هاني فاروق يكتب.. رسالة من مواطن مصري للسيسي

كل سنة وإنت طيب يا ريس.. أول امبارح 8 يونيو.. احتفلنا بإن بقالك سنة بالتمام والكمال ريسنا بعد ما تحقق حلم المصريين في 30 يونيو 2013، وفوضناك لمحاربة الإرهاب بدل المرة أكتر من مرة، والحمد لله الحال أحسن.. واختارك الأغلبية تكون رئيسنا في 8 يونيو 2014.. لأنك كنت القائد المغوار والفارس الشجاع والمنقذ في أحلك الأوقات اللي عشناها في غيابات الجب، في زمن إسود، أيام حكم الجماعة إياها.
سيادتك وعدتنا بأحلام كتير.. بس عدت سنة البنزين فيها غلي والكهرباء والميه والغاز والخضار وياميش رمضان والأكل والشرب أسعارهم كلهم ارتفعت أضعاف، ده حتى الفول كمان بقى مولع نار وسيادتك تعلم إنه أكل الفقرا أو الوجبة الشعبية زي مبنقول.
يا ريسنا رغم ده كله إنت على قلب شعبك زي العسل، وانت سيد العارفين إن معظم بني شعبك الحال على أد الإيد.. وإنتا عارف كمان إن الصحة مش تمام، بالأمارة ده رئيس وزرائك محلب لما راح مستشفى لقى فيها قطط وملقاش فيها دكاترة خالص خالص.. والتعليم كمان مش ولا بد.. والشباب مش عارف يتجوز الشقق غالية نار ودخلهم تحت خط الفقر، رغم إن مسئوليك كل يوم بيقولوا فيه وظايف، وإنهم وفروا عشرة وعشرين وسبعين ألف شقة وهلما.. وكلنا بنقول يارب!!
مش بس كده.. حضرتك وعدت إولادك هتفرج عن الشباب اللي في المعتقلات بالآلاف.. الكلام ده من كام شهر وهما لسه محبوسين وقلب أمهاتهم بيموت من الحسرة.. يا ريس كتير منهم أبرياء ومضحوك عليهم، وسيادتك سيد العارفين إن الكل شايف وحاسس إن نظام داخليتك دلوقتي أسوأ من قبل 25 يناير، ولازم تخلي بالك قبل ما المارد يخرج من القمقم!!.. وحضرتك يا ريس عاهدتنا بإرساء دولة القانون، بس يظهر إن "عصا موسى" أعتى من أي قانون!! يا ترى يا ريس يا حبيبي سامعني.
ياريت كلامي يوصل لسيادتك بدل ما الزبانية بيسقونا شاي بالياسمين وزبادي بالعسل وياكلوا بعقلنا حلاوة بالدكتوراه الفخرية وبالست إلهام ويسرا.. يا ريس خلي بالك والله بحبك.
دول كلمتين وآسف يا ريس أكون اتكلمت كتير، وخايف التليفون يقوللي لقد أوشك رصيدكم على النفاذ.. كل سنة وإنت طيب يا ريس، وإنت قائدنا.. ونحقق معاك "مصر" الجديدة اللي بنحلم بيها من زماااان.