مظهر شاهين : أرفض ارتداء ابنتي الحجاب دلوقتي وحقها تعيش سنها

نشر الشيخ مظهر شاهين، على صفحته على موقع التواصل الإجتماعي فيس بوك ، منشور أكد فيه أنه يرفض أن ابنته ترتدي الحجاب في هذا الوقت.

وقال مظهر شاهين، في المنشور: "احتفلنا بالأمس بعيد ميلاد ابنتي ، ولأنَّي معَوِّد أولادي علي المفاجآت اللي تفرحهُم، همَّ كمان بيحبوا يعملوا لي مفاجآت تفرحني، المُهم،، بنتي قررت تعملي مفاجأة في اليوم ده تفرحني بيها ، فكَّرِت وفكَّرِت ثم قرَّرَتْ أن ترتدي الحجاب ، وبالفعل لقيتهَا حاطة إيشارب علي راسها وهي فاكرة إن دي مفاجأة حلوة هفرح بيها، إلا أنَّنِي فاجأتُها بإنِّي رافض إنها تتحجب دلوقتي، قلتلها الحجاب جميل يا حبيبتي وربنا بيحبُّه لكن إلبسيه لما يبقي سنك ١٣ سنة، أو لمَّا ماما تقولك، عشان تعيشي طفولتك وتشبعي بيها؟

وتابع: بنتي ماشاء الله أتمت عامها التاسع، أنا حابب إنها تعيش وتفرح بطفولتها بدون أي قيود، ويوم ما تتحجب تتحجب وهي عاوزه كده وفاهمه يعني إيه حجاب، مش عشاني أنا، وسبحان الله لما أنا فكرْت وجدْت إن ربنا سبحانه وتعالي عاوز كده ، ربنا عاوز الأطفال يفرحوا ويمرحوا بدون أي قيود، عشان كده رفع القلم عنهم ومش بيحاسبهم علي أفعالهم لحد ما يوصلوا لسن البلوغ، ساعتها بيبقوا مكلَّفين وبيتحاسبوا علي تصرفاتهم،

واستدل مظهر شاهين، بقول  النبي صلى الله عليه وسلم: «يَا أَسْمَاءُ إِنَّ الْمَرْأَةَ إِذَا بَلَغَتِ الْمَحِيضَ لَمْ يَصْلُحْ أَنْ يُرَى مِنْهَا إِلَّا هَذَا وَهَذَا، وَأَشَارَ إِلَى وَجْهِهِ وَكَفَّيْهِ». رواه أبو داود.
 

ويقول صلوات الله وسلامه عليه: «لاَ يَقْبَلُ اللهُ صَلاَةَ حَائِضٍ –من بلغت سن المحيض– إِلاَّ بِخِمَارٍ».. [رواه الخمسة إلا النسائي].

وتقول دار الإفتاء المصرية ، إن حجاب المرأة المسلمة فرض على كل من بلغت سن التكليف، وهو السن الذي ترى فيه الأنثى الحيض، وهذا الحكم ثابت بالكتاب والسنة وإجماع الأمة.
 

وذكر مظهر شاهين: طبعا مفيش مانع إننا نبدأ نعودهُم وندربهُم ونكلمهُم عن الصلاة والحجاب والصوم وفرائض الإسلام قبل سن البلوغ بحاجة بسيطة، لكن نحاول نمنحهم أطول وأكبر فرصة مُمكنة يعيشوا بيها طفولتهم، عشان وقت ما يبقوا مكلَّفين ويلتزموا يبقوا مش حاسين بإنهم اتحرموا من حاجة يفضلوا يبحثوا عنها طول عمرهم.. ساعدوا أولادكم إنهم يعيشوا طفولتهم ويفرحوا بيها وفيها علي قد ما تقدروا، وربنا يفرحكم ويفرحنا بيهم، ويبعد عنهم كل شر.