EN
كشف المخرج محمد صقر، كواليس التحضير لأغنية “الدنيا لها طعم جديد” التي طرحتها الفنانة أصالة منذ ساعات .
وقال محمد صقر، في تصريح لـ “صدى البلد”: “ الأغنية كانت في الأصل إعلان لافتتاح مشروع مصنع المدينة الصناعية الغذائية عشان تتعرض في حفل الافتتاح اللي حضره الرئيس 3 أغسطس وطورنا الفكرة إننا نصنع أغنية أصلية للحدث واقترحنا ان أصالة هي اللي تغني وأصالة استجابت بسرعة جدا
وتابع : ابتدينا المشروع من شهر مايو والتصوير أخد 3 أيام وانتهى من حوالي أسبوعين وكنا في مرحلة المونتاج والنسخة الكاملة بعيد عن النسخة اللي تعرضت في الافتتاح الرئاسي”.
وأضاف: “كل حاجة كانت ميسرة وكل الجهات ساعدتنا وسهلت لنا عملية التصوير ومواقع التصوير جزء منها كان في مصنع المدينة قبل ما يتم افتتاحه وأخدنا وقت كويس في التحضير لأماكن التصوير المطلوبة وكان فيه تحدي كبير لأن الاغنية معمولة بطريقة الـ Reverse وهي إن كل الاحداث بترجع لورا ومكنش عندنا مرجعية في مصر للطريقة دي التجربة الوحيدة كانت في بداية الالفينات لـ مصطفى قمر، في أغنية منايا وكان المخرج أجنبيا".
كواليس أغنية الدنيا لها طعم جديد
و اختتم حديثه قائلاً: “ده مش اول تعامل مع أصالة أنا اتعاملت معاها كـ Producer قبل كده وفيه علاقة شخصية قوية بتجمعنا وهي الحقيقة كانت سلسة جدا ومريحة في كل التفاصيل والطلبات وتحديدا اللقطة اللي فوق الجسر اللي فوق صوامع القمح لأننا كنا متخوفين لأنها على ارتفاع عالي جدا وكنا فاكرين إنها ممكن متحبش ده ..بس فاجأتنا ز كانت في لحظة فوق ومترددتشي والأغنية طلعت بالجمال ده .. وهي قامت بدور جميل في إن الأغنية تكتمل بالشكل ده”.
“الدنيا لها طعم جديد” من كلمات منة القيعي، وألحان إيهاب عبد الواحد، وتوزيع علي فتح الله، وإخراج محمد صقر.
يذكر أن إفتتاح الرئيس عبد الفتاح السيسي الثلاثاء 3 أغسطس مصنع المدينة الصناعية الغذائية "سايلو فودز " بمدينة السادات محافظة المنوفية فضلاً عن عدد من المشروعات الأخرى بمدن الدلتا.
