هشام النعال يكتب: اوعى

اوعى تبكى
البكا مش ليك
اوعى تشكى
الشكوى تشقيك
خليك صابر
الصبر دايما يعليك
وأن الزمن غدر بيك
الزم باب ربنا
هو اللى هيقويك
.................
اوعى يا جبل تنهار
ده الليل بيطلع له نهار
وعمر الشريف
ما يعرف طريقه العار
والاحرار
هما اللى بيثبتوا
اما العبيد
تتباع بارخص الاسعار
..................
اوعى تقول فى الكلام قولة
تقع من بعدها
وماتقومش لك قومة
ذى البومة
طول الليل تتمتم بحاجات مش مفهومة
وان طلع النهار
تفتش على رزقها
ما تلاقى ولو فولة
..................
اوعى تمد ايدك للى مش ليك
ده رزقك بيدور عليك
وان استعجلت وقولت انا محتاج
وسرقت فى لحظة هياج
غيرك فقير محتاج
بس فقره
لابسه على راسه تاج