مخرج صابر جوجل : سارة سلامة لا تهتم سوى بالمكياج

هاجم محمد حمدي مخرج فيلم صابر جوجل سارة سلامة واتهمها بالاستهتار بعملها وعدم احترامها للمواعيد وكشف عن تفاصيل الخلاف الذي وقع بينه وبينها.

وكتب من خلال حسابه على الفيسبوك : أصدقائي الصحفيين المحترمين حضراتكم ياما كلمتوني وسألتوني عن الممثله سارة سلامة وأنا كنت متمسك بردودي المتحفظة والمحترمة واعتبرت نفسي أكبر من الرد علي تفاهات المدعوة سارة سلامة لكن الحقيقة هي مصممة علي الاستمرار في التفاهات والتصريحات المسيئة لشخصي وللفيلم ولذلك قررت أرد وأوضح بعض الامور الخاصة بعمل الممثلة دي في الفيلم وأهمها أنها تدعي أن السيناريو اللي تعاقدت عليه مختلف عن الفيلم النهائي اللي أنا عملته وبالمناسبة دي هقول أهم واقعة وأغرب واقعة ممكن يشوفها مخرج في حياته حيث أن الممثلة بعد التعاقد واستلام نسخة السيناريو قبل موعد التصوير بثلاث أسابيع لم تقرأ جملة واحدة وده بإعترافها لما حضرت أول يوم تصوير ليها وبعد محاولاتي لعمل جلسات عمل معاها قبل التصوير ودايما مسافرة أو مشغولة أو مبتردش علي التليفون خالص أو قافلة التليفون وهكذا لمدة ثلاث أسابيع ولما حضرت أول يوم سألتها عن قراءتها للسيناريو وكان الرد الصادم الاتي (( بصراحه ملحقتش أقرأ بس أنا عارفه اني طالعة مرات رجب واني مبخلفش ،،، ثم ضحكة طويلة)) طبعا أنا مضحكتش أنا اتخضيت واتصدمت وجالي ضغط وسكر وقلب وزغلله وكل أمراض الدنيا في لحظة واحدة وقولت لنفسي روحنا ف داهية يا حمدي وربنا يسترها بقي ،، ده الحقيقة أهم حدث في أول يوم والحدث ده يلخص ببساطة هذه الشخصية ،،، أما بقي عن مواعيدها البايظة ومكياجها الاوفر الخ الخ الخ دي حاجات مش هتكلم فيها لان الكل عارفها كويس.