شادي محمد:

• الجيل الذهبي للأهلي «مُهمش» و«مكروه» في مصر
• بنتهاجم من ناس ملهاش قيمة ولازم نحصل على وضعنا بعد ما قدمناه
• بيهاجموا أبو تريكة وهما ميوصلوش لربع إنجازاته
• أنا مش «عاطل » ولا مستني أشتغل في قناة الأهلي 
• أنا الكابتن التاريخي للأهلي ومن يهاجموني «أقلية»
• البحث عن الشهرة وراء الهجوم على الأهلي
• بكره الأهلي دي تتقال عند الحلاق مش في التليفزيون
• من حقي أنتقد الأهلي وأدافع عنه في أي وقت
• التعصب طبيعي بعد اللي بنشوفه من رؤساء الأندية

شادي محمد الكابتن التاريخي للنادي الأهلي في جيله ذهبي صعب أن يتكرر مرة أخرى بعدما شهد جميع أنواع التتويج المحلي والقاري والعالمي، ولم  يكن يعرف سوى رفع البطولات وصناعة الأمجاد وكتابة التاريخ للقلعة الحمراء، حيث رفع شادي محمد 18 بطولة للنادي الأهلي. 

ويعد شادي محمد أبرز من حمل شارة الكابتن في تاريخ الأهلي، ويملك تاريخًا حافلًا داخل جدران القلعة الحمراء الذي استطاع أن يلفت أنظار مسئولي النادي بشدة خلال فترة تواجده في نادي الكروم، حتى تم التعاقد معه فى عام 1999، بعد ظهوره مع المنتخب الأولمبي ليرفع أكبر كم من الكؤوس على منصات التتويج وحصل على بطولات عديدة مع جيل وصف بأنه "الأفضل" في تاريخ القلعة الحمراء، يعشق المناطق الشائكة، يهوى الآراء الجريئة، ومثلما كان مدافعًا عن الأهلي في أرض الملعب يظل مدافعًا عن الكيان الأحمر في كل مكان، شادي محمد كابتن الأهلي الأسبق فتح قلبه لـ"صدي البلد" في حوار لا تنقصه الصراحة.

بصفتك كابتن الجيل الذهبي للأهلي .. لماذا توارى هذا الجيل عن الأنظار؟

جيل الأهلي الذهبي مُهمش بطريقة غريبة، الجيل اللي أخلص ومفروض يتمكن في جميع الجهات الرياضية المختلفة لا يتواجد منه على الساحة أحد حاليا في واقعة غريبة لا أفهمها دا حتي  الناس بتتضايق من الجيل دا جدا وبيتكلموا عليهم بأسلوب غير لائق ودا دليل على كرههم للجيل الذي أثرى تاريخ الأهلي بالعديد من البطولات لاعبي فهذا الجيل يستحقون التواجد على الساحة الرياضية المصرية بسبب إخلاصهم للأهلي والمنتخب على حد سواء.

 

ما هي أسباب الهجوم على هذا الجيل؟

مش عارف سبب الهجوم إحنا عمرنا ما سمعنا عن لاعب في الجيل دا طلب فلوس ولا تفاوض على تجديد ولا حتى افتعل مشكلة مع إنه جيل صعب تتعامل معاه؛ لأنه كان يضم ما لا يقل عن 18 نجما من نجوم الصف الأول وقوام أساسي لمنتخب مصر وحملوا جميع أنواع البطولات مع الأهلي وجميع المتواجدين علي الساحة حاليا بيتكلموا عليهم ويهاجمون وائل جمعة وأبو تريكة مثلا بطريقة غريبة مع أنهم كان آخرهم يتفرجوا عليهم وهما بيكسبوا الناس دي حرفيا مكنتش بشوف غير الأهلي بيكسب بس و عمرهم ما يوصلوا للي وصل ليه الجيل دا وليس لهم قيمة بجوار هذا الجيل.

 

أليس من الوارد أن يفشل هؤلاء النجوم عند ظهورهم على الساحة؟

لما حد ياخد فرصة من الجيل بينجح ويحقق حاجات حلوة كثيرة وعماد النحاس مثال على ذلك بعد توليه المهمة الفنية للمقاولون العرب نجح في تطويره وجعله ينافس على المركز الثاني بأداء عال لم نكن نراه بالمقاولون  من زمان.  

 

ما سبب الهجوم الكبير عليك خلال الفترة الماضية؟

لأني بدافع عن الأهلي من أي مكان وفي أي وقت وأنا شايف إن حقي أنتقد أي حاجة شايفها غلط في الأهلي بعدما كنت كابتن جيل قعد عشر سنين مكتسح كل حاجة، وهو الجيل اللي كسر حاجز الخوف للأندية والمنتخب من مواجهة شمال أفريقيا وجعلهم هم من يهابوا مواجهة اسم مصر في جيل لن يتكرر مرة أخرى نجوم حققوا كل حاجة كانوا هما المنتخب وفي الآخر بيتهاجموا بمجرد ذكر اسمهم بطريقة غريبة.

 

ما ردك على هذا الهجوم؟

كل اللي هاجموني دول أقلية أنا بقولهم أنا ليا صورة بالميداليات ابقوا اتفرجوا عليها وانتوا تعرفوا أنا مين، ولو لسه معرفتوش أنا بقولكوا أنا شادى محمد كابتن الأهلي التاريخي عملت تاريخ بمجهودي وعرقي ولازم آخد وضعي أنا وكل جيلي بعد ما رفعنا اسم الأهلي لأبعد حتة وعلشان حد يوصلنا محتاج سنين علشان بس يقرب من الأهلي في الصورة مش يكون جنبه.

 

ماذا تتوقع أن يقال عنك بعد هذا الكلام؟

هيتقال بيعمل كدا علشان يرجع يشتغل في قناة الأهلي وبقولهم الأهلي بيتي وأنا خدامه وطول عمره خيره عليا بس أنا مش عاطل ولازم تعرفوا بتتكلموا عن مين كويس أنا رفعت بطولات متحلموش بيها أنا معايا 5 دوري أبطال محدش عملها فيكوا، ومش مستني قناة الأهلي علشان أنا حققت اللي محدش حققه قبل كدا وأنا ميهمنيش أشتغل في قناة الأهلي بس يهمني أشوفها رقم واحد والأفضل على الساحة علشان أنا أهلاوى وهفضل أهلاوي طول عمري.

 

ما أسباب الهجوم على الأهلي خلال الفترة الأخيرة؟

كل واحد عاوز يتشهر والناس تتكلم عليه يطلع يهاجم الأهلي طب بص لنفسك وشوف أنت فين والأهلي فين واحد طالع في برنامج يقول أنا بكره الأهلي يا حبيبي الكلام دا ميتقالش على التليفزيون دا يتقال علي القهوة ولا عند الحلاق ولا اللي يطلع يقول ندمان على اللعب للأهلي عملت إيه أنت دنتا كنت بتتحايل علي طوب الأرض عشان بس تدخل الأهلي دلوقتى ندمان حاجة غريبة فعلا ويجب أن يكون هناك رادع لهذا الهجوم غير المبرر.

 

هل يحتاج الأهلي من يدافع عنه حاليا؟

الأهلي مش محتاج حد يدافع عنه علشان اللي بيهاجموا هما اللي بيدافعوا عنه بنفسهم، يعني لما بيتقال أن الدولة والحكام ساندوا الأهلي طلع نفس اللي بيهاجموا قال كلام  لو قعدنا 100 سنة ندافع عن الأهلي مكناش هنعرف نشرح للناس زي مهما عملوا،  فهم خلصوا كل حاجة كان الأهلي يهاجم فيها وتورطوا وأصبحوا يحتاجون إلي من يدافع عنهم.

 

لماذا تدافع عن جيل الأهلي الذهبي؟

من الطبيعي أن أدافع عن الأهلي وعن جيلي أنا كنت الكابتن بتاعهم ولازم أدافع عنهم لأن من حقهم يتمكنوا مش يتهمشوا ويهاجموا الطبيعي إني ألاقي وائل جمعة وأبو تريكة يحللوا في قناة الأهلي مش يحللوا برا مصر خالص وألاقي أسماء متوصلش لربع إنجازاتهم مكانهم.

 

و ما رأيك في زيادة التعصب الرياضي خلال الفترة الأخيرة؟

التعصب طول عمره موجود بالكرة، والدوريات الأوروبية تشهد على كدا ولازم نتعامل معاه علشان الموضوع عادي جدا وموجود في أوروبا اكتر مننا بس في مصر المشكلة مش في التعصب بل في قلة الأدب، وعلي رأي المثل إن كان رب البيت بالدف ضاربا لما نلاقي اللاعبين يتجاوزوا في حق بعض ورؤساء الأندية تهاجم رموز الكرة فطبيعي تلاقي كده من الجمهور ومشكلة مصر في الثقافة كله دلوقتى بيدور على الشو.