«مش بس الشقق».. شركات التشطيبات تحارب الركود بأنظمة التشطيب بالتقسيط

"عملنا عرض اسمه الطلقة"/ العرض فيه تشطيب للشقق بأقل سعر للمتر يبدأ من 900 جنيه، وأقل فائدة 7% علي كل سنة من المتبقي وأقل مقدم 30% وأطول فترة سداد من 1 سنة حتي 10سنوات. ولو القسط علي 24شهر هيكون بدون فوائد بس المقدم هيكون 50% المواصفات ..لو الشقة طوب احمر سعر المتر، هيزيد150جنيه على هذه الباقات.. العرض المذهل 900 جنيه" هكذا أعلنت إحدي شركات التشطيبات والديكور عن عرضها للتشطيب بالتقسيط، لحل ازمة إرتفاع أسعار الخامات وعدم إقبال أصحاب الشقق السكنية علي التشطيب.

تشطيب بالتقسيط

وبالتواصل مع مسؤلي شركة التشطيبات، ويدعي احمد خليل، أفاد أنا خامات التشطيبات شهدت ارتفاعات سعرية بنسبة أكثر من 100 % عقب ارتفاع الدولار وتعويم الجنيه، وهو ما اضطرنا للاتجاه لعمل أنظمة لتقسيط التشطيب، حتي لا نعاني من الركود وعدم العمل.

أسعار العروض

"سعر متر التشطيب يتراوح ما بين ألف جنيه و 1400 جنيه أما التشطيب الهاي لوكس فيصل إلي 2000 جنيه للمتر، وهناك خامات مستوردة يطلبها الزبون أو الخامات الأصلية المعتمدة خاصة في أعمال الكهرباء والسباكة والتي يجب أن تكون من أجود الخامات لضمان سلامتها، كما إرتفعت أسعار تشطيبات الأسقف المعلقة وأعمال الجبسون بورد والاضاءة والكرانيش، والزبون يحدد حسب قدرته المالية".. حسبما شرح.

مبادرة وهدايا

مبادرة أخري لإحدي شركات التشطيبات "معانا دلوقتي في مبادرة افرش وشطب شقتك باسعار التكلفة.. معانا هتشطب وتفرش بيتك وتقسط من غير فوايد وكل ده بسعر التكلفة وباعلى جودة كل ده هتلاقيه عندنا وبس..دلوقتي معانا بس هتلاقي اسعاراسعار بتبدأ من 950 جنيه للمتر، و شطب 1150 جنيه للمتر وهتاخد خصم 10% على الفيرنتشر، ومطبخ هديه متر ونص، وشطب ب1400 جنيه للمتر وهتاخد خصم 20% على الفيرنتشر ومطبخ هديه، أو شطب بـ 1700 جنيه للمتر وهتاخد خصم 40% على الفيرنتشر كامل".

مساعدة الشباب

وبرر صاحب الشركة عروض وهدايا التشطيبات قائلا "أغلب الشباب داخل على الجواز ومتبهدل بين الشقة واقساطها وازاى هيشطب وكل حاجة غالية، حاولنا نقدم عروض تساعد الشباب، وتساعد الشركة في حالة الركود بسبب عدم الاقبال، وحتى المقدم هيتقسط وبدون فوائد على اقساط شهرية، وافضل تشطيب واروع الديكورات واجود خامات".

أسباب الاقبال

عبدالرحمن محمد، فكر في التعاقد مع إحدي شركات تقسيط التشطيب، بسبب تعثره المادي "بدأت في التواصل مع إحدى هذه الشركات، واوضحت للمهندس المسئول بعض التفاصيل عن مكان الشقة ومساحتها، وشرح باقات الأسعار المتوفرة لديهم، وحسب حالة الشقة وما تحتاجه من صيانة، وعرض نظام دفع الأموال، وبعد كدا عمل معاينة للشقة وعرض الديكورات علي برنامج ثري دي، عشان أشوفها قبل التنفيذ".

طريقة التعامل

"كان لازم اروح معاهم وهما بيشتروا الخامات والشركة وافقت، عكس شركات تانية رفضت دا، لان كل همي أتأكد من جودة وأسعار الخامات، ودفعت المقدم وبتابع التشطيب وهستلم بعد 3 شهور، والقسط مع بنك مصر"..يتابع.

نصائح هامة

وحول نصائح التعاقد مع شركات التشطيب بالتقسيط شرح "عبدالرحمن" أنه لابد من التأكد من جوده الخامات، وملائمتها للسعر "لازم تسأل اكتر من شركة ومن مهندس ديكور، عشان ميضحكش عليك، لان في شركات بتنصب وتبالغ، وأنا جبت مهندس قريبي تابع معي خطوات التشطيب خطوة بخطوة ودا طمني".

وكشف "في عقد ما بيني وبين الشركة، لو لقيت حاجة مش تمام، ممكن أفسخ العقد او تتحمل الشركة إعادة التشطيب، واغلب الشركات لا تريد أن تخسر سمعتها في السوق، وبيلتزموا بإصلاح أي أضرار تحدث خلال التشطيب".

البعض يرفض

بينما رفض منير السيد، فكرة التشطيب بالتقسيط "عاملة زي القرض، طيب ما أسحب قرض واشطب بنفسي ، واشتري خامات جيدة وبسعر السوق من الموسكي والعتبة ووسط البلد، بدل ما يشطبوا بخامات صيني رديئة ومش بتعيش، لان الشركات بتستغل ظروف الشباب وعدم وعيهم، ومش بيراعوا ضميرهم في التشطيب".