EN
نشر الفنان ياسر عزت تعليقًا عبر صفحته على موقع التواصل الاجتماعي فيسبوك كشف فيه عن موقف صعب تعرض له من قبل فنان كبير رفض ذكر اسمه، حيث سخر منه أثناء زيارته لأحد أماكن التصوير التي كان يشارك فيها الفنان محمد لطفي.
ياسر عزت يكشف عن موقف لفنان سخر منه
وقال ياسر عزت في منشوره: "بمناسبة البوست بتاع الكاتب والمؤلف محمود حمدان بخصوص الفنان أحمد آدم، مرة زمان كنت بعمل مسرحية اسمها (كاليجولا)، وجه الفنان محمد لطفي يتفرج وعجبه العرض، وصارت صداقة على الضيق كده. وكان الفنان محمد لطفي بيصور فيلم وقتها فيه نجوم كتير أوي، وإخراج مخرج كبير. طلبت منه إني أروح أزوره في التصوير، وأهي فرصة يمكن يكون فيه نصيب لشغل يعني."
وأضاف ياسر عزت: "رُحت اللوكيشن واستقبلني الفنان محمد لطفي كويس جدًا، مع إني مكنتش صاحبه أوي بصراحة. وصادف إن الكاست كله كان متجمع وقاعدين مع بعض، نجوم الفيلم كلهم. فخدني من إيدي ودخل قالهم: ده ياسر عزت، ممثل، وشُفته بيعمل (كاليجولا)، وممثل جامد جدًا."
"فكان موجود نجم أكبر الموجودين سنًا، رد عليه وقاله: يا سلام... ممثل جامد جدًا؟ هي المشرحة ناقصة قتلى يعني؟! إيه جامد جدًا دي؟!"
وواصل ياسر عزت: "مفهمتش ساعتها هو بيتكلم بجد ولا بيهزر ولا إيه بالظبط، بس خدت الكلمتين ومن اللوكيشن على بيتنا، وحتى ما قابلتش المخرج. النجم الكبير مش بس كبير بنجوميته، لا، ده كبير باحتوائه للأصغر منه في الشغلانة. والدعم للصغير ده واجب على أي نجم كبير؛ حتى لو مش يشجّعه، ميُحبِطُهوش. لأنه بسبب كلمة أو تصرّف ممكن يبطل الشغلانة أساسًا."
"طبعًا أنا مش هقول اسم النجم الكبير ده... أحسن الناس الكيوت الملايكة أم جناحات تشتمني، وأطلع قلبي أسود ومبسامحش، وربنا مش هيكرمني أبدًا."
