EN 
هنقابل مواقف حياتيه كتير هتلاقي نفسك بتلف وتدور في دايره الحياه الفرح والحزن وبتتجاوز ولكنه تجاوز حزين وهتلاقي نفسك لازم تدوّر على حد مطحون زيك يقدر يستوعب صراعاتك وضغوطك في الايام الصعبة.
دوّر على حد من كتر ما شاف وجرب قادر يستوعب رحلتك ومستعد يكتشفك معاك ومايزهقش..
دوّر على حد "مجروح مشفي" يقدر يعيط معاك اه، بس في نفس الوقت قادر يساعدك ويوقفك على رجليك تاني..
قرب من اللي عدى في خبرات اكتئاب وطلع منها صالب طوله.. دول اللي دايقين مرارة الحياة وشايفين فيها برضو الحلو..
وصدقني ما هايقف جنبك ويسندك اوقات كتير غير شخص زي ده شاف اسوأ ما في الحياة وقرر يكمّل للآخر..
أصل الحياة فعلًا صعبة.. واحنا صعبين.. وبنصارع عشان نفهمنا قبل ما نفهمها.. ومفيش حاجة هتساعدك في رحلتك غير حد كتفُه في كتفَك يكتشف الحياة معاك ويسدّ في صراعاتها لحد ما توصلوا انتوا الاتنين لنهايتها..
لما تيجي تختار، اختار حد كدة.. شبهك .. يشيلك وقت ما تبقى مش قادر حتى تشيل نفسك .. اختار حد من كتر ما شاف واتعلم، روحُه توصل لروحك -رغم لخبطة الكلام وصعوبته- وتحتويها .. روحُه تقدر تونّس روحك وسط قسوة وعشوائية وعبثية الحياة..
لأن لو اختيارك غير كدة هتكمل لوحدك حتى لو ارتبطت .. غير كدة هاتشيل الشيلة كلها على كتافك .. غير كدة هاتبقى لوحدك حتى لو لازق في حد تاني بقيت حياتك، اصل الونَس مش بقرب الجسد لكن بقرب الروح.. فاختار اللي روحه تونسك وتدفي برودة الحياة حواليك .. لأنه لو معملتش كدة .. ماظُنش هاتقدر تكمّل لوحدك كتير..
