ثروت عاشور ىكتب :حكومة فى وضع تسلل!! وأهداف غير شرعية

"اذا ذكرت نهب فلوس الغلابه فحدث ولا حرج "

فقد ظهرعلينا عباقرة الزمان" قراصنة الفضائيات " فى غياب المسئولين ،، طريقة جديدة للسطو على أموال الغلابة فى مصر، فبعد أن انكشفت طريقة سرقة البنوك فكروا فى طريقة جديدة يستولون بها على أموالنا ، فحفنة من الناس تكسب ملايين وملايين من الغلابه يضربون كف على كف !!

هؤلاء العباقرة الجدد يلعبون على الاوتار الحساسه للغلابه فتشعر انها عصابة من افراد مرتبطين ببعضهم جلسوا سويا ودرسوا أحوال الناس أكثر من الحكومة نفسها وعرفوا نقاط الضعف وبدأو يجهزون الخطط لكيفة كسب معركة العصر من خلال الفضائيات لابتزاز الغلابه ..

عايز تخس أو عايزه تخسى عندنا الحل اتصل بنا على رقم 000099900 وسوف تجد وتجدى عندنا الحل ، هنعبى لك شوية هواء فى كيس مسحور هتشم الهوا اللى فى الكيس هتخس فى اليوم كيلوجرام !! يعنى فى الشهر هتخس 30 كيلو بدون أى مشاكل لا أبرصينية ولا أدوية فرقمنا على الشاشة هو الحل الاكيد أسأل مجرب ولا تسأل طبيب ..

عايزه تولدى بدون ألم أتصلى على رقم 090096600 هتلاقى حل يريحك وتولدى بدون ألم .. فى شجرة مبروكه فى جنوب سيناء عصرناها فى الخلاط الحديد !! هتاخدى 5 سم فى الوريد بعدها مش هتحسى باى ألم وهتفقوى تلاقى ابنك جنبك بيلعب وبينادى عليكى ماما ماما !!

عايز تتعالج من السكر بدون حقن ولا دوا كل يوم على الريق ، اتصل على رقم 00963600 هتلاقى اجابة عن كل ما تبحث عنه ،، هتبطل الحقن وهتشفى من السكر نهائيا ،، فى تعويزه هيقراها عليك راجل بركه فى التليفون!! بعدها ب12 ساعه هتشفى من السكر نهائيا بس لازم تفضل مفتح عينك 10 ساعات ومش تغمضها علشان مش تروح بركة الشيخ !! مش تنسى تتصل على رقمنا اللى ظاهر قدامك بوضوح على الشاشة وممكن تتصل من اى مكان حتى لو كنت واقف فى طابور العيش !!

عايز تكون بطل كمال اجسام وتضرب كل الناس اللى ماشية فى الشارع ،، تعالى عندنا الحل اتصل على 0000000000000 ( صفر المونديال )- أغلى صفر على قلوب المصريين - هتلاقى عندنا الاجابة عن كل ماتسأل عنه راجل اسمه عفركوش !! هينفخ فى ودن كل متصل 3 مرات يوميا لمدة أسبوع بعدها هتصبح بطل فى كمال الاجسام واللى يكلمك كسر عظمه لانه قوتك فيها بركة عفركوش ..

عايزه تفتحى وشك وترجعى 30 سنه للوراء وتشيلى النمش الاسود من الولاده والجلوس امام البوتاجاز اتصلى على 088006600 ،، هتلاقى علاج فورى لكل ما يأرق عليكى حياتك ،، ويخلى جوزك يضحك فى وشك كل يوم بدل التكشيرة المعتاده اللى بيتحفك بيها كل يوم وانت عارفه ليه ؟ كل ما يبص فى وشك نفسة تتسد من البقع السودا ،، ربنا يبيض ايامك وايامه عندنا احنا فى مركز( أدى ظهرك لزوجك) حلول أكيده هيكلمك متخصص وهيقولك خلى زوجك يملا كأس ميه ويحط علية 23 حبة ملح ونص !! ويرشك بيهم فى وشك كل يوم قبل الاكل وشك هيفتح فى خلا 13 يوم ومش تنسى تدعى لمركزنا العالمى وأسفين ان كنا طولنا عليكى فى المكالمه لزوم النهب ..

مش بتخلف وعايز تخلف عندنا الحل الاكيد اتصل بنا على رقم 009966300 هتلاقى عندنا الدنيا حاجه تانية ،، مافيش عندنا مايطلق علية عقم!! احنا عملنا تعويزه لكل اللى يكلمنا ويذكرنا بخير تتمحى من حياته كلمة عقم ،، جرب وكلمنا وفى خلال 21 يوم و21 دقيقة و21 ثانية هتلاقى مراتك بتقلك أبنك تعبنى من كتر الحركة وطبعا تعويزتنا جايه من على سطح القمر دفعنا فيها دم قلبنا ولازم نعوض كل اللى دفعناه لأولاد الهرمه على مدخل سطح القمر !! لانهم طماعين جدا لكن ملحوقة ،، فى غلابة كتير على الارض هنرجع منهم فلوسنا تانى مليون ضعف وفوقهم بوسه و5 عيال دول ناس مافيش حد بيسأل عنهم وغلابه اللى هنقولة هيصدوقة على طول ..

دايما الواحد بيخلى الحاجه الحلوه لبعد الاكل فاكهة العصر وعبقرى هذا الزمان وقول يا عم اى كلام حلو وألقاب جميله فهذا هو هو.....؟ استنى لما نضرب ليه سلام جمهورى ثم سلام خاص هو ألفه لنفسه علشان لو مش بتشوف تليفزيون وبتسمع الاذاعه تعرف ان الناس بتحيى المفتش كرومبو!!

المفتش كرومبو حصل على خمس ترقيات مره واحده وهو فى (االكيه جى ون) ولاعذاء للمبى ،، كرومبو تعليم بره لف بلاد العالم كله حتى حصل على دراسات عليا فى كيفية التعامل مع الغلابة لانه قال فى حديث لمجلة ( تى تى اف ) أنه مهتم منذ الصغر بالغلابة وعندما درس الشعب المصرى لقى ان عندهم أحلام كثيرة عايزين يحققوها وفى نفس الوقت بيحبوا الفوازير وحل الالغاز ..

فذكر ان جده منع نفسه عن الاكل وحلف ميت يمن انه مش هياكل الا لما يحل اللغز!! وللاسف مات جده من شدة الجوع لانه مش عرف يحل اللغز ، وصارت صدمة للمفتش كرومبو فقرر لما يكبر يهتم بالغلابه اللى ذى جدة راجل مكافح موت نفسه علشان يحل اللغز فى اكتر من كدا كفاح ؟ أبدع كرومبو فى دراستة للشعب المصرى قال انا عايز أخلى أسمى يتردد على كل لسان من خلال تغيير الثقافه العامه للغلابه ،، هم بيسموا اولادهم محمد ومحمود وناجى وعلى ومصطفى انا بقى هادخل قاموس جديد على لغة الغلابه حبوزو لاوى بوزه وصبرى كادبرا وشلاطه بتاع البطاطه وعبده مش طايق نفسه منها اسماء جديده ومنها شعر يتغنى بها الغلابة لما يشتد عليهم الجوع وظلم الزمان ..

فى تصريح للمفتش كرومبو لمجلة( خليك ماشى على كيفك) التى تصدر على مداخل سطح القمر : انه غير راضى عن طريقة تعليم الغلابه لاولادهم فى الوقت اللى الناس طلعوا القمر وأنا اكبر دليل على ذلك فى ناس غلابه لسه بتعلم اولادهم ان دا قلم ودا كراسه وهذا كتاب وذاك عمك وتلك خالتك ،، انا بالطبع مش مبسوط لهذه المفاهيم القديمه احنا فى عصر النت والقمر،، لازم الولد ينزل من بطن امه عارف مين اللى سرق سيد اوفسايد ومين اللى خرم الكرة ومين اللى سرق الموبايل دى مفاهيم جديده انا جايبها من أغلى حته على سطح القمر ولازم نعلمها لولادنا علشان نقدر فى يوم ناخد تاشيرة دخول سطح القمر..

انا جربت هناك الاسئله صعبه وغير الاسئله اللى يعرفها الغلابه وواجب علينا توعيتهم ،، منها يتثقفوا ومنها أكون نفسى لان الراجل اللى قاعد على بوابة سطح القمر اتخانق معايا وطلب منى 100 مليون جنيه مصرى علشان يسمح لى بالدخول !! وأنتوا عارفين ان ما احصل عليه من فوازير و طرق جديده فى التعليم بتحتاج ملايين فلا تبخلو عليا واتصلوا علشان تساعدونى حتى لودفع كل غلبان جنيه واحد وشكرا لحسن تعاونكم معايا ولا انسى تقديم شكرى واعتزازى لكل المسؤولين عن الغلابه لانهم منحونى فرصه لتكوين نفسى وتامين مستقبل اولادى " الواد بوقلش والبت شايفاهم !!

بس لنا عتاب على أصحاب الافكار العبقرية : نسيوا اهم حاجه يبحث عنها الغلابه اكترمن الاكل: نسيوا يضحكوا الغلابه !! الغلبان بيبحث عن الضحكه بإبره " صينى " ونفسه يضحك ولو مره كل شهر على شان وشه كرمش من قلة الضحك ،، مافيش شجرة مبروكه للضحك ولا حجر كريم على سطح القمر نكسره ونعمله عصير للغلابه علشان يضحكوا هذه دعوه لتجار سعادة هذا الزمان عايزين حاجه تضحك الغلابه مش تضحكوا على الغلابه ..

لكم الله يا غلابه رئيس الوزراء مشغول عنكم ،، وزير الاعلام لا يشاهد التليفزيون!! وزير التعليم مافيش حد قاله ان فى ثقافه جديده تغزو الغلابه ،، وزير الصحه مش عايز مشاكل رغم علمه ان المفتش كرومبو بيتريق على الاطباء !! وزير الاتصالات مغمض عينه لان الوزاره متورطه فى الموضوع وبتستفيد من فلوس الغلابه ،، وزير الرياضة مش عايز يقول الحقيقه إن مجلس الوزراء كله واقف فى الاوفسايد وان اهدافهم غير صحيحة ..

هل ستقف حكومة هشام قنديل فى وضع الشرود ؟؟ أم ستصحح وضعها لتصبح أهدافها شرعية لتكسب رضاء الجمهور ؟؟