتهم طعني بالأداة الحادة في ضهري وسقطت على الأرض أنا كمان غرقان في دمي، وودوني المستشفى وانقذوني  لكن ابويا مات غدر بسبب مسجل خطر واللى بيعمله".

المتهم مسجل خطر وسوابق

واستكمل نجل الضحية:" المتهم ده مسجل خطر وكان محكوم عليه قبل كده بالسجن ١٠ ستين، وهو بيبيع مخدرات وعامل مشاكل مع اى حد في المنطقة، وأنا ابويا راجل في حاله شغال حداد من البيت لورشته للجامع ومش بيعمل مشاكل مع حد خالص".

القصاص من المتهم 

واختتم نجل الضحية:" كل اللى عايزه انا هو حق ابويا اللى راح غدر وأشوف المتهم محكوم عليه بالاعدام علشان حقنا يرجعلنا بالقانون والمتهم ياخد جزاءه على اللى عمله واحنا في دولة قانون بتحافظ علينا".