بريح وشى.. دعاء فاروق: ثقتي فى نفسى زادت أكتر بدون مكياج

أجابت الإعلامية دعاء فاروق عن تساؤلات المتابعين عقب ظهورها بدون مكياج عبر صفحتها الشخصية على موقع الصور "إنستجرام"،حيث نشرت مجموعة من الصور لها من حلقات برنامجها ظهرت فيها بدون مكياج فى شهر رمضان .

وعلقت دعاء فاروق على الصور: "ناس كتير سألتنى ليه مش بتحطى مكياج وناس تانية سقفت وشجعتنى عشان طلعت من غير مكياج على الشاشة لأول مرة منذ عشرين سنة ، قابلتنى بنت فى الصلاة قالتلى انتى أول مذيعة تطلع على التليفزيون من غير مكياج وانا مش متأكدة من المعلومة دى يمكن حد عملها قبلى".

وأضافت: "طيب عشان لا أدعى أى بطولة ولا أدعى نية مكانتش فى نيتى ،أنا عمرى ما تخيلت إنى أطلع على التليفزيون من غير مكياج أو على الأقل من غير كحل فى عينى ومن غير كونسيلر وفاون دوتان.

وتابعت: " طبعا ده مش وارد نهائى ..اللى حصل إنى طلعلى دمل كبير فى عينى وكان لازم ترتاح ومحطش أى كحل فيها الكلام ده قبل رمضان بكام يوم وظهرت فى آخر حلفات بهية بنظارة علشان أدارى الدمل.. وراح بعد ثالث يوم فى رمضان وكنت طلعت فى أول حلقات بنظارة وبعد كده خدت قرار إنى أكمل كده ، ناس كتير شجعونى بكلامهم وإن شكلى حلو وصغير وأحلى من غير مكياج وناس استغربونى وناس أقل منهم قالوللى شكلك شاحب ".

وتسائلت هل عدم وضع المكياج دليل على الصلاح أو الالتزام والتدين ؟ الإجابة على حسب النية والنية كانت إنى بريح وشى وبعدها كانت النية إنى أكمل عشان الناس قالتلى شكلك صغير وبعدها تم تجديد النية إنى أكمل كده طول الشهر زهدا فى المكياج حتى فى العزومات والخروجات الرمضانية وفى النهاية أنا زى ماانا داخليا وروحانيا سواء بمكياج أو بدون ولكن خدت ثقة فى نفسى أكتر بدون مكياج لكن هل ياترى مش هحط مكياج تانى ؟

وأجابت " أنا هحط مكياج بعد كده صحيح هخففه لأنى خدت ثقة رهيبة بعد ما مسحته بالكامل وبالتالى مش مضطرة أحطه تقيل ، لكن هل يا ترى تعليقات المدح الكثيرة ومحاولات وضعى فى منطقة الصالحين هتنقلب عليا ونفس الناس اللى مدحونى هيقلبوا عليا عشان هحط كحل وماسكرا ! الموضوع خد أكبر من حجمه لدرجة إن آلاف التعليقات على الأسئلة الدينية على صفحة قناة النهار كانت كلها على شكلى فقط" .

وتابعت: "الناس هنا بينتقدونى عشان بتصور وبيقولوا إنى بتاعت برامج دينية بتتصورى ليه؟ طيب أنا فى البرامج الدينية ذات نفسها ملقتش حد علق على الموضوع اللى بنتكلم فيه والناس مركزوش غير فى مظهرى وبس ..يبقى مين بيركز فى الشكل انا ولا الناس ، بشكر كل اللى شعونى واتمنى أن نلتفت للجوهر أكتر من أى مظهر لإن المظاهر بتخدع" .