مرأة ومنوعات

قايمة المنقولات الزوجية صراع النساء والرجال على.. البنات عايزة تشتري عربيات والشباب : وداعا للحبس

الخميس 28/يوليو/2022 - 04:43 م

اشعل تريند إلغاء القايمة في مصر صراعا بين الفتيات والشباب خاصة عبر السوشيال ميديا بين مؤيد ومعارض وساخر ومقارن بما يفعلونه الأجانب أو من يحن لما كان يحدث في الماضي أو معه بشكل خاص.

ويرصد لكم موقع «صدى البلد» أبرز تعليقات الشباب وكذلك الفتيات على تريند القايمة في مصر أو القايمة والمهر، والذي هو في حقيقته مجرد إشاعة من شخص لاقت رواجا كبير وتفاعلا من الآلاف.

نهلة: الأمان لا يحصر بالقايمة

قائمة المنقولات الزوجية.. كتبت نهلة الديب: «الأمان و القايمة..البنت لما بتدخل علاقة، بتكون من أهم احتياجاتها الأمان، سواء مادي أو معنوي، دي من الاحتياجات المشروعة ، البيتحكم عليها إنها بنت مادية حقيرة، أكيد هتفرق كتير معاها لو بتحبك هي اللي هتبقي مش عاوزة فرح كبير، مش مهم شقة تمليك، مش لازم عفش فظيع، و ده بيعتمد علي ايه بقي، بيعتمد علي البتقدمه من حب لا مشروط، علي طريقتك بالخناق و عصبيتك، علي حاجات كتييير، وصلتوا لمرحلة الجواز بقي، وتدخل الأهل مع احترامي للجيل الجميل صاحب البرمجيات الأثبتت عمليا إنها بتقودنا للهاوية مباشرة، شاب في مقتبل عمره، و بنتك بتحبه، و هي شخصيا راضية بإمكانياته البسيطة، تبدأ انت تعلّي عليه، أصلي بأمن بنتي، و لازم شقة تمليك و لازم تبقي جنب مامتها، و لازم عفش فظيع، و أنا هدفع معاك، أنا عاوزة أفرح بيها، (و يكأن البنت فرحتها و انجازها الوحيد انها اتجوزت😳🙄)، وهتكتب قائمة منقولات ب عشروميت ألف جنيه، عشان متبهدلهاش بعد كدة، مامت العريس و العريس نفسه، ب اذبهلال تام، بتتفركش الجوازة، مش عشان البنت وحشة و ندلة و بتدور علي عريس غني، عشان الأهل فصلّوا الأمان و حصروه ب الماديات، عقبال ما تنسي و تتجاوز و تحاول تتجوز تاني، بيكون بالخلفية خناقات علي إنك هتعنسي طبعا، (ودي أسوء برمجية عدت علي المجتمعات و الله)، بعد سن الناس بتشترطه، بيحسسوا البنت ان في حاجة غلط، تبدأ سلسلة من الترهيب ، و إنك مش هتلاقي بعد كدة أي فرصة، تيأس البنت تبتدي توافق علي جواز الصالونات، و ده طبعا بيكون الأساسي فيه، مش انها عارفاه و حاباهالأساسي إنه مناسب، و الأهل شايفين إنه هيدفع كويس ، و هيكتب قايمة، و هيجيب عفش غالي، و الشقة كبيرة و بمكان حلو، كون إنه هيحبها و لا لأ،هيعاملها ازاي، هتبني معاه حياة هادية و لا لأ، ده مش بالخلفية أصلا عندهم، مادام هيدفع أكيد هتكوني مبسوطة🥺🥺، تدخل الجوازة ، وهي و حظها، أسوء الاحتمالات، بتكون في الضرب و الإهانة حتي لو معنويةتبدأ تموت بالبطئ، تطلب الطلاق، خلاصة الحكاية، القايمة مش هي الأمان، سيبوا البنات تختار و تتحمل نتيجة اختياراتها حتي لو مش عاجباكم ك أهل».

هاني: هفرح لو اتلغت لأنها حبستني 3 شهور

قائمة المنقولات الزوجية.. وأضاف هاني هنداوي: «بمناسبة تريند إلغاء القايمة..أنا لي ذكريات سيئة جدآ في موضوع القايمة ده..انا تم الحكم علي بحبس ثلاثة شهور بسبب موضوع القايمة..مع أن زوجتي السابقة نقلت كل محتويات الشقة بنفسها وأثبت انا هذا في محضر شرطة وكانت نيتها أن تنقله بدون علمي كي تدعي إني استوليت علي فرش الشقة وتحبسني به لكن جيراني وقتها ربنا يبارك فيهم اتصلوا بي ل إبلاغي أنها تقوم بنقل محتويات الشقة فاتصلت بالشرطة كي يقوموا بإثبات هذا..ولكن هي ادعت علي بماهو مكتوب في القايمة من ذهب والقاضي لم يسمع مني أو يستعديني مع أن هناك قاعدة أن البينة علي من إدعي واليمين علي من أنكر..

ومع أنه معروف أن الذهب هو زينة المرأة واستعمالها فكيف يحكم القاضي بالحبس بدون تحقيق وعلي شيء هو من اصل زينة المرأة واستعمالها..ف اضطررت تفادياً للحبس أن أدفع قيمة الذهب في المحكمة ..وفي المرتين اللتين سبق لي الزواج فيهما ام أقرأ أو أضطلع علي القايمة لأني بطبيعتي لا افترض سوء النية في الآخرين..ولكنها للأسف كانت في حالات زواج كتير فخا منصوبا للزوج..من أجل إذلاله وحبسه..أو ابتزازه ماديا..ولهذا انا فعلا فرحت ب إلغاء القايمة..من منطلق إلغاء اسباب منغصات الزواج لأن الزواج أصله وتشريعه من الله أنه مودة ورحمة وسكن والرسول صلى الله عليه وسلم يقول إذا جاءكم الرجل ترضون دبنه ف زوجوه..لم يقل ماله ولا حسبه ونسبه..لأن الرجل الذي يعرف دينه إذا أحب زوجته أكرمها وإذا كرهها لن يهينها وقت الخلاف أو الطلاق..والسيدات اللي فرحانين جدا ب إلغاء القايمة وقالوا إن الرجل مطلوب منه بقي مهر ومؤخر وفرش الشقة بكل صغيرة وكبيرة أو من الإبرة للصاروخ فهذا كله هراء وخواء ..لأن حق الزوجة فعلا المهر والمؤخر..ولكن فرش الشقة يكون حسب مقدرته المالية وليس شروطا تعجيزية.. ومفيش موضوع يفرش شقة ٥ غرف ومطبخ وحمامين أو غرفة الأطفال أو النيش المملوء بكل اختراعات ما أنزل الله بها من سلطان ولم ولن تستعمل لأجيال قادمة ولكن من أجل الفرجة والاستعراض فقط.. الشقة مساحة وفرشا حسب مقدرة الزوج واستطاعته وغرفة الاطفال ليست من شروط الزواج.. ماذا لو لم ينجبوا مثلاً. وماذا عن كفاحهم معا من أجل إستكمال فرش عش الزوجية ولذة كفاح بناء وتوسعة منزل الزوجية..؟!ومفيش حد يقول انها طالما كانت عايشة في بيت باباها في منزل ٥ غرف يبقي لازم الزوج يوفر لها نفس المستوي..المهم قبول الطرفين بظروف الآخر والحب والاقتناع أن غدهما معا افضل وأسعد..والا بقي لو كل واحدة اشترطت شروط تعجيزية من الزوج من مهر تعجيزي ومؤخر تعجيزي وشقة تمليك وأثاث من الإبرة للصاروخ بكل ما هو كماليات ولا احتياج لها ..اذا لم يكون هناك زواج ولا مودة ولا سكن ولا تراحم..وخليك قاعدة في بيت باباك اللي موفرلك المستوي اللي تحبيه..».

عمرو: إزاي البنات تعترض دول هيتهنوا

قائمة المنقولات.. وتابع عمرو جمال: «الأخت المعترضة على موضوع #القائمة وبتقول إن القائمة دي بتحفظ حقي لو حصل طلاق، طب مهو يابنتي الراجل هيعطيكي مهر ( نقداً ) على حسب ما هتتفقوا وتتراضوا، يعني لو اتفقتوا على مهر مثلا ( ٨٠ أو ١٠٠ ألف ) …الراجل هيسلمهملك في ظرف مقفول، بالإضافة إن الراجل هيفرش الشقة كاملة حسب إمكانياته وظروفه، يعني كمان هتوفري المبلغ الل كنتي هتفرشي معاه بيهم، فحضرتك تقدري تحفظي مبلغ المهر + الل هتوفريه من الفرش علشان لو طلقك ( زي ما حضرتك بتستبقي الأحداث ) يبقى معاكي مبلغ يسندك، فإذن حقك موجود اهو، بس انتي ما بتدوريش على كده، بتدوري ازاي يبقى معاكي سكين حاطاها على رقبته باستمرار…. بحيث مع شوية مشاكل… مع شوية تحريض من صاحبتك وبنت خالتك…. مع شوية بوستات من الحركة النسوية تهيجك على الراجل ….تقومي سيباله البيت ويقوم أبو حضرتك جايب رقبته بالقايمة دي … يإما المسكين يفضل عايش مكسور، هيا دي الحقيقة من واقع ما نراه ونسمعه كل يوم حتى لو عقلك لم يدركها لإنك لم تتزوجي حتى الآن».

ياسمين: إلغاء القايمة هيظلم الرجالة والبنات الغلبانه

وتوضح باسمين الشافعي: «ممكن أقول كلمتين في حق #القايمة ، اكتر حد هيتظلم في موضوع إلغاء قايمة المنقولات اتنين ، الأول: الرجل 😃، الرجل يأسس بيت من الإبرة لغرفة النوم "على المستوى المتوسط" -هيتنفخ- الرجالة اللي اتجوزت اصلااا وبتفكر،في جواز تاني وتالت قايمين بالحملة على أكمل وجه والشباب الصغير هو اللي هيلبس

الشخص التاني اللي هيتظلم : البنات الطيبة الغلبانة اللي نفسها بس،تستقر وتعيش مع رجل يصونها ويحميها ..... لو وقعت في رجل معندوش،دين ولا ضمير لأن غالبا هيجهز بيت وهياخد مهرها على مدار السنين اللي،عايشها معاها وخاصة في ظل أزمات اقتصادية صعبة واللي اتعودنا عليه مفيش ست هتبقى معاها قرش وشايفة جوزها مديون او محتاج ومش هتساعده، وبعد ما هياخد كل حاجة هيطلقها ،................القايمة مش بتحفظ حقوق بس ...القايمة مطب بتخلي كتير،من الرجالة تهدي وترجع عن هدم البيت أحياناً».

أسماء: البركة في تخفيض تكاليف الزواج من الاثنين

وتشير أسماء صديق: «مش عارفه الناس بتتخانق على موضوع القائمة والجهاز ليه !!إحنا فعلاً يا جماعة أكتر من 80٪ من الجهاز اللى بنجيبه مالوش لازمة ويمكن الإستغناء عنه بسهولة.. والحياة هتستمر عادى جداً بإذن الله

والكلام ده بالذات يعرفه كويس أوى..أى واحدة اتغربت بعد زواجها ، واضطرت تعيش في شقة غير شقتها اللى مجهزاها ، أنا مثلاً عيشت فى أكتر من شقة إيجار غير شقتى ، وكنت كل اللى واخدها ومكفينى وزيادة مش محتاجة حرفياً أى شىء تانى ( تلاجة صغيرة وغسالة نص _ وبوتوجاز مستعمل 4 عيون وخلاط _ نصف طقم أطباق _ 4 حلل _ كام كوباية على معلقة ) فقط لا غير .... وبالمناسبة ماكنش فى أساس غير سرير ودولاب صغير وسجادة فى الصالة ومفيش تقفيلة مطبخ 😅، وكنت مرتاحة جداً أكتر من شقتى بمراحل وبكيت، وأنا بسيب الشقة وراجعة شقتى تانى 😭 ،الشاهد :_ إننا فعلاً بنبالغ وكل دى تقاليد مالهاش أى لازمة، والحقيقة إننا مش محتاجين كل ده والدنيا تمشى سهلة، وبسيطة على الشباب المقبلين على الزواج وأهاليهم كمان، والحياة تبقى مليانة بركة».

مصطفي: أقدم لكم 3 نصائح قبل التوقيع على القايمة

وقدم مصطفي محمد عدة نصائح قبل التوقيع على القايمة: «• نصيحة قبل التوقيع على #القايمة شروط مهمه لابد أن تتوفر فيها وإلا فهي غير جائزة :١/ كتابة أسعار مستلزمات المنزل الموجودة بالقائمة كما هى عند الشراء بغير زيادة في الأسعار حتي ألا تدخل المرأة في الوعيد المذكور في الآية { ويل للمطففين } والآية لا تنحصر في المطعومات فقط ..٢/ ألا تدخل القائمة تحت بند الأمانة، ولابد أن ينص عليها في عقد الزواج ( كل ما في القائمة من المهر المؤخر ليس على سبيل الأمانة، وكل ما فيها يعد من المستهلكات بين الزوجين وإذا طالبت المرأة بها ترد على الحالة الموجودة عليها إذا وجدت ما لم تتلف ) ويتم إثبات ذلك في عقد الزواج حتي أن تكون القائمة جزء من المهر ..٣/ عند بعض الناس أثناء كتابة القائمة يتم كتابة جرامات ذهب - على اعتبار أنها جزء من المهر - ومن الأولي أن يراعي إذا كان يستطيع إعطاء المرأة قيمة الجرامات متي طالبت بها له أن يوقع على القائمة وإن لم يستطيع إعطاء المرأة فيعلم أنه دين عليه واجب السداد متي طالبت به، والله اعلم».