EN
شهدت حدائق الدقهلية اقبالا شديدا من قبل المواطنين وبرفقتهم أطفالهم، وسط سعادة كبيرة، حيث اعربت احدى السيدات وتدعى ماجدة محمد عن سعادتها بقضاء يوم النسيم وسط الحدائق وبصحبتها ابنتها واحفادها قائلة:"أسعد يوم لما بقعد مع ولادى واحفادى واحنا اتغدينا فى البيت من بدرى وخرجنا نقضى يوم بره ونفسح الولاد".
وأضافت: "الواحد ما بيصدق يوم شم النسيم ييجى بنستناه من العام للعام وبناكل فسيخ ورنجة بس الأولاد بيحبوا الفسيخ اوى وبنجيب كميات كبيره من نبروه عشان يشبعوا لان شم النسيم ليه معنى تانى خالص، ومعاه الملانة والترمس والبصل ده يوم جميل وسط ولادى ودى عادة بقت عند المصريين من زمان اوى".
وقالت منى ابراهيم "ربة منزل" ان "زوجها يعمل فى محافظة اخرى وينتهزون فرصة تواجده فى الاجازة ويوم الاعياد يسعدون بوجوده معهم وان اطفالها الثلاثة يقومون بالتنزه ويسعدون بيوم شم النسيم وان الفسيخ وجبة اساسية فى هذا اليوم".
أما محمد فرج "مدرس" فيقول "يوم شم النسيم بنتغدى فى حديقة الحيوان والاولاد بيشاهدوا الحيوانات زى الاسد والجمل والطيور واخر اليوم اخد اولادى وأوديهم المركب وبنقضى يوم جميل هناك وبيروحوا فرحانين لانى بعوضهم فى اليوم ده".
